Імкліва расце працоўная міграцыя беларусаў у Польшчу
Эксперты прагназуюць, што ўсё больш беларусаў імкнецца з'ехаць на працу ў Польшчу. Пра гэта ішла гаворка ў мінскім Прэс-клубе пра беларуска-польскія адносіны, піша сайт Радыё Свабода паводле інфармацыі Deutsche Welle.
Яшчэ пяць гадоў таму ў беларускіх гарадах аб’явы аб працы ў Польшчы былі вялікай рэдкасьцю, цяпер яны ёсьць нават у невялікіх населеных пунктах ва ўсходніх рэгіёнах Беларусі. І гэта — тэндэнцыя. Акрамя таго, аналіз запытаў у пошукавых сыстэмах у інтэрнэце сьведчыць, што цяпер працу ў Польшчы беларусы шукаюць утрая часьцей, чым у Расеі, тады як яшчэ ў 2015 годзе сытуацыя была адваротнай. Да пачатку 2016 года беларускія працоўныя мігранты ў асноўным знаходзіліся на расейскім рынку працы.
Колькасьць атрыманых беларусамі працоўных віз у Польшчу павялічылася з 2014 па 2017 год амаль у сем разоў: з 1591 да 10 518. Сёлета польскія консульствы выдалі ў Беларусі каля 40 000 працоўных віз, сказаў Андрэй Елісееў, акадэмічны дырэктар варшаўскага аналітычнага цэнтра EAST. Акрамя таго, у 10-12 раз за апошнія тры-чатыры гады вырасла колькасьць запрашэньняў беларусам ад польскіх працадаўцаў, выдадзеных у рамках спрошчанага парадку працаўладкаваньня.
Што тычыцца доўгатэрміновай міграцыі, то ў апошнія гады колькасьць беларусаў, якія маюць від на жыхарства ў Польшчы, ня вырасла, але, тлумачыць Елісееў, павялічылася колькасьць уладальнікаў «карт паляка» (іх больш за 100 000), якія маюць права легальна працаўладкавацца ў Польшчы.
Экспэрты прагназуюць рост кароткатэрміновай і доўгатэрміновай працоўнай міграцыі беларусаў у Польшчу. Пры гэтым у першым выпадку наступствы хутчэй станоўчыя: зьніжаецца сацыяльная напружанасьць, бо ў шэрагу рэгіёнаў Беларусі ёсьць праблемы з працаўладкаваньнем. Акрамя таго, заробленыя працоўнымі мігрантамі грошы ў два-тры разы памяншаюць колькасьць хатніх гаспадарак у Беларусі, якія жывуць за мяжой беднасьці.
Наступствы доўгатэрміновай працоўнай міграцыі, па ацэнцы Андрэя Елісеева, хутчэй за нэгатыўныя. У Польшчы зараз вучацца ўжо больш за 5000 беларускіх студэнтаў, польскія ўнівэрсытэты становяцца год ад года больш папулярнымі сярод беларускай моладзі. Такім чынам, высокакваліфікаваныя беларусы — і тыя, хто яшчэ вучыцца, і тыя, хто ўжо зьехаў і пасьпяхова падымаюцца па кар'ернай лесьвіцы ў Польшчы, наўрад ці вернуцца. І гэта, вядома, у шкоду Беларусі, падкрэсьліў Елісееў.
-
Іван Прус расказаў, як нажыўся на 200 даляраў, пасяліўшы кіназорку ў занядбанай кватэры каля сметніка ў Шабанах, абстаўленай рэчамі з яго інтэрната
-
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»
-
Літоўскія памежнікі знайшлі на мяжы з Беларуссю партыю цыгарэт на 260 тысяч еўра
Цяпер чытаюць
Вайб-праграмаванне зменіць ролю распрацоўшчыка, RLVR, і калі лопне бурбалка. Беларус-інжынер у галіне ШІ, які працуе ў ЗША, расказаў, што нас чакае ў 202633
Каментары