Rektar MIU Suša adkazvaje na abvinavačańni: Ministr Karpienka choča zabić niedziaržaŭnuju adukacyju

Rektar Minskaha inavacyjnaha ŭniviersiteta Mikałaj Suša prakamientavaŭ «Našaj Nivie» pretenzii, vykazanyja kiraŭnictvam Ministerstva adukacyi.

Pavialičyć

Mikałaj Suša. Fota Dźmitryja Bruško, TUT.baj

Čytajcie: Minadukacyi nazvała sapraŭdnyja pretenzii da MIU i vinavacić rektara Sušu ŭ prafanacyi

«Naša Niva»: Što adkažacie na pretenzii Minadukacyi da dystancyjnaj formy vučoby?

Mikałaj Suša: Dystancyjnaja forma navučańnia nie maje dačynieńnia da akredytacyi, jakuju my zamovili. Čamu? Usio heta rehulujecca pastanovaj Saŭmina №820. Kamisija sama adbiraje studentaŭ, jakich choča pravieryć, prahramu pravierki da jaje pačatku davodziać nam. I jany daviali, što chacieli — toje pravieryli.

I tut užo ciaham pravierki jany dasłali zahad načalnika Departamienta kantrolu jakaści viedaŭ Michaiła Mirončyka ab tym, što treba pradstavić jašče i studentaŭ dystancyjnaj formy. Ale heta niezakonna! Pravierka idzie piać dzion, praciahnuli jašče na čatyry, ale ja za hety čas nie źbiaru takich studentaŭ, bo niechta ź ich za miažoj, niechta ŭ Rasii, niechta ŭ adpačynku i hetak dalej.

Zrešty, mnie navat nie pakazali zaklučeńnie siabroŭ kamisii! Usiaho było 22 praviarajučych, ź ich siamiora pieradali mnie svaje zaklučeńni, u jakich napisana «akredytavać», inšych mnie nie pakazali, chacia zaŭsiody pakazvajuć. Ja liču, što departamient vykanaŭ zamovu ministra. Pakolki jany nie chočuć mnie ich pakazać, ja padaŭ apielacyju. Prašu pradstavić zaklučeńni, na padstavie jakich nie praciahnuli akredytacyju. 

«NN»: Što za historyja z adukacyjaj u turmach? 

MS: Karpienka mnie zabaraniŭ! Mnie heta było niavyhadna. Ja ŭziaŭsia za prajekt nie dla atrymańnia prybytku, a kab udzielničać u sacyjalnym prajekcie, jaki raspracoŭvali Jeŭrasajuz z MUS. Da mianie źviarnulisia MUS i adukacyjnyja struktury ES. Častku kampjutaraŭ kuplali jany, niešta ja. 

«NN»: Za hetuju adukacyju płacili?

MS: Płacili baćki asudžanych. Ale nam było niavyhadna: heta treba vazić vykładčykaŭ na kamisii. Aŭtobusy, kamandziroŭki…

«NN»: Pačakajcie. Čałaviek vučycca piać hod, za kožny płacić pa $600, a kamisija pryjazdžaje da jaho adzin raz na vypuskny ekzamien. Dzie tut vašyja zvyšstraty? 

MS: Jany atrymlivali adukacyjnuju pasłuhu — sam navučalny praces. Dystancyjnaja adukacyja pa zatratnaści amal jak dzionnaje navučańnie, jana našmat bolš zatratnaja za zavočnuju formu: tam raz na siemiestr pryjazdžaje čałaviek na siesiju i ŭsio. Vykładčyk nie pracuje. A tut vykładčyk pracuje šeść dzion na tydzień!

«NN»: Jak jon pracuje? 

MS: Anłajn! Zadańnie vydaje! U kožnaha studenta jość svoj łahin dla ŭvachodu, dajuć materyjał, kansultacyi, praktykumy… Usio vyčytvajecca anłajn.

«NN»: My pahavaryli sa studentami, jany kažuć, što lekcyi padajucca ŭ tekstavym varyjancie. Možna padumać, što kapijujucca ad kursa da kursa. Teksty prachodziać na kampjutarach z domu. Pry hetym uvohule ŭ internecie možna apłacić pasłuhu, i ŭsie testy projduć za ciabie. Čamu vy za 8 hod nie zakryli sajt, jaki prapanuje vučycca za studentaŭ?

MS: Ja adličvaju studentaŭ, kali jany ničoha nie robiać! A što za sajt? Nie viedaju takoha sajta, dačynieńnia da jaho nie maju, upieršyniu čuju…

Sprava ŭ tym, što my nie kantrolujem, chto tam ź inšaha boku, my prapanujem viedy, heta naš pradukt! My bačym, kali ŭvachodziŭ student, što rabiŭ, kolki vykładčyk ź im pracavaŭ.

Tak, na inšym kancy moža być nie student, ale my vydajem jakasny adukacyjny pradukt.

Što jon ź im robić? Zapłaciŭ hrošy i niechta vykonvaje?

Na zdaroŭje, ale dypłom jon nie atrymaje. Kab zdać vypuskny dziaržaŭny ekzamien, jon u lubym razie pavinien pryjechać va ŭniviersitet i zdać pierad kamisijaj. Kali niama viedaŭ, to nie zdaść. 

«NN»: Dyk jak tady ŭsio ž zaśviedčyć viedy tych studentaŭ? 

MS: A my sami praviarajem! Na kampjutarach. Usio bačna: kali jon zachodziŭ, što zdavaŭ, kolki času pravioŭ. 

«NN»: A što ŭ vas za ekskluziŭnaje prava akazvać takija pasłuhi, jak kažuć, vydadzienaje [byłym ministram Siarhiejem] Maskievičam? 

MS: Nijakaha ekskluziŭnaha prava niama. Sprava ŭ tym, što Kodeks ab adukacyi nie zabaraniaje takoj formy adukacyi, ale niama nijakaha narmatyŭnaha akta, jaki b kankretyzavaŭ što i jak. Tamu kožny ŭniviersitet karystajecca svaim pałažeńniem, jakoje padpisvaje čynoŭnik. Nam — Maskievič, BDUIRu namieśnik ministra Bohuš, naprykład.

Ale ahułam, kab vy razumieli, heta zamova. I ŭsie pryvatnyja VNU z takim rana ci pozna sutyknucca — nas dušać! Ministerstva adukacyi ŭzhadniaje płany pa nabory, i kožny hod jany mienšyja i mienšyja: ja prašu 1000 studentaŭ, mnie ŭzhadniajuć 700, prašu 700 — dajuć 300!

Mnie voś 300 čałaviek uzhadnili, nabiaru na adnaho bolš — hrubaje parušeńnie licenzii. A dakumienty padajuć u try razy bolš! Kamuści z kaleh dali ŭvohule 54, niechta nie nabiraŭ sioleta.

Heta metanakiravanaje zdušeńnie pryvatnaj adukacyi.

• 0
• 0
• 0
• 0
• 0
• 0
• 0
• 0