Makiej anansavaŭ chutki «narmalny paŭnavartasny vizit Alaksandra Łukašenki ŭ Jeŭrasajuz»
U hetym hodzie adbudziecca «narmalny paŭnavartasny vizit Alaksandra Łukašenki ŭ Jeŭrasajuz», zajaviŭ ministr zamiežnych spraŭ Uładzimir Makiej žurnalistam paśla adkryćcia forumu «Minski dyjałoh», piša Tut.by.
Adkazvajučy na pytańnie žurnalistaŭ, kali Alaksandr Łukašenka naviedaje Jeŭrasajuz, Uładzimir Makiej zajaviŭ, što ŭ bližejšy čas usie pra heta daviedajucca.
— Pryjdzie čas i źjeździć. Praź niekatory čas vy daviedajeciesia pra heta.
— U najbližejšy čas adbudziecca vizit Alaksandra Łukašenki ŭ Jeŭrasajuz? — udakładnili žurnalisty.
— Praź niekatory čas. Ja spadziajusia, u hetym hodzie my ździejśnim narmalny, paŭnavartasny vizit, u tym liku na prastoru Jeŭrapiejskaha sajuza, — skazaŭ Makiej.
Kiraŭnik MZS znoŭ paŭtaryŭ toje, što aficyjny Minsk kazaŭ nie raz: vizit nie pavinien być dziela vizitu.
— Vizit moža być ździejśnieny, i heta naš pryncypovy padychod, kali my čakajem kankretnych važnych vynikaŭ ad hetaha vizitu ŭ płanie ekanamičnaha, humanitarnaha i inšaha supracoŭnictva. Tamu vizit dziela vizitu — nie samameta, my pavinny rychtavać vizit, kab atrymać kankretnyja vyniki dla Biełarusi i krainy-partniora.
Na ŭdakładniajučaje pytańnie žurnalistaŭ, ci źviazany vizit Alaksandra Łukašenki ŭ ES z padpisańniem pahadnieńnia ab spraščeńni vizavaha režymu, kiraŭnik MZS pa-fiłasofsku adznačyŭ, što «ŭsio ŭ śviecie ŭzajemaźviazana».
Kamientary