Artroz, asteachandroz — hutarka z reŭmatołaham pra chvaroby sustavaŭ i chrybta

«Naša Niva»: Ź jakimi chvarobami prychodziać da reŭmatołaha?

Iryna Varońka: Reŭmatyčnyja zachvorvańni — heta šyrokaje koła chvarob, siarod jakich jość jak dosyć prostyja, jakija ŭźnikajuć u mnohich ludziej z uzrostam (da prykładu, asteaartroz), tak i bolš surjoznyja. Sistemnyja zachvorvańni złučalnaj tkaniny davoli redkija, ale kali terapieŭt zapadozryŭ padobnyja źmieny ŭ arhaniźmie, to nieabchodnaja kansultacyja reŭmatołaha. Najbolš raspaŭsiudžanyja chvaroby sustavaŭ — prypuchańni, acioki, bol, pačyrvanieńni.

«NN»: Čamu časta pry bolach u sustavach iduć nie da reŭmatołaha, a da chirurha?

IV: Vyznačyć, da kaho adpravić pacyjenta — reŭmatołaha abo chirurha — pavinien terapieŭt. I kali sam pacyjent prymaje rašeńnie iści da chirurha, to heta, jak praviła, pamyłka. Chirurhi patrebnyja ŭ tym vypadku, kali jość nieabchodnaść mienavita chirurhičnaha ŭmiašańnia: zrabić unutrysustaŭny ŭkoł, pravieryć, ci jość pierałom abo ŭdar. Ale vyrašyć pytańnie, ci treba heta, pavinien terapieŭt. Terapieŭt — heta «dyśpietčar», jaki musić nakiravać čałavieka da pravilnaha śpiecyjalista.

«NN»: Jak prajaŭlajecca asteaartroz?

IV: Asteaartroz, abo, jak ciapier bolš pravilna kazać, asteaartryt, zvyčajna prajaŭlajecca z uzrostam. Čaściej — u žančyn u pieryjad mienapaŭzy, kali chrastkovaja płaścinka stanovicca niaŭstojlivaj: pačynaje ściracca, źjaŭlajecca bol. Pry hetym źmianšajecca sustaŭnaja prastora, zapalajecca kapsuła sustava. Heta pryvodzić da taho, što sustaŭ hublaje svaje amartyzujučyja ŭłaścivaści i nie moža pieranosić biez bolu tych nahruzak, jakija raniej byli narmalnymi.

«NN»: Jak časta sustrakajecca hetaja chvaroba?

IV: U 60% ludziej, starejšych za piaćdziesiat hadoŭ, jość asteaartryt. Siarod starejšych za siemdziesiat hadoŭ hetaja ličba jašče vyšejšaja.

«NN»: Chto ŭ hrupie ryzyki?

IV: Čaściej za ŭsio artroz źjaŭlajecca ŭ ludziej, čyja praca źviazanaja ź ciažkaj fizičnaj nahruzkaj, u ludziej z parušeńniem vosiaŭ nižnich kaniečnaściaŭ (naprykład, O-padobnyja ci Ch-padobnyja nohi), u ludziej z płoskastupniovaściu, a taksama ŭ tych, chto ŭ maładości zajmaŭsia prafiesijnym sportam.

«NN»: Jak źnizić imaviernaść zachvareć na asteaartryt?

IV: Jość roznyja vidy prafiłaktyki. Usio zaležyć ad prafiesii, połu, ładu žyćcia. Univiersalnaja parada dla ŭsich — sačyć za vahoj. Jana nie pavinna być vyšej za narmalnyja značeńni dla peŭnaha ŭzrostu. Biezumoŭna, karysnymi buduć himnastyka, lačebnaja fizkultura, płavańnie, svoječasovaje i pravilnaje lačeńnie zachvorvańniaŭ, jakija ŭ budučyni mohuć pryvieści da asteaartrytu (raściažeńni, pierałomy i inšyja traŭmy).

«NN»: Ciapier usio bolš ludziej pakutujuć na asteachandroz. Raskažycie pra hetaje zachvorvańnie.

IV: Asteachandroz — heta niereŭmatyčnaje zachvorvańnie mižpazvanočnych dyskaŭ. Naohuł, heta stan chrybietnika, charakterny praktyčna dla kožnaha čałavieka paśla 27 hadoŭ. Ale kali źjaŭlajecca bol, abumoŭleny tym, što dysk pieražyvaje niejkija źmieny, jakija traŭmujuć niervy, albo źjaŭlajucca šypavidnyja razrastańni mižpazvankovych sustavaŭ, to nieabchodna prymać peŭnyja miery: zajmacca himnastykaj, rehularna vykonvać fizičnyja praktykavańni, raźminku i vieści pravilny ład žyćcia. Heta narmalny režym pracy i adpačynku, pravilnaje charčavańnie, fitnes, rehularnaja razhruzka chrybietnika. Pry źjaŭleńni bolu nieabchodna lehčy, raźmiacca, raściahnuć chrybietnik.

«NN»: Jak lečycca asteachandroz?

IV: Dla prafiłaktyki ŭźniknieńnia bolaŭ nieabchodna zajmacca lačebnaj fizkulturaj. Akramia taho, karysnymi buduć masaž, ihłarefleksaterapija, ciepłavyja pracedury, płavańnie. Naohuł, asteachandroz «lečycca» sportam i adekvatnymi fizičnymi nahruzkami. U čałavieka pavinien być dastatkova dobry karkas ciahlic, kab zabiaśpiečyć stabilny stan mižchrybietnych dyskaŭ.

• 0
• 0
• 0
• 0
• 0
• 0
• 0
• 0