Kamunisty Kalakina razam z pradstaŭnikami «ruskaha śvietu» arhanizoŭvajuć «Bieśśmiarotny połk» u Viciebsku
Jašče 19 krasavika ŭ Viciebski harvykankam była padadzienaja zajaŭka na praviadzieńnie akcyi «Bieśśmiarotny połk» na 9 maja. Admietnaściu stała toje, što zajaŭku padavali pradstaŭniki apazicyjnaj hramadzianskaj supolnaści, a taksama «Spraviadlivaha śvietu».
Pad zvarotam padpisalisia pradstaŭnik Svabodnaha prafsajuza mietalistaŭ Jaŭhien Inc, Hieorhij Razumaŭ (Prafsajuz radyjoelektronnaj pramysłovaści), Halina Barejka («Spraviadlivy śviet»), a taksama pradstaŭnik arhanizacyi likvidataraŭ na ČAES Vadzim Kuźmin. Admietna, što jašče adna zajaŭka na praviadzieńnie «Bieśśmiarotnaha pałka» była padadzienaja ad pradstaŭnika «ruskaha śvietu» Andreja Hieraščanki. Heta były čynoŭnik, jaki admaŭlaŭ biełaruskaj dziaržavie ŭ isnavańni, za što byŭ zvolnieny z pracy.
«Bieśśmiarotny połk» — heta akcyja, jakaja naradziłasia ŭ hłybincy Rasii, kali ludzi stali vychodzić na 9 maja z partretami svajakoŭ, što zahinuli ŭ časy Druhoj suśvietnaj vajny. Praŭda, potym dobruju pa pasyle akcyju pierachapiła rasijskaja prapahanda. U vyniku «Bieśśmiarotny połk» pieraŭtvaryŭsia ŭ demanstracyju siły «ruskaha śvietu».
Letaś na «Bieśśmiarotny połk» u Minsku vyjšła 1500 čałaviek. Było šmat ludziej z partretami Stalina, u majkach «DNR» i «Vietlivyja ludzi». Faktyčna, heta była najbujniejšaja vuličnaja akcyja «ruskaha śvietu» za apošniaje dziesiacihodździe.
Aficyjny Minsk nie padtrymlivaje praviadzieńnie «Bieśśmiarotnaha pałka» na aficyjnym uzroŭni, jak heta jość u Małdovie ci Kyrhyzstanie. Ułady pravodziać svaju, bolš maštabnuju akcyju «Biełaruś pamiataje».
Čamu apazicyjnyja dziejačy vyrašyli padpisacca pad «Bieśśmiarotnym pałkom»? Kiraŭnik «Spraviadlivaha śvietu» Siarhiej Kalakin kaža, što jahonaja partyja pryncypova padtrymlivaje «Połk».
«My padtrymlivajem i «Bieśśmiarotny połk», i «Biełaruś pomnić», usie akcyi, pryśviečanyja pamiaci zahinułych u časy Vialikaj ajčynnaj vajny! A dzialeńnie na pravilnyja i niapravilnyja — heta ździek z pamiaci hierojaŭ vajny. Tyja, chto pomniać pra VAV, pravilna robiać, a tyja, chto robić na hetym palityku i sprabujuć padzialić na «ruski», «kitajski» i «biełaruski śviet» — heta niahodniki!
I jany prosta nie pavažajuć pamiać tych miljonaŭ ruskich, biełarusaŭ, ukraincaŭ, tataraŭ, jakija zahinuli ŭ toj Vialikaj vajnie. Na žal, biełaruskaje kiraŭnictva ŭciahnułasia ŭ hetaje varjackaje supraćpastaŭleńnie», — skazaŭ Kalakin.
A jak Kalakin stavicca da taho, što na «Bieśśmiarotny połk» prychodziać ludzi ź simvolikaj «DNR»?
«Heta ichniaja sprava, jak jany staviacca da «DNR». Važna, jak jany pamiatajuć pra achviaraŭ VAV, a nie pra «DNR». Kali tyja ludzi hinuli, była adzinaja kraina, kali vy nie pomnicie, jak jana nazyvałasia, to ja vam skažu — SSSR! Nie było tady ni Biełarusii [skazaŭ mienavita tak — «NN»], ni Ukrainy, ni Rasii, ni «ruskaha», ni «biełaruskaha śvietu», na ščaście. Kali ž my budziem iści takim šlacham, to taksama možam pryjści da Danbasa na biełaruskaj ziamli», — adznačyŭ lidar «Spraviadlivaha śvietu».
Usie padpisanty, aproč Hieorhija Razumava, źjaŭlajucca siabrami «Spraviadlivaha śvietu». Razumaŭ ža pradstaŭlaje prafsajuz REP. Što pra heta dumaje adzin ź jaho lidaraŭ Hienadź Fiadynič?
«Ź jaho słovaŭ ja vyśvietliŭ, što jon daŭ zhodu, kab tolki jahonaje proźvišča było pad zajavaj, sam jon jaje navat nie čytaŭ. My demakratyčnaja arhanizacyja, my razumiejem, što ŭ kožnaha čałavieka mohuć być svaje dumki i imknieńni.
Ale jakija «bieśśmiarotnyja pałki» mohuć być u Biełarusi? Hulajciesia ŭ hetyja hulni ŭ Rasii. Što tyčycca Razumava, to jak pryvatnaja asoba jon moža padpisacca dzie zaŭhodna, ale da REPa heta nie maje nijakaha dačynieńnia. Heta vyklučna jaho inicyjatyva, jakaja nie razhladałasia kirujučym orhanam. REP da «bieśśmiarotnych pałkoŭ» nijakaha dačynieńnia nie maje i mieć nie budzie», — zapeŭniŭ Fiadynič.
Kamientary