Nastaŭnicu muzyki, jakaja vučyła dziaciej pry lichtarykach, viarnuli na pracu
Nastaŭnicu Alenu z muzyčnaj škoły ŭ vioscy Padłabieńnie na Horadzienščynie, jakaja pravodziła zaniatki ŭ klasie bieź śviatła, paśla rozhałasu ŭ ŚMI, pakinuli na pracy, piša Radyjo Svaboda.
Fota, dzie dzieci zajmajucca notnaj piśmiennaściu pry lichtarykach, trapili ŭ sieciva 13 listapada. Praź dzień stała viadoma, što nastaŭnicu Alenu, jakaja rabiła zdymki, vyklikali ŭ rajvykankam. U toj ža dzień jana napisała zajavu ab zvalnieńni. 15 listapada musiła stać jejnym apošnim pracoŭnym dniom u škole.
Jak sama nastaŭnica raniej kazała Svabodzie, kiraŭnictva škoły dało joj padpisać blank na zvalnieńnie pa pahadnieńni bakoŭ.
Adnak u adździele kultury Horadzienskaha rajvykankama žurnalistam Tut.by paviedamili, što nastaŭnicu zvalniać nichto nie źbirajecca, maŭlaŭ, ź joj tolki była praviedzienaja hutarka
Užo 16 listapada Alena paviedamiła Svabodzie, što znoŭ znachodzicca na pracy.
«Tut elektryki, pravodziać śviatło. Ja nie mahu šmat havaryć. Zaraz padjedzie telebačańnie, budzie zdymać hety kabinet (dzie zajmalisia bieź śviatła — RS)», — skazała nastaŭnica.
Pa jejnych słovach, uviečary 15 listapada da jaje na pracu pryjechaŭ pradstaŭnik adździeła kultury Horadzienskaha rajvykankama i skazaŭ, kab nazaŭtra jana vychodziła na pracu.
«Siońnia zvanili z upraŭleńnia kultury abłvykankama. Skazali: «Zajavie (na zvalnieńnie — RS) chodu nie damo»», — praciahvaje žančyna.
Alena kaža, što nia bačyła, kab jejnuju zajavu źniščyli, ale i zahad ab zvalnieńni nie padpisvała. Pa vusnaj damoŭlenaści, vyjšła na pracu, jak i raniej, z toj ža zaniataściu.
«Mnie by choć da kanca navučalnaha hoda dapracavać. Bo pasiarod hoda znajści pracu nierealna», — pryznajecca jana.
Kamientary