Archieołah z Akademii navuk: Sa mnoj nie praciahnuli kantrakt. Kiraŭnictva: Prosta supracoŭnica vyjšła z dekretu

«Instytut faktyčna maje manapoliju na ŭsie achoŭnyja raskopki. Kali budujecca što-niebudź, pavinien być nahlad abo raskopki. Časam jany pravodziacca nieprafiesijna. Była historyja z Hrodna, na vulicy Vialikaja Trajeckaja, pra jakuju ja ŭ fejsbuku pisaŭ, što mnie soramna za tyja daśledavańni kaleh — tam ziamla pahruzčykam hruziłasia na mašyny i vyvoziłasia. Za što mianie vyklikali «na dyvan» i adpravili tudy. Plus ja taki čałaviek, što mahu admović i nie chadzić na zadnich łapkach.

Jašče asabistyja znosiny ź niekatorymi ludźmi z administracyi, miakka kažučy, nie vielmi skłalisia. Usio pryviało da zvalnieńnia.

Mnie było prapanavana pierajści ŭ inšy adździeł, rabić rejestr artefaktaŭ i pomnikaŭ, jaki pavinien być pa Kodeksie ab kultury. Ale faktyčna tady ja b nie zmoh zajmacca svajoj temaj, palealitam, pa jakoj u nas z kalehami jość dobryja vyniki, možna skazać jeŭrapiejskaha maštabu. Ja admoviŭsia, i ŭ vyniku mnie nie padpisali kantrakt. Choć maje pakazčyki ŭ paraŭnańni ź inšymi supracoŭnikami nie horšyja».

Archieołah piša, što za hod pryniaŭ udzieł u daśledavańniach u Pietrykavie, na haradziščy Občyn, fartecyi Žabier, učastkach Śniadzin-2, Asaviec-2. Jeździŭ taksama ŭ Rasiju ŭ Kaścionkaŭskuju archieałahičnuju ekśpiedycyju.

«Ja pačaŭ i ŭłasnyja daśledavańni. Pravioŭ raźviedki na terytoryi Hrodzienskaha, Kleckaha, Hancavickaha rajonaŭ. Dla niekatorych pomnikaŭ u Hrodzienskim i Hancavickim rajonach rabiŭ zony achovy. Ale samaje hałoŭnaje dla mianie — heta praviadzieńnie ŭłasnych pieršych raskopak na Kavalcach-1».

Aleś Harškoŭ dadaje, što archieołahaŭ u Biełarusi ŭvohule niašmat.

«Ź instytuta syšli try maładyja supracoŭniki, u nastupnym miesiacy jašče adzin sychodzić, a aśpirantaŭ prybyvaje niašmat. Palealitam zaraz u instytucie zajmajucca dva čałavieki: daśledčyca, jakoj 80 hadoŭ budzie, i kaleha, jaki, praŭda, piša dysiertacyju pa miezalicie».

U Akademii navuk raskazvajuć svaju viersiju padziej.

«Alaksandr vučycca ŭ nas u mahistratury ŭ Instytucie padrychtoŭki navukovych kadraŭ. Jon pastupiŭ tudy, i potym jaho ŭziali da nas na pracu na pałovu staŭki, kab, mahčyma, finansava niejak padtrymać. Choć u nas takoj praktyki niama, kab brać čałavieka, jaki nie skončyŭ mahistraturu (akramia jak łabarantam) — zvyčajna ŭ Akademiju navuk paśla aśpirantury prychodziać, — kamientuje zahadčyk adździeła archieałohii pieršabytnaha hramadstva Instytuta historyi Stanisłaŭ Jurecki. —

Chaču skazać, što ŭ jaho ŭžo była sproba zvolnicca. U žniŭni jon pisaŭ zajavu. Potym pieradumaŭ. Pryčynaj niezdavolenaści Alaksandra było toje, što jon chacieŭ pajechać u kamandziroŭku za miažu na bolšy termin, čym my prapanoŭvali. A ŭ nas byŭ haračy siezon — treba było tut pracavać.

Ciapier u nas u instytucie jość nieabchodnaść aktyvizacyi fondavaj pracy — sistematyzacyja i ŭlik znachodak. I kali Alaksandr napisaŭ zajavu na praciahnieńnie kantraktu, ja jamu prapanoŭvaŭ: my nie suprać, kab vy pracavali, tolki ŭ inšym adździele — zachavańnia i vykarystańnia archieałahičnaj spadčyny. Tym bolš u jaho jość vopyt pracy z fondami, bo jon były rabotnik Hrodzienskaha dziaržaŭnaha historyka-archieałahičnaha muzieja.

Alaksandr nie zachacieŭ: «Nie, mianie heta nie zadavalniaje, heta budzie adciahvać uvahu ad mahistarskaj pracy». Ja jamu kazaŭ: idzicie padumajcie. Jaho hranty za im by zachoŭvalisia, pajezdki na raskopki taksama — ja ŭ tym adździele pracavaŭ i jeździŭ na raskopki».

Čamu Harškova nie mahli pakinuć na papiarednim miescy? Namieśnik dyrektara Instytuta historyi Vadzim Łakiza tłumačyć, što Akademija navuk — heta biudžetnaja arhanizacyja, jakaja zaležyć ad vydzielenaha finansavańnia. Letaś mahistranta ŭziali tudy, dzie było miesca i patreba. Ciapier vyjšła z dekreta supracoŭnica adździeła, a nieabchodnaść u rabočych rukach źjaviłasia ŭ inšym kirunku.

• 0
• 0
• 0
• 0
• 0
• 0
• 0
• 0