Ministr Karajeŭ sustreŭsia ź lidarkaj «Maci 328»

5 červienia novy ministar unutranych spraŭ Jury Karajeŭ sustreŭsia z kiraŭnicaj ruchu «Maci 328» Łarysaj Žyhar. Jana źviarnułasia da Juryja Karajeva paśla adstaŭki byłoha ministra Ihara Šunieviča, kab źviarnuć uvahu na prablemy asudžanych pa «antynarkatyčnym» artykule, piša «Radyjo Svaboda».

Pavialičyć

Što paabiacaŭ Jury Karajeŭ?

1. Pavialičyć udvaja praciahłaść doŭhaterminovaha spatkańnia dla asudžanych pa 328-m artykule.

Łarysa Žyhar patłumačyła, čamu ŭźnikła takaja prablema:

«Asudžanym pa 328 artykule dajuć tolki dva spatkańni na hod praciahłaściu ŭsiaho sutki. Ale što takoje sutki dla maładoha čałavieka, jaki tolki adarvaŭsia ad siamji? Paprasiła, kab chacia b było 2 dni, bo maksymalna možna davać 3 dni. Karajeŭ paabiacaŭ, što heta budzie pierahledžana».

2. Adnu charčovuju pieradaču z maksymalnaj vahoj u 30 kilahramaŭ padzialić na 2 pieradačy, kab u sumie zastalisia tyja ž 30 kilo.

«Ciapier dazvolenaja adna charčovaja pieradačy na hod vahoj da 30 kilahramaŭ. Ale baćkam ciažka asilić takija pieradačy, u tym liku materyjalna. Čamu nie dazvolić tyja ž 30 kilo raskłaści na 2 pieradačy ŭ hod? Ministar abiacaŭ vyvučyć hetaje pytańnie», — skazała Łarysa Žyhar.

3. Raz na hod dazvolić atrymańnie medyčnaj banderoli.

«Prasiła, kab dazvolili dasyłać viaźniam 1 medyčnuju banderol niezaležna ad taho, chvareje čałaviek ci zdarovy. Heta važna, bo tady ŭ banderol buduć układać vitaminnyja preparaty, jakich zaŭsiody nie chapaje. Z hetym Karajeŭ taksama pahadziŭsia», — skazała Łarysa Žyhar.

4. Nie ciahnuć z užyvańniem amnistyi da tych asudžanych, u kaho adbyćcio terminu zakančvajecca.

«Amnistyja budzie ŭžyvacca ciaham 7—8 miesiacaŭ paśla taho, jak zakon ustupić u siłu. Ale niekatoryja viaźni, u kaho termin padychodzić da zakančeńnia, i biez amnistyi vyjduć za hety čas na volu. Praktyka minułych amnistyj pakazvaje, što časta administracyja kalonii zaciahvaje ŭžyvańnie amnistyi takim viaźniam, i ŭ vyniku jany vyzvalajucca nibyta pa amnistyi, ale ŭsiaho za niekalki dzion da zakančeńnia pryznačanaha sudom terminu. Karajeŭ paabiacaŭ, što hetak bolš nia budzie», — kaža Łarysa Žyhar.

Na što nie pahadziŭsia Jury Karajeŭ?

Pierakvalifikavać spravy pa 4 častcy 328 artykuła na 3 častku.

«Tut my nie damovilisia. Karajeŭ skazaŭ, što pa 4 častcy pasłableńnia nia moža być. Pa jahonych słovach, uprava narkakantrolu robić maksymum, kab vyjaŭlać i karać bujnych narkadyleraŭ, a da drobnych zakładčykaŭ padychod pavodle zakonu. Skazaŭ, što pasłablać praktyku ŭžyvańnia 4 častki 328 artykuła pakul nielha i heta nie ŭ jahonaj kampetencyi».

U 4 častcy 328 artykuła Kryminalnaha kodeksu viadziecca pra adkaznaść za raspaŭsiud narkotykaŭ u składzie arhanizavanaj złačynnaj hrupy. Za heta praduhledžana pazbaŭleńnie voli na termin da 15 hadoŭ. Aktyvistki «Maci 328» damahajucca pierahladu spraŭ asudžanych pa 4 častcy 328 artykuła i ŭ šerahu vypadkaŭ pierakvalifikacyi ich dziejańniaŭ na 3 častku taho ž artykuła.

• 0
• 0
• 0
• 0
• 0
• 0
• 0
• 0