Madžtaba Chamieniei vystupiŭ ź pieršym zvarotam u jakaści viarchoŭnaha lidara Irana. Jaho pačuli, ale nie pabačyli
Novy viarchoŭny lidar Irana Madžtaba Chamieniei ŭpieršyniu vystupiŭ z publičnym zvarotam paśla svajho pryznačeńnia na pasadu Radaj ekśpiertaŭ. Praŭda, sam u efiry nie pakazaŭsia — jahonuju zajavu prosta začytali na dziaržaŭnym telebačańni krainy.
U zvarocie Chamieniei zajaviŭ, što Armuzski praliŭ, praź jaki prachodzić kala piataj častki suśvietnych pastavak nafty, pavinien zastavacca zakrytym jak «instrumient cisku».
Jon taksama adznačyŭ, što Iran imkniecca padtrymlivać družalubnyja adnosiny z susiednimi krainami, ale padkreśliŭ, što iranskija vajskoŭcy nanosiać udary tolki pa amierykanskich vajskovych bazach na ich terytoryi. Pavodle jaho słoŭ, usie bazy ZŠA ŭ rehijonie pavinny być nieadkładna zakrytyja, inakš jany buduć padviarhacca atakam.
Taksama jon pryhraziŭ adkryćciom «inšych frantoŭ» u kanflikcie Irana z ZŠA i Izrailem, kali bajavyja dziejańni praciahnucca.
Chamieniei ni razu nie źjaŭlaŭsia na publicy ŭsie niekalki dzion paśla abviaščeńnia jaho novym kiraŭnikom krainy. Raniej ŚMI paviedamlali, što jon moh atrymać traŭmy padčas amierykana-izrailskich udaraŭ, u vyniku jakich zahinuŭ jaho baćka — były viarchoŭny lidar Irana ajatała Ali Chamieniei.
Pavodle infarmacyi CNN, u pieršy dzień bambardzirovak Madžtaba Chamienii atrymaŭ pierałom stupni i niekalki niaznačnych traŭm. U toj ža čas praz adsutnaść Chamieniei ŭ publičnaj prastory chodziać čutki, što jahonyja traŭmy mohuć być kudy bolš surjoznymi.
Toj fakt, što Madžtabu Chamieniei dahetul nie pakazvali dziaržaŭnyja iranskija ŚMI, pryvioŭ da šyrokaha raspaŭsiudžvańnia śpiekulacyj u sacsietkach, asabliva ŭ asiarodździ iranskaj dyjaspary, pra toje, što novy viarchoŭny lidar Irana paranieny vielmi mocna, kali ŭvohule žyvy.
Ułady Irana pryznali, što novy viarchoŭny lidar paranieny — pierałom stupni i parezy na tvary
«Adsiačeš adnu hałavu — vyrastajuć novyja». Jak kiraŭnictva Irana pabudavała sistemu, jakaja dazvalaje ŭtrymlivać uładu
Patryjarch Kirył nazvaŭ novaha viarchoŭnaha lidara Irana «darahim bratam»
Rasija papiaredžvała Ali Chamieniei pra ŭdar, ale toj nibyta abraŭ pakutnickuju śmierć
Kamientary