Imkliva raście pracoŭnaja mihracyja biełarusaŭ u Polšču
Ekśpierty prahnazujuć, što ŭsio bolš biełarusaŭ imkniecca źjechać na pracu ŭ Polšču. Pra heta išła havorka ŭ minskim Pres-kłubie pra biełaruska-polskija adnosiny, piša sajt Radyjo Svaboda pavodle infarmacyi Deutsche Welle.
Jašče piać hadoŭ tamu ŭ biełaruskich haradach abjavy ab pracy ŭ Polščy byli vialikaj redkaściu, ciapier jany jość navat u nievialikich nasielenych punktach va ŭschodnich rehijonach Biełarusi. I heta — tendencyja. Akramia taho, analiz zapytaŭ u pošukavych systemach u internecie śviedčyć, što ciapier pracu ŭ Polščy biełarusy šukajuć utraja čaściej, čym u Rasiei, tady jak jašče ŭ 2015 hodzie sytuacyja była advarotnaj. Da pačatku 2016 hoda biełaruskija pracoŭnyja mihranty ŭ asnoŭnym znachodzilisia na rasiejskim rynku pracy.
Kolkaść atrymanych biełarusami pracoŭnych viz u Polšču pavialičyłasia z 2014 pa 2017 hod amal u siem razoŭ: z 1591 da 10 518. Sioleta polskija konsulstvy vydali ŭ Biełarusi kala 40 000 pracoŭnych viz, skazaŭ Andrej Jelisiejeŭ, akademičny dyrektar varšaŭskaha analityčnaha centra EAST. Akramia taho, u 10-12 raz za apošnija try-čatyry hady vyrasła kolkaść zaprašeńniaŭ biełarusam ad polskich pracadaŭcaŭ, vydadzienych u ramkach sproščanaha paradku pracaŭładkavańnia.
Što tyčycca doŭhaterminovaj mihracyi, to ŭ apošnija hady kolkaść biełarusaŭ, jakija majuć vid na žycharstva ŭ Polščy, nia vyrasła, ale, tłumačyć Jelisiejeŭ, pavialičyłasia kolkaść uładalnikaŭ «kart palaka» (ich bolš za 100 000), jakija majuć prava lehalna pracaŭładkavacca ŭ Polščy.
Eksperty prahnazujuć rost karotkaterminovaj i doŭhaterminovaj pracoŭnaj mihracyi biełarusaŭ u Polšču. Pry hetym u pieršym vypadku nastupstvy chutčej stanoŭčyja: źnižajecca sacyjalnaja napružanaść, bo ŭ šerahu rehijonaŭ Biełarusi jość prablemy z pracaŭładkavańniem. Akramia taho, zaroblenyja pracoŭnymi mihrantami hrošy ŭ dva-try razy pamianšajuć kolkaść chatnich haspadarak u Biełarusi, jakija žyvuć za miažoj biednaści.
Nastupstvy doŭhaterminovaj pracoŭnaj mihracyi, pa acency Andreja Jelisiejeva, chutčej za nehatyŭnyja. U Polščy zaraz vučacca ŭžo bolš za 5000 biełaruskich studentaŭ, polskija ŭniversytety stanoviacca hod ad hoda bolš papularnymi siarod biełaruskaj moładzi. Takim čynam, vysokakvalifikavanyja biełarusy — i tyja, chto jašče vučycca, i tyja, chto ŭžo źjechaŭ i paśpiachova padymajucca pa karjernaj leśvicy ŭ Polščy, naŭrad ci viernucca. I heta, viadoma, u škodu Biełarusi, padkreśliŭ Jelisiejeŭ.
Dzieviać čałaviek pamierli ŭ Breście i Minsku — usim im uvodzili adnyja i tyja ž leki. U preparacie znajšli bakteryi5
Kamientary