Zabudoŭščyk prapanavaŭ 640 siemjam dapłacić pa 120 dalaraŭ za «kvadrat» užo apłačanych kvater

Kiraŭnictva pryvatnaha zabudoŭščyka «Tambaz» na sustrečy ŭ administracyi Savieckaha rajona Minska prapanavała trymalnikam ablihacyj dapłacić za dabudovu ŽK «Arkadzija» 100-120 dalaraŭ za kvadratny mietr, piša tut.by.

Prysutnym hramadzianam taki varyjant nie spadabaŭsia. Ale alternatyvaŭ u ich niašmat - abiacany Minharvykankamam prajekt zahada ab źmienie zamoŭcy jašče nie hatovy. Taksama nie viadoma, kolki trymalnikam ablihacyj daviadziecca dapłacić dziaržzabudoŭščyku.

Hienieralny dyrektar «Tambaz» Alaksandr Aŭsiańnikaŭ prapanavaŭ padpisać dadatkovaje pahadnieńnie, u jakim praduhledžany pieranos terminaŭ uvodu ŭ ekspłuatacyju žyłych damoŭ i ŭniasieńnie dadatkovaj apłaty dla skančeńnia budaŭnictva. Była ahučana i suma dapłaty - 100-120 dalaraŭ za za kvadratny mietr.

Siarod trymalnikaŭ žyllovych ablihacyj budzie papiarednie praviedzienaje piśmovaje apytańnie, i kali bolšaść pahodzicca na novyja ŭmovy, to da budaŭnictva zabudoŭščyk, pa jaho słovach, hatovy prystupić užo ŭ nastupnym miesiacy. Hienieralny dyrektar «Tambaz» zajaviŭ: kali trymalniki ablihacyj admoviacca padpisvać dadatkovyja pahadnieńni, jon maje namier skasoŭvać damovy na atrymańnie kvatery z vypłataj kampiensacyi ź indeksacyjaj.

Pavialičyć

Zrešty, kab taki varyjant prajšoŭ, «Tambaz» treba budzie zaručycca padtrymkaj bolšaści trymalnikaŭ ablihacyj. Adnak nastroi ŭ ludziej inšyja i da lubych prapanovaŭ jany staviacca ź niedavieram.

Mnohija spadziajucca na dziaržzabudoŭščyka. Pra źmienu zabudoŭščyka 30 sakavika 2018 hoda zajaviŭ staršynia kamiteta budaŭnictva i inviestycyj Minharvykankama Dźmitryj Hurynienka. Tady ž byŭ anansavany narmatyŭna-pravavy akt ab pieradačy ŽK «Arkadzija» dziaržzabudoŭščyku.

U krasaviku trymalniki žyllovych ablihacyj STAA «Tambaz» vykłali videazvarot da prezidenta - ludzi aburalisia, što im prapanujuć dapłacić za dabudoŭvańnie ŭžo apłačanych kvater.

Staličnaja finansavaja milicyja raspačała kryminalnuju spravu ŭ dačynieńni da byłoha hiendyrektara. Pa viersii pravaachoŭnikaŭ «były hiendyrektar STAA «Tambaz» Leŭ Chajucin vykarystoŭvaŭ nie pa pryznačeńni hrašovyja srodki, pryciahnutyja z dapamohaj vypusku i realizacyi žyllovych ablihacyj dla finansavańnia budaŭnictva dvuch žyłych damoŭ. Hetyja hrošy byli vydatkavanyja na vykanańnie abaviazalnictvaŭ tavarystva pa budaŭnictvie inšaha žyłoha doma, a taksama na apłatu budaŭničych materyjałaŭ i budaŭniča-mantažnych rabot na inšych abjektach, jakimi zajmałasia STAA «Tambaz».

Inšyja abjekty - heta styłabat, na jakim stajać damy. U im - kamiercyjnyja pamiaškańni i handlovy centr. Ich finansavali, jak padmurak, z «ahulnaha katła» ŭ nadziei znajści pakupnika i viarnuć hrošy ŭ budaŭnictva. Ale pakupnika nie znajšłosia. U vyniku firma nie vykanała abaviazalnictvy pa budaŭnictvie prafinansavanych abjektaŭ.

Pavialičyć

• 0
• 0
• 0
• 0
• 0
• 0
• 0
• 0