U telehramie źjaviŭsia kanał, u jakim pišuć paskudstvy pra infarmataraŭ Niechta. Jak ich identyfikujuć?
U samaha bujnoha biełaruskaha błohiera Ściapana Puciły, bolš viadomaha jak Niechta, amal 180 tysiač padpisčykaŭ u telehramie, jašče 300 tysiač — na jutubie. Papularnaść Puciły nie daje spakoju niekatorym «zyčliŭcam».
U telehramie źjaviŭsia ananimny kanał, jaki zajmajecca «vykryćciom» infarmataraŭ Ściapana Puciły. Adras kanała adroźnivajecca ad sapraŭdnaha puciłaŭskaha tolki adnoj litaraj, na avatarcy — fota Ściopy.
Pieryjadyčna ŭ kanale psieŭdaNiechty źjaŭlajucca dopisy z fatahrafijami i spasyłkami na staronki ludziej, jakija nibyta adpraŭlajuć infarmacyju ŭ kanał Puciły. Pry hetym ananim jašče i rassyłaje listy na pracu svaich achviar (kali moža znajści). Kali nie moža — prosta dasyłaje mejł u harvykankam z tekstam «U vašym horadzie žyvie infarmatar kanała Niechta».
«Naša Niva» źviazałasia ź niekatorymi hierojami publikacyj fejkavaha Niechty.
Va ŭsich situacyja amal adnolkavaja. Čałavieku va «Ukantakcie» prychodzić paviedamleńnie sa spasyłkaj na fejkavy kanał, u jakim užo raźmieščanaja infarmacyja pra «achviaru». Aŭtar paviedamleńnia pry hetym ukazany jak «Stiepan Nieksta».
Voś niekalki prykładaŭ.
«Ja pracavaŭ fielčaram u kałhasie «Chvinievičy» na Hrodzienščynie i skinuŭ infu pra prablemy Ściapanu ŭ kanał. Pry hetym ja sam paprasiŭ, kab majo imia było ahučanaje. Ja nie bajaŭsia nastupstvaŭ, u pieršuju čarhu chacieŭ, kab prablema vyrašyłasia. Ściapan tak i zrabiŭ, napisaŭ majo imia i proźvišča. A paźniej užo toj trol, napeŭna, znajšoŭ mianie ŭ sacsietkach», — raskazaŭ «Našaj Nivie» Jakaŭ Antanovič.
Jakaŭ atrymaŭ i paviedamleńnie va «Ukantakcie».
Ci pryjšoŭ mejł u kałhas, jon nie viedaje — kaža, nieŭzabavie i sam zvolniŭsia z pracy. Ale, pa słovach Jakava, jon i pa siońnia ŭdziačny kanału Niechta.
«Ciapier fiermu nie paznać. Znajomyja kazali, što zrabili ramont. Raniej usia padłoha była ŭ jamach, jakich navat nie było bačna — bo ŭsio było zalita haŭnom. Sapraŭdnym haŭnom. Ludzi nie bačyli jamy, spatykalisia, padali. Ciapier ža ŭsio prybrana, — kaža Antanovič. — I tolki paśla publikacyi Ściapana pačalisia pravierki, ja jamu vielmi ŭdziačny. Jon faktyčna vyratavaŭ hetuju haspadarku, ja tak liču».
Minčanka Kryścina Bryleŭskaja taksama nie chavała svaje dadzienyja.
«Ja paskardziłasia, što majho muža ź siabram ni za što zabrała milicyja kala doma. Usio było na maich vačach. Milicyjanty zabrali muža i siabra, bo jany nibyta pili ałkahol, ale ałkaholu ŭ nas nie było, — uzhadvaje Kryścina. —
Ja napisała pra heta ŭ svaim instahramie, adznačyła Ściapana Niechtu. Jon adhuknuŭsia, paprasiŭ napisać jamu ŭ paviedamleńni padrabiaźniej. Plus — pierapościŭ storyz z majho instahrama. U maim instahramie spasyłka na moj Ukantakcie, adšukać mianie było nie składana. Usie maje staronki adkrytyja.
Paśla infarmacyja pra vypadak z maim mužam źjaviłasia ŭ kanale Niechta. I zatym užo źjaviŭsia post pra mianie ŭ fejkavym kanale. Usio, što tam napisana pra mianie, niapraŭda, darečy».
Kryścina kaža, što joj taksama pryjšło paviedamleńnie va Ukantakcie ad psieŭdaŚciapana.
Ci byŭ mejł načalstvu, jana nie viedaje, bo tady ŭžo źmianiła miesca pracy.
«U mianie pytalisia znajomyja, ci źbirajusia ja iści ŭ milicyju, pisać zajavu na hetaha fejkavaha Niechtu. Ale ja nie pajšła», — kaža Kryścina.
Zatoje ŭ milicyju pajšoŭ Uładzisłaŭ Siarhiejeŭ — inšy čałaviek, čyje dadzienyja apubličyŭ psieŭdakanał.
«Ja adpracoŭvaŭ paśla ŭniviera ŭ adnym miescy. Płacili kapiejki. I ŭ ahulnym čacie na 250 čałaviek ja ź siabrami abmiarkoŭvaŭ, maŭlaŭ, prykolna było b pra heta napisać u kanał Ściapana.
Ale ž u vyniku ja pabajaŭsia zvalnieńnia i ŭsio ž nie staŭ skidvać infarmacyju Niechta, — raskazvaje Siarhiejeŭ. — A zatym na maju druhuju pracu pryjšoŭ list. Tak, toj samy — «u vas pracuje infarmatar kanała».
Načalstva akazałasia adekvatnym. Mianie vyklikali, pahavaryli, skazali: my razumiejem, što vy takim nie zajmajeciesia. Paraili pajści ŭ milicyju. Ja tak i zrabiŭ. U milicyi skazali: nu vy ž razumiejecie, što heta visiak.
U vyniku, pošuk vinavatych nie skončyŭsia ničym, kaniečnie».
Vyhladaje, što infarmacyja dla danosaŭ čaściej za ŭsio biarecca z adkrytych krynic. Amal usie deananimizavanyja ci sami nie chavali svaje asoby, ci niedzie ahučyli płany skinuć infarmacyju Ściapanu Puciłu.
Pra adnaho ź ich spačatku uvohule napisała «Naša Niva», i tolki praz paru tydniaŭ u kanale psieŭdaNiechty źjaviŭsia dopis z «vykryćciom infarmatara».
Pryčym, achviary — šarahovyja supracoŭniki pradpryjemstvaŭ ci navučalnych ustanoŭ, zvyčajnyja studenty. U kanale niama vykrytych siłavikoŭ ci vysokapastaŭlenych čynoŭnikaŭ.
Časam achviarami stanoviacca błohiery. Tak, naprykład, u «infarmatary» byŭ zapisany Siarhiej Cichanoŭski, aŭtar błoha «Kraina dla žyćcia», a taksama administratar nieaficyjnaj staronki biełaruskaj čyhunki va Ukantakcie Valancin Samasiuk.
«Ja nijakich kantaktaŭ ź Niechta nikoli nie mieŭ. Čałaviek, jaki publikuje hetyja fota «infarmataraŭ», ci vybraŭ mianie vypadkova, ci, moža, tamu, što ja administratar supołki pra čyhunku, — miarkuje Samasiuk. — A što tyčycca Niechty, to chiba byŭ tolki taki momant: ja niedzie ŭ kamientach admaŭlaŭ svaju datyčnaść da jaho kanała. Moža, uvahu pryciahnuła heta».
Nie zaŭsiody «deananimizacyja» skančvajecca cicha i biez nastupstvaŭ.
Adzin z surazmoŭcaŭ, jaki pažadaŭ zastacca ananimnym, paviedamiŭ, što sapraŭdy skinuŭ infarmacyju Ściapanu Pucile. Zrabiŭ heta praz telehram, dasłaŭ pryvatnaje paviedamleńnie. Svajo imia nidzie i nijak nie śviaciŭ.
Heta było ŭletku. A ŭ kancy vieraśnia infarmacyja ź imieniem, proźviščam i fotazdymkami mužčyny źjaviłasia na kanale psieŭdaNiechty. Tam ža była i rekamiendacyja źviarnuć uvahu na adzin ź videarolikaŭ sa staronki «achviary», maŭlaŭ, heta porna.
Nieŭzabavie mužčynu vyklikała na razmovu milicyja. Pryčynaj staŭ toj samy rolik, jaki, pa słovach surazmoŭcy, byŭ dadadzieny na staronku vielmi daŭno, nakiravany ŭvohule suprać porna, ale sapraŭdy maje «pikantny momant».
«Paśla była hutarka sa śledčym — jon skazaŭ, što zavodzić kryminalnuju spravu nie choča, ale, maŭlaŭ, vyrašaje nie jon. Skazali čakać. Voś, čakaju. Čym skončycca, nie viedaju», — kaža mužčyna.
«Naša Niva» źviarnułasia ŭ Ministerstva ŭnutranych spraŭ — ci sapraŭdy telehram nie nastolki abaronieny, jak ličycca? I što rabić, kali jość padazreńnie, što chtości niepažadany čytaje ci pierachoplivaje vašyja paviedamleńni?
«Pierapiska ŭ telehramie moža prahladacca treciaj asobaj, takaja vierahodnaść jość. Isnujuć navat admysłovyja prahramy dla hetaha.
U vypadku, kali vy padazrajacie, što vašuju pierapisku čytajuć, źviartajciesia ŭ pravaachoŭnyja orhany. Čałavieka, jaki pierachoplivaje čužuju pierapisku, budzie čakać adkaznaść pa artykule 352 Kryminalnaha kodeksa: «Niezakonnaje zavałodańnie kampjutarnaj infarmacyjaj». Pakarańnie — štraf, abmiežavańnie voli ci navat pazbaŭleńnie voli na termin da 2 hadoŭ», — adkazali ŭ pres-słužbie viedamstva.
P.S. Kamu naležyć kanał psieŭdaNiechta, nieviadoma. Ale pakul materyjał «Našaj Nivy» rychtavaŭsia da publikacyi, u kanale psieŭdaNiechta źjaviŭsia pieršy dopis nie z «vykryćciom», a z rekłamaj čyjhości kantentu. Kanał prarekłamavaŭ videarolik, stvorany sajtam prarasijskich aktyvistaŭ «Teleskop».
Kamientary