Českaja bijatłanistka Habryeła Koŭkałava raspaviała, što dziesiać hadoŭ pakutavała ad anareksii. Pavodle jaje słoŭ, chvaroba pačałasia paśla taho, jak trenier junijorskaj zbornaj Čechii staŭ vinavacić jaje ŭ lišniaj vazie.
«Moža, jon nie mieŭ na ŭvazie ničoha drennaha. Mahčyma, u jaho prosta było mała viedaŭ pra fizijałohiju dziaŭčat. Chutčej za ŭsio, jon naohuł nie viedaŭ, jak treba stasavacca ź dziaŭčatami-padletkami, bo kazaŭ mnie, što ja toŭstaja, jak śvińnia. Niejak raz, kali ja važyła krychu mienš, čym ciapier, jon padvioŭ mianie da lusterka i skazaŭ: «Pahladzi, jak ty žudasna vyhladaješ». Paśla hetaha ja pačała vykidvać svaju ježu va ŭnitaz.
Potym sprabavała skinuć vahu ŭsimi mahčymymi sposabami. Ja prajšła praz usie dyjety, jakija tolki isnujuć. Padčas vystupaŭ ja taksama sačyła za vahoj. Kali biehła narmalna — dazvalała sabie śniadanak i łanč, ale ŭsio roŭna abychodziłasia biez abiedu», — raspaviała Koŭkałava.
Byvali dni, kali spartsmienku vanitavała pa vosiem razoŭ na dzień. A časam jana naohuł ničoha nie jeła cełymi dniami, tolki piła vadu.
«Heta było žudasna, mnie tak soramna heta ŭzhadvać… I vielmi składana pra heta kazać. U vyniku ja zmahła ŭziać miedali ŭ Sočy-2014, ale tak asłabła, što viarnułasia da narmalnaha charčavańnia. I adrazu ž znoŭ nabrała vahu. Potym pasprabavała skinuć jaje, i ŭ mianie znoŭ pačalisia prablemy», — skazała Koŭkałava.
Ekśpiert pa charčavańni Rychard Pflehier, da jakoha ŭ 2015 hodzie źviarnułasia Koŭkałava, ličyć, što spartsmienka chutčej pakutavała ad bulimii, čym ad anareksii.
«Heta była chutčej bulimija. Heta nie kłasičnaja anareksija. U jaje było tak: jana źjadała niešta, z-za čaho adčuvała vinu i ŭpadała ŭ adčaj. Potym jana davodziła svoj arhanizm praktyčna da anareksii. Chutčej za ŭsio, usie jaje prablemy nasili psichasamatyčny charaktar», — adznačyŭ Pflehier.
Kamientary