«Vajna suprać Rasii da apošniaha ŭkrainca»: Kałamojski hatovy da razvarotu ŭ bok Maskvy i abvinavačvaje Zachad
Ukrainski aliharch Ihar Kałamojski ličyć, što Ukrainie para adračysia Zachadu i naładžvać adnosiny z Rasijaj, piša The New York Times. Jon spadziajecca, što ŭzamien za taki razvarot jamu dazvolać viarnuć kantrol nad «Pryvatbankam».
Vydańnie, cytujučy zajavy Kałamojskaha, miarkuje, što jany, pa mienšaj miery, častkova adlustroŭvajuć rasčaravańnie aliharcha zachodniaj dypłamatyjaj i Mižnarodnym valutnym fondam, jaki spadziajecca, što prezident nie dazvolić Kałamojskamu viarnuć sabie PryvatBank.
«Jany macniejšyja ŭ kožnym razie. My pavinny palepšyć našy adnosiny», — skazaŭ Kałamojski, paraŭnoŭvajučy Rasiju i Ukrainu.
«Ludzi chočuć miru, dobraha žyćcia, jany nie chočuć vajavać. A vy, — Amieryka, — prymušajecie nas vajavać i navat nie dajacie nam hrošaj na heta», — cytuje vydańnie aliharcha.
Kałamojski padkreśliŭ, što ŭ jaho niama asablivaj lubovi da Rasii, zhadaŭšy Haładamor u 1930-ch hadach jak adnu z trahiedyj, jakija napatkali Ukrainu praź jaje suviazi z Maskvoj.
Ale, jak piša vydańnie, Kałamojski ŭ niecenzurnaj leksicy zajaviŭ, što Zachad padvioŭ Ukrainu, nie daŭšy dastatkova hrošaj abo nie adkryŭšy dosyć rynkaŭ.
Zamiest hetaha, pavodle jaho słoŭ, Złučanyja Štaty prosta vykarystoŭvajuć Ukrainu, kab pasprabavać asłabić svajho hieapalityčnaha kankurenta.
«Vajna suprać Rasii, — skazaŭ jon, — da apošniaha ŭkrainca».
Kałamojski zajaviŭ, što adnaŭleńnie suviaziaŭ z Rasijaj stała nieabchodnym dla ekanamičnaha vyžyvańnia Ukrainy. Jon ličyć, što rana vajny zažyvie.
«Dajcie joj piać, 10 hadoŭ, i kroŭ budzie zabytaja», — skazaŭ Kałamojski.
«U 2014 hodzie ja pakazaŭ, što nie chaču być z Rasijaj… Ja abjektyŭna apisvaju toje, što baču i kudy ŭsio ruchajecca», — dadaŭ jon.
Kałamojski zajaviŭ, što finansavańnie z Rasii moža zamianić kredyty ad MVF, jaki nastojvaje na antykarupcyjnych reformach, jakija razdražniajuć ukaraniełyja biźnies-intaresy va Ukrainie.
«My voźmiem 100 miljardaŭ dołaraŭ u rasijan. Ja dumaju, što jany z zadavalnieńniem dali b ich nam siońnia», — skazaŭ Kałamojski.
«Jaki samy chutki sposab vyrašyć prablemy i adnavić adnosiny? Tolki hrošy», — dadaŭ jon.
Aliharch zajaviŭ, što kali b jon byŭ prezidentam Ukrainy, jon by pačaŭ rasśledavańnie, jakoha damahaŭsia prezident ZŠA Donald Tramp.
Na pytańnie, ci nie padstavić heta Ukrainu pad udar, kali na prezidenckich vybarach u nastupnym hodzie pieramoža demakrat, Kałamojski adkazaŭ: «Kali jany buduć razumničać z nami, my pojdziem da Rasii».
«Rasijskija tanki buduć raźmieščany kala Krakava i Varšavy», — skazaŭ jon. «Vaša NATA budzie mačycca ŭ štany i kuplać pampiersy».
Kałamojski skazaŭ, što jon pa-raniejšamu maje namier viarnuć sabie prava ŭłasnaści na PryvatBank abo atrymać kampiensacyju. Jon zajaviŭ, što takija ludzi, jak Parašenka, adkaznyja za nacyjanalizacyju banka, pavinny być pakaranyja, «i dla ich pavinna być viernuta śmiarotnaje pakarańnie».
Vydańnie adznačyła, što, pakolki mižnarodnyja inviestary zaniepakojenyja rolaj Kałamojskaha, Zialenski publična nastojvaje na tym, što jon nie viernie bank jaho byłym uładalnikam. Kałamojski ŭ adkaz zajaviŭ, što prezident chłusić.
«Jon viedaje, što ich nie skrali», — zapiarečyŭ Kałamojski, kažučy pra hrošy, jakija jon i jaho partnior vyvieli z banka. «Jon kaža toje, što vy ŭsie chočacie pačuć».
Pry hetym Kałamojski admaŭlaje, što maje schavany ŭpłyŭ na ŭrad Zialenskaha. Ale papiaredziŭ, što jon pačynaje vieryć u taki vobraz i zdolny ŭvasobić jaho ŭ žyćcio.
«Kali ja nadziavaju akulary i hladžu na siabie, jak uvieś astatni śviet, ja baču siabie pačvaraj, lalkavodam, haspadarom Zialenskaha, čałaviekam, jaki buduje apakaliptyčnyja płany», — skazaŭ Kałamojski.
«Ja mahu pačać rabić heta pa-sapraŭdnamu», — zajaviŭ jon.
Kamientary