Ad $475 da $3000 za numar. Jak vyhladaje pieršy luksavy hatel Biełarusi FOTY
Infarmacyja pra šmatfunkcyjanalny kompleks na vulicy Janki Kupały, 27 trymałasia ŭ sakrecie ŭsie hady budaŭnictva. Na hety momant budynak Waldorf Astoria Minsk i terytoryja vakoł jaho całkam hatovyja, u numary pačali zajazdžać hości. Onlíner pabyvaŭ unutry pieršaha luksavaha hatela. Pieranačavać u im kaštuje ad $475 da $3000.
Terytoryja i architektura
Zaraz užo ź ciažkaściu ŭspaminajecca, jak vyhladała terytoryja kala Śvisłačy raniej. Tut doŭhi čas pracavała 2‑ia haradskaja kliničnaja balnica i «Biełekspa». Častku karpusoŭ balnicy ŭzdoŭž vulicy Bahdanoviča rekanstrujavali — ciapier tam haścinica i restaran. A na miescy vystavačnaha kompleksu vyras strohi manumientalny budynak hatela sa šklanoj kanstrukcyjaj, jakaja navisaje nad rakoj.
Usie hetyja pieraŭtvareńni stali mahčymymi praź inviestara z Abu-Dabi — kampanii Kopaonik Property Investment («KPI Deviełapmient» u Biełarusi). Placoŭku joj pieradali ŭ 2016 hodzie, adnak aktyŭnyja budaŭničyja raboty tut zakipieli tolki ŭ 2019‑m i doŭžylisia cełych 6 hadoŭ. Čamu ž praces zaciahnuŭsia? Na hetaje pytańnie Onlíner adkazaŭ hienieralny mieniedžar hatela Saciryjas Ekanamu, jaki pryjechaŭ u Biełaruś ź Ijerusalima:
— Hatel maje płošču 47 000 kv. m, abjadnoŭvaje ŭ sabie numarny fond ź vialikimi prastorami, restaranami, balnaj załaj, a taksama paŭnavartasnym spa– i wellness-kompleksam, jaki padtrymlivaje vysokatechnałahičnuju inžyniernuju infrastrukturu. Takaja składanaść značna pieraŭzychodzić ramki tradycyjnaha haściničnaha prajekta i patrabuje pašyranych terminaŭ dla architekturnaj kaardynacyi, pieradavoha inžyniernaha prajektavańnia, budaŭnictva i ŭvažlivaha teściravańnia.
Prajektavała hatel architekturnaja studyja ź Vialikabrytanii Epstein, a taksama biuro rodam ź Biełarusi «Varabjoŭ i partniory». Cikava, što budynak, jaki atrymaŭsia ŭ vyniku, amal nie adroźnivajecca ad renderaŭ — nieakłasika, piasočnyja adcieńni, kałony. Praz reljef kolkaść pavierchaŭ u budynka mianiajecca: z adnaho boku možna naličyć 5 pavierchaŭ, z druhoha — 7. Centralny ŭvachod znachodzicca z boku vulicy Janki Kupały.
Kala Alei Družby raźbity park z draŭlanymi łaŭkami i tujami. A spuścicca da Śvisłačy možna pa stupieńkach. U budučyni ŭ kamiercyjnych pamiaškańniach na pieršym paviersie adkryjucca kramy luksavych brendaŭ hadzińnikaŭ, upryhožańniaŭ, adzieńnia.
Nadpisy Waldorf Astoria prahladajucca adusiul. Nahadajem, što pad brendam Hilton pracujuć sotni haścinic roznych katehoryj.
Dyk voś, Waldorf Astoria Hotels & Resorts — heta samy raskošny piacizorkavy brend, litaralna viaršynia ŭsiaho łancužka ŭ suśviecie Hilton.
Minsk staŭ 37‑m pa liku horadam u śviecie, dzie adkryŭsia taki hatel. Zakazčyk trymaje ŭ sakrecie košt budaŭnictva, ale ŭ internecie fihuruje suma kala $250 miljonaŭ. Satyryjas hety fakt nie prakamientavaŭ, ale namiaknuŭ, što heta adzin z samych darahich prajektaŭ stalicy.
Załaty choł i lehiendarnyja hadzińniki
Na sajcie hatel prezientujuć jak ikonu raskošy. Zołata, aksamit, bardovyja i izumrudnyja adcieńni, dreva i marmur — usio źziaje.
Bar kala resepšena nazyvajecca Peacock («Paŭlin»). Jon tradycyjna jość u kožnym Waldorf Astoria i maje svaju lehiendu. Uiljam Uołdarf Astor i Džon Džiejkab Astor — heta kankurentnyja stryječnyja braty, jakija ŭ kancy XIX stahodździ pabudavali ŭ Ńju-Jorku hateli pad nazovami Waldorf i Astoria. Praź niekatory čas stryječnyja braty pamirylisia, i budynki byli złučanyja z dapamohaj doŭhaha marmurovaha kalidora, viadomaha jak Peacock Alley — «Paŭlinaja aleja». Nibyta hości chadzili pa hetaj alei i zanadta važničali. Adsiul i nazva bara.
Samy znakavy elemient u łobi — instalacyja z hadzińnikam vyšynioj 9,5 mietra ŭ centry atryuma. U kožnym hateli sietki jość svaje vialikija hadzińniki — heta danina historyi. Kažuć, minskaja interpretacyja atrymałasia samaj vysokaj. U jaje raspracoŭcy ŭdzielničali niekalki krain: dyzajn z Anhlii, miechanizm z Hiermanii, asnova ź Italii, a dekor — ź Biełarusi (łancuhi simvalizujuć mastactva placieńnia z sałomy).
Fiška hatela — paŭsiudna stajać pradmiety mastactva, stvoranyja miascovymi majstrami. Pieraharodki ŭ chole ŭpryhožany pałatnom z nacyjanalnym arnamientam, na palicach — biełaruskija knihi.
Numary ź vidam na Śvisłač i Niamihu
Usiaho ŭ hateli 155 numaroŭ. Pieranačavać tut kaštuje ad $475 da $3000 pa kursie.
Deluxe Room (kala $500). Płošča 41 mietr. Numar abstalavany sistemaj «razumny dom». Vannyja pakoi azdobleny marmuram i drevam, u kožnaj — pa dźvie rakaviny. Kaśmietyka — brytanskaha brenda Molton Brown.
Diplomat Suite (ad $900). Płošča 82 «kvadraty». Tut jość spalnia, haścioŭnia z kuchniaj, harderobnaja i vialiki bałkon z panaramnym vidam na centr horada.
Presidential Suite (ad $3000). Zajmaje treć piataha paviercha (282 kv. m). Try spalni, rabočy kabiniet, vielizarnaja terasa. U majstar-spalni staić łožak super king size.
U hateli pracuje 180 čałaviek, siarod jakich jak biełarusy, tak i zamiežniki.
Samaja pryvatnaja zona — spa
Ahulnaja płošča spa — 3000 kv. m. Tut raźmiaścilisia 8 pracedurnych kabinietaŭ, saŭna, chamam, salany pakoj, basiejn, džakuzi i ledziany fantan.
Naviedvać akvazonu mohuć tolki pastajalcy hatela (biaspłatna). Dla astatnich jość adna mahčymaść — kupla śpiecyjalnaj spa-prahramy (masaž, abhortvańnie abo rytuały ź biełaruskim vasilkom). Pryvatnaść haściej zastajecca pryjarytetam, tamu biaskoncaha patoku ludziej z vulicy tut nie čakajuć.
Bary i restarany
Mramor: Restaran-stejkchaus premium-kłasa ŭ šklanaj prybudovie nad rakoj. Adkryćcio zapłanavana na studzień 2026 hoda.
Nightingale: Śpikizi-bar z kaktejlami i žyvoj muzykaj (adkryćcio ŭ červieni 2026 hoda).
Zolo: Adziny restaran, jaki zaraz pracuje paŭnavartasna. Śpiecyjalizujecca na śniadankach, abiedach i viačerach. Siudy moža pryjści luby žadajučy na śniadanak (z 6:30 da 10:30).
Grand Astoria Ballroom i kanfierenc-zały
U hateli jość vialikaja balnaja zała Grand Astoria Ballroom na 480 haściej dla viasiellaŭ i ŭračystaściaŭ. Taksama majucca inšyja zały dla kanfierencyj i biznes-sustreč.
Waldorf Astoria ŭ Minsku pačaŭ prymać haściej z 18 śniežnia. Uładalniki płanujuć, što ŭ nastupnym hodzie zapaŭnialnaść budzie kala 26%, bo luksavy adpačynak dastupny nie mnohim.
Kamientary
Pieršymi uvachodzili u byłuju saŭdepiju chiłtany šmiłtany roznyja araby.Na toj čas kazali samy chutki biźnis dzie paviartajecca układzienaje i..zrazumieła admyvajecca.
5☆ hatel navat ŭ 50% zasialeńnie daje prybytak
Bolej 80% heta pieriezahruženna