Valancin Stefanovič staŭ vice-prezidentam Mižnarodnaj fiederacyi za pravy čałavieka
Na 40 suśvietnym kanhresie Mižnarodnaj fiederacyi za pravy čałavieka, jaki prachodzić u hetyja dni na Tajvani, adbylisia vybary kiraŭnictva hetaj aŭtarytetnaj pravaabarončaj arhanizacyi. Prezidentam na nastupnyja try hady abranaja advakatka z Batsvany Elis Mahve, jakaja da hetaha była Hienieralnym sakratarom FIDH.
Taksama byli abranyja 15 vice-prezidentaŭ pa rehijonach. Pry hałasavańni za vice-prezidentaŭ pa rehijonie Jeŭropy i Centralnaj Azii abranyja try pradstaŭniki: Artak Kirakasian (Armienija), Talekan Ismaiłava (Kyrhystan) i Valancin Stefanovič (Biełaruś, Pravaabarončy centr «Viasna»).
Pravaabaronca «Viasny» Valancin Stefanovič ličyć, što takoje rašeńnie budzie spryjać tamu, kab hołas pravaabarončaj supolnaści Biełarusi macniej zahučaŭ na mižnarodnaj arenie.
«Dla nas, dla «Viasny», nadzvyčaj važna siabroŭstva ŭ FIDH, bo my dziejničajem razam u šmat jakich nakirunkach. Heta dapamahaje pravodzić mižnarodnuju advakacyju i daje bolš mahčymaściaŭ kazać pra situacyju z pravami čałavieka ŭ Biełarusi na mižnarodnym uzroŭni. Darečy, my vielmi ščylna supracoŭničajem u pytańni śmiarotnaha pakarańnia. Upeŭnieny, što dośvied Fiederacyi i siabroŭstva ŭ joj i nadalej buduć dapamahać nam prasoŭvać idei pravoŭ čałavieka ŭ Biełarusi», — skazaŭ jon.
Pravaabarončy centr «Viasna» — siabra Mižnarodnaj fiederacyi za pravy čałavieka ŭžo 15 hadoŭ. Staršynia arhanizacyi Aleś Bialacki trojčy zajmaŭ pasadu vice-prezidenta pa rehijonie Jeŭropy i Centralnaj Azii.
Kamientary