U paniadziełak ranicaj studenty Minskaha inavacyjnaha ŭniviersiteta vyjšli na zabastoŭku. Pryčyna pratestu — žadańnie adstajać svaju VNU, jakoj nie praciahnuli akredytacyju pa niekatorych śpiecyjalnaściach. U vyniku, pa słovach rektara Mikałaja Sušy, 1600 chłopcaŭ i dziaŭčat mohuć zastacca biez dypłomaŭ, piša Tut.by.
Zabastoŭka pačałasia ŭ 9.30. Miesca zboru — druhi pavierch hałoŭnaha korpusa ŭniviersiteta. Za 15 chvilin da pačatku tut užo sabrałasia čałaviek 200. Studenty pavoli padychodziać. U niekatorych u rukach płakaty. «My zasłužyli dypłomy», «Nie inšym VNU» napisana na vatmanach.
— Ministr skazaŭ, kab my nie chvalavalisia, nas pieraviaduć u inšyja VNU, ale chiba dla vypusknikoŭ heta vyjście? — zadajecca pytańniem Luboŭ Karziuk, studentka 4 kursa, jakaja ŭ hetym hodzie zakančvaje ŭniviersitet pa śpiecyjalnaści «pravaznaŭstva». — My patelefanavali ŭ MITSO, tam skazali, što akademičnaja roźnica, jakuju mnie, naprykład, pryjdziecca zdavać — heta kala 30 pradmietaŭ. Zaraz listapad, u červieni ja pavinna atrymać dypłom, da hetaha prajści pieraddypłomnuju praktyku. Kali mnie ŭsio heta paśpieć?
Usiaho akredytacyju VNU nie praciahnuli pa piaci śpiecyjalnaściach — «pravaznaŭstva», «Ekanomika i kiravańnie na pradpryjemstvie», «Prahramnaje zabieśpiačeńnie infarmacyjnych technałohij», «Transpartnaja łahistyka» i «Psichałohija». Na ich, pa dadzienych VNU, vučycca za 1600 studentaŭ. U VNU, raniej tłumačyŭ rektar Mikałaj Suša, biesterminovaja licenzija, tamu studenty mohuć praciahnuć vučycca. Ale, kali situacyja nie vyrašycca, vypusknikam nie zmohuć vydać dypłom dziaržuzoru.
Pa słovach Fiodara Bahdanava, aktyvista i starasty adnoj z hrup, druhi pavierch hałoŭnaha korpusa źmiaściŭ nie ŭsich niazhodnych. Častka studentaŭ raźmiaściłasia na inšych pavierchach i ŭ inšym korpusie.
Nahadajem, jak patłumačyŭ Mikałaj Suša, raz u piać hadoŭ usie navučalnyja ŭstanovy krainy prachodziać akredytacyju. Za 28 hadoŭ svajho isnavańnia MIU prachodziŭ mnostva akredytacyi i atestacyj, i zaŭsiody ŭsio było dobra. Što zdaryłasia hetym razam, Mikałaj Suša nie viedaje. Pavodle jaho słoŭ, u pačatku listapada ŭniviersitet atrymaŭ list z Departamienta kantrolu jakaści adukacyi. U dakumiencie napisana, što navučalnaj ustanovie nie praciahvajuć akredytacyju pa piaci śpiecyjalnaściach. Rektar upeŭnieny: usie parušeńni, jakija byli vyjaŭleny padčas pravierki, ci niahrubyja, ci vypraŭnyja. Kiraŭnictva MIU budzie abskardžvać rašeńnie kamisii. Abaraniać svoj univiersitet hatovyja i studenty: na minułym tydni jany paviedamili, što źbirajucca strajkavać.
Situacyju prakamientavaŭ i ministr adukacyi Ihar Karpienka. Jon padkreśliŭ, što studentam nie varta chvalavacca. U adpaviednaści z zakanadaŭstvam pa rašeńni Ministerstva adukacyi jany zmohuć praciahnuć adukacyju ŭ inšych VNU pa svaich śpiecyjalnaściach z nastupnaj vydačaj dypłoma dziaržaŭnaha ŭzoru. Kiraŭnictvu MIU ministr parekamiendavaŭ «pahłybicca ŭ sutnaść rekamiendacyj kamisii, likvidavać vyjaŭlenyja niedachopy i arhanizavać adukacyjny praces u adpaviednaści z normami zakanadaŭstva».
Kamientary