Актывістаў, якія прынеслі папяровыя караблікі да пасольства Расіі, прысудзілі да вялікіх штрафаў
Караблікі ў судзе Цэнтральнага раёна.
У судзе Цэнтральнага раёна Менска 22 снежня адбыўся разгляд адміністрацыйных спраў удзельнікаў акцыі з папяровымі караблікамі каля амбасады Расіі.
Нагадаем, увечары 26 лістапада да амбасады Расіі ў Мінску прыйшло каля дзесяці чалавек, пераважна з «Моладзі БНФ», якія ўсклалі на парапет агароджы папяровыя караблікі, афарбаваныя ў колеры ўкраінскага сцяга.
Такім чынам актывісты выказалі салідарнасць з украінскімі маракамі, абстралянымі і захопленымі ў палон у Азоўскім моры.
За акцыяй назіралі супрацоўнікі міліцыі ў цывільным і вялі аператыўную відэаздымку.
Пазней некалькі ўдзельнікаў атрымалі па пошце пратаколы аб адміністрацыйным правапарушэнні. Сярод іх Яўген Батура, Святлана Каваленка, Дзяніс Урбановіч, Сяргей Тарасенка і журналістка «Новага Часу» Дзіяна Серадзюк, якая асвятляла акцыю.
Святлана Каваленка, Яўген Батура, Дзіяна Серадзюк.
Палітыкі Анатоль Лябедзька і Мікалай Казлоў выставілі ў судзе караблікі. Супрацоўнік міліцыі ў цывільным падышоў і забраў караблікі. Людзі паставілі новыя, жартуюць, што іх захапілі піраты.
Святлана Каваленка прызнала, што ўсталявала тры караблікі. «Гэта не пікет, а акт салідарнасці. Я не лічу, што акт салідарнасці трэба санкцыянаваць», — патлумачыла яна.
Яна звярнула ўвагу суддзі, што за акт салідарнасці з людзьмі, сем'і якіх пацярпелі ў Кемерава, на людзей не складалі пратаколаў.
Пастанова суддзі: Святлана Каваленка, Яўген Батура, Дзіяна Серадзюк, Дзяніс Урбановіч, Сяргей Тарасенка — штраф па 20 базавых велічынь (па 490 рублёў).
* * *
Апроч гэтага, праваабаронцам стала вядома, што на некалькі непаўнагадовых актывістаў «Моладзі БНФ» таксама склалі пратаколы правапарушэнняў, якія перададзены для разгляду ў Адміністрацыйныя камісіі па месцы іх жыхарства.
«Запускайце далей салюты, а я выклічу міліцыю». Беларусы спрачаюцца пра забарону на феерверкі2
Каментары