Aktyvistaŭ, jakija prynieśli papiarovyja karabliki da pasolstva Rasii, prysudzili da vialikich štrafaŭ
Karabliki ŭ sudzie Centralnaha rajona.
U sudzie Centralnaha rajona Mienska 22 śniežnia adbyŭsia razhlad administracyjnych spraŭ udzielnikaŭ akcyi z papiarovymi karablikami kala ambasady Rasii.
Nahadajem, uviečary 26 listapada da ambasady Rasii ŭ Minsku pryjšło kala dziesiaci čałaviek, pieravažna z «Moładzi BNF», jakija ŭskłali na parapiet aharodžy papiarovyja karabliki, afarbavanyja ŭ kolery ŭkrainskaha ściaha.
Takim čynam aktyvisty vykazali salidarnaść z ukrainskimi marakami, abstralanymi i zachoplenymi ŭ pałon u Azoŭskim mory.
Za akcyjaj nazirali supracoŭniki milicyi ŭ cyvilnym i viali apieratyŭnuju videazdymku.
Paźniej niekalki ŭdzielnikaŭ atrymali pa pošcie pratakoły ab administracyjnym pravaparušeńni. Siarod ich Jaŭhien Batura, Śviatłana Kavalenka, Dzianis Urbanovič, Siarhiej Tarasienka i žurnalistka «Novaha Času» Dzijana Sieradziuk, jakaja aśviatlała akcyju.
Śviatłana Kavalenka, Jaŭhien Batura, Dzijana Sieradziuk.
Palityki Anatol Labiedźka i Mikałaj Kazłoŭ vystavili ŭ sudzie karabliki. Supracoŭnik milicyi ŭ cyvilnym padyšoŭ i zabraŭ karabliki. Ludzi pastavili novyja, žartujuć, što ich zachapili piraty.
Śviatłana Kavalenka pryznała, što ŭstalavała try karabliki. «Heta nie pikiet, a akt salidarnaści. Ja nie liču, što akt salidarnaści treba sankcyjanavać», — patłumačyła jana.
Jana źviarnuła ŭvahu sudździ, što za akt salidarnaści ź ludźmi, siemji jakich paciarpieli ŭ Kiemierava, na ludziej nie składali pratakołaŭ.
Pastanova sudździ: Śviatłana Kavalenka, Jaŭhien Batura, Dzijana Sieradziuk, Dzianis Urbanovič, Siarhiej Tarasienka — štraf pa 20 bazavych vieličyń (pa 490 rubloŭ).
* * *
Aproč hetaha, pravaabaroncam stała viadoma, što na niekalki niepaŭnahadovych aktyvistaŭ «Moładzi BNF» taksama skłali pratakoły pravaparušeńniaŭ, jakija pieradadzieny dla razhladu ŭ Administracyjnyja kamisii pa miescy ich žycharstva.
Kamientary