Rasijskija ŚMI zahavaryli pra stvareńnie Rasijskaha sajuza ź Biełaruśsiu ŭ składzie, na čale z Pucinym

Na rasijskim šavinistyčnym partale eadaily.com źjaviŭsia artykuł, u jakim raskazvajecca, jak Pucin zmoža zastacca va ŭładzie paśla 2024 hoda. Dla hetaha jamu nieabchodna stvaryć na bazie tak zvanaj «sajuznaj dziaržavy» Biełarusi i Rasii novuju dziaržavu pad nazvaj «Rasijski sajuz», u składzie jakoj budzie i Biełaruś. I kiravać hetaj novaj dziaržavaj, viadoma, budzie Pucin. Hetaje mierkavańnie možna było b ličyć fantazijaj rasijskich čarnasociencaŭ, kali b nie adzin cikavy fakt — pra hety ž mahčymy scenar kazaŭ i hałoŭny redaktar radyjo «Echo Moskvy» Alaksiej Vieniadziktaŭ, jaki padtrymlivaje ciesnyja adnosiny z pres-sakratarom Pucina Dźmitryjem Piaskovym.

Kirył Aviarjanaŭ-Minski ličyć, što Pucin nijak nie zmoža pakinuć svaju pasadu — inakš jaho čakaje los Słabadana Miłošaviča. Ale što rabić z Kanstytucyjaj Rasii, jakaja dazvalaje bałatavacca nie bolš čym na 2 terminy zapar? Kandydat jurydyčnych navuk Aviarjanaŭ-Minski nie bačyć tut prablemy i cytuje vierš:

Široki natury russkije,
Našiej pravdy idieał 
Nie vlezajet v formy uzkije
Juridičieskich načał…

Aviarjanaŭ-Minski prapanuje ŭ 2024 hodzie pryniać kanstytucyjny akt tak zvanaj «sajuznaj dziaržavy», stvaryć dziaržaŭnaje ŭtvareńnie pad nazvaj «Rasijski sajuz», kiraŭnikom jakoha stanie Pucin. 

Na dumku Aviarjanava-Minskaha, Łukašenka ničoha z hetym zrabić nie zmoža, bo Biełaruś ekanamična zaležyć ad Rasii, a «svaim chłopcam» Łukašenka na Zachadzie nie stanie nikoli.

«Tak što dla zachavańnia «kryštalnaha sasuda» cełym jaho nieabchodna pastavić na palicu Rasijskaha sajuza, kudy ruka Vašynhtona nie daciahniecca», — nie strymlivaje svaich namieraŭ šavinist.

Na dumku čarnasocienca, «uźjadnańnie Biełarusi i Rasii» padymie rejtynh Pucina jašče vyšej, čym aneksija Kryma ŭ 2014 hodzie.

Ale Aviarjanaŭ-Minski papiaredžvaje, što Rasii nieabchodna dziejničać chutka:

«U Biełarusi ŭ apošnija hady aktyŭna farmujecca novaja nacyjanalnaja identyčnaść, u asnovie jakoj lažyć procipastaŭleńnie biełarusaŭ astatnim ruskim. Hetyja pracesy zajšli ŭ Biełarusi davoli daloka, i kali ŭ ahladnaj budučyni nie inkarparavać Biełaruś u supolnuju z Maskvoj palityčnuju i kulturnuju prastoru, to my ryzykujem stracić našu Biełuju Ruś nazaŭždy».

Cikava, što pra padobny scenar nie tak daŭno kazaŭ hałoŭny redaktar radyjo «Echa Moskvy» Alaksiej Vieniadziktaŭ, jaki źjaŭlajecca siabram pres-sakratara Pucina Dźmitryja Piaskova.

Pavialičyć

— Navat farmalna, navat paŭfarmalna, ale nichto nie pieraškadžaje: jaje [Kanstytucyju] źmianić abo pabudavać jakuju-niebudź nadbudovu ŭ vyhladzie sajuznaj dziaržavy Rasii i Biełarusi. Pryznačyć Łukašenku pasłom u Zimbabve. I tam, hruba kažučy, novaja dziaržava — novyja terminy. Nu čamu nie? Voś što pieraškadžaje? Dzie vy bačycie pieraškodu dla hetaha? Ja, naprykład, nie baču…

• 0
• 0
• 0
• 0
• 0
• 0
• 0
• 0