Biełaruski školnik spažyvaje ŭ šeść razoŭ bolej soli za amierykanskaha. Heta chočuć vypravić
Pytańnie ab uviadzieńni ŭ racyjon biełaruskich školnikaŭ dadatkovaj šklanki małaka «vyvučajuć adpaviednyja orhany dziaržaŭnaha kiravańnia». Pra heta paviedamiła 21 žniŭnia zahadčyca adździełam Respublikanskaha centru hihijeny, epidemijalohii i hramadzkaha zdaroŭja Ała Małachava, piša Radyjo Svaboda.
«Daśledavańni pakazvajuć, što dzieciam u škołach nie chapaje małaka. Tamu my ličym nieabchodnym uvieści ŭ meniu školnych stałovak dadatkovuju šklanku małaka albo praduktu, jaki moža razhladacca jak jahony zamianialnik: naprykład, tvarožnaja pasta ci johurt», — skazała Małachava.
Sol i cukar — hałoŭnaja niebiaśpieka dla biełaruskaha vučnia
«Najbolšy nehatyŭny ŭpłyŭ na zdaroŭje vučniaŭ akazvaje zališniaje ŭžyvańnie imi soli. Tak, norma charčavańnia biełaruskaha školnika praduhledžvaje, što jon pavinien źjadać ciaham sutak 6-8 hramaŭ soli. Adpaviednaja norma dla vučniaŭ Złučanych Štataŭ Ameryki składaje 1,2 hrama», — skazaŭ žurnalistam načalnik adździeła charčavańnia Navukova-praktyčnaha centru Nacyjanalnaj Akademii navuk Biełarusi pa charčavańni Valer Šyłaŭ.
Pavodle navukoŭca, u siarednim žychar Biełarusi ŭžyvaje 10,6 hramaŭ soli na sutki, što ŭ 2 razy bolš, čym rekamenduje Usiaśvietnaja arhanizacyja achovy zdaroŭja.
«Dziela pamianšeńnia ŭžyvańnia soli ŭ školnych stałovych zaraz raspracoŭvajecca novaja technalohija pryhatavańnia kaŭbas», — paviedamiła namieśnik dyrektara Instytutu miasa-małočnaj pramysłovaści Natalla Furyk. — Z dapamohaj navukoŭcaŭ Biełaruskaha dziaržaŭnaha ŭniversyteta my spadziajemsia źnizić najaŭnaść soli ŭ kaŭbasach na 30%. Dumaju, što z novaha hodu my zmožam naładzić vypusk takich kaŭbas».
Razam z tym utrymańnie cukru ŭ charčavańni školnikaŭ planujuć źnizić na 30-35%.
Švedzki stoł u škołach
«Dla taho, kab kardynalnym čynam vyrašyć prablemy charčavańnia vučniaŭ u školnych stałoŭkach, najlepšym vyhladaje ŭviadzieńnie ŭ škołach švedzkaha stała», — ličyć Valer Šyłaŭ.
Pavodle jaho, eksperymenty ŭ niekalkich škołach pakazali, što adkidaŭ pry takim charčavańni praktyčna niama, bo vučni sami vybirajuć toje, što im padabajecca.
«I naohuł charčavańnie pa vybary najbolš adpaviadaje ciapierašniamu času i mahło b dobra paŭpłyvać na zdaroŭje dziaciej. A jano, na žal, vyklikaje tryvohu».
Valer Šyłaŭ adznačyŭ, što za apošnija 10 hod zachvorvańni dziaciej u škołach Miensku pavialičylisia na tracinu, i ŭ hetym svaju vialikuju nehatyŭnuju rolu adyhryvaje niapravilnaje charčavańnie.
Ciapier čytajuć
U Maładziečnie ŭ pustym vahonie znajšli 27-hadovaha amierykanca, jaki nielehalna trapiŭ u Biełaruś2
Kamientary