«Chadžu z achovaj, doma nie načuju». Staršynia vybarkama ŭ Mahilovie — pra incydent z ulotkami

U Mahilovie staršynia ŭčastkovaj vybarčaj kamisii № 32 i dyrektar dziciačaha sada — siaredniaj škoły № 12 Maryna Zubarenka (taja samaja, pra jakuju kazaŭ Alaksandr Łukašenka) padała zajavu ŭ milicyju na nieviadomych chulihanaŭ. Chtości daviedaŭsia pra jaje chatni adras i nakleiŭ ulotki ŭ kožnym z padjezdaŭ šmatpaviarchovika, dzie žyvie žančyna. Na ich — zaklik pry sustrečy skazać joj jak staršyni ŭčastkovaha vybarkama, što falsifikacyja — «kryminalna karalnaja dzieja». Užo treci dzień Maryna Zubarenka nie načuje doma, jaje supravadžaje achova, piša Tut.by.

Pavialičyć

Maryna Zubarenka raspaviała, što sama tyja ŭlotki navat nie bačyła. Kali ścisła, to było tak: 13 listapada ŭ SŠ № 12 prachodziła sustreča z kandydatam u deputaty Iharam Marzalukom. Na sustreču pryjšli vybarščyki, a taksama žurnalisty telekanała «Biełsat». Ich na sustreču nie puścili.

— Telekanał nie akredytavany na terytoryi Biełarusi, a značyć, nie moža aśviatlać chod vybarčaj kampanii, — tłumačyć staršynia ŭčastkovaha vybarkamu. — Žurnalisty nie pakazali paśviedčańni pa majoj prośbie, tamu ich vietliva paprasili pakinuć zału. Jany — žurnalistka i chłopiec-apieratar — admovilisia, pavodzili siabie pa-chamsku i adkryta pravakavali na kanflikt. Dziaŭčyna zdymała videa na telefon i trymała jaho prosta ŭ moj tvar. Mnie heta było niepryjemna. Tady baćki našych vučniaŭ, jakija taksama pryjšli na sustreču z deputatam i ŭbačyli, u jakim my ciažkim stanoviščy, prapanavali pieranieści sustreču ŭ inšaje pamiaškańnie. Vybarščyki pierajšli, a žurnalistaŭ my nie puścili. Marzaluk prapanavaŭ im pakinuć kamieru za dźviaryma, a prysutničać jak zvyčajnym hramadzianam. Jany pahadzilisia, ale ź imi zajšli ŭ zału jašče troje ludziej, dvuch ź jakich ja viedaju — žyviom ź imi ŭ adnym domie, ale ŭ roznych padjezdach.

Pa słovach Maryny Zubarenka, hetyja troje jašče da pryjezdu kandydata ŭ deputata i źmieny miesca sustrečy znachodzilisia ŭ zale i hučna kazali «jak by miž saboj». Sutnaść fraz zvodziłasia da taho, što vybary niesumlennyja, što ŭsio sfalsifikavana, deputaty — maryjanietki i ničoha nie vyrašajuć.

— Ja zrazumieła, što jany prosta robiać pravakacyju i raspalvajuć ludziej, nastrojvajuć ich niehatyŭna. Dy ja i sama paśla ŭsiaho hetaha była trochi napružanaja — situacyja ŭsio ž taki niepryjemnaja vyjšła, choć my jak škoła prosta davali pamiaškańnie i jak vybarčaja kamisija dziejničali pa zakonie, — kaža Maryna Zubarenka.

U toj viečar jana nie pajechała dadomu — było pozna, i jana adpraviłasia načavać da dački, jakaja žyvie niedaloka ad škoły. A ranicaj joj rodnyja paviedamili, što ŭvieś padjezd i dźviery kvatery abklejenyja ŭlotkami. Na kožnaj — fota Maryny Eduardaŭny ŭ tym adzieńni, u jakim jana była padčas sustrečy Ihara Marzaluka z vybarščykami ŭ SŠ № 12.

— Treba skazać, što pramych abraz u słovach na ŭlotcy niama — tekst pisaŭ niechta jurydyčna padkavany. Ale tam razhałošany maje asabistyja danyja. Heta značyć chtości viedaje numar majoj kvatery, prakraŭsia tudy, dzie ja žyvu, i zaklikaje pry sustrečy kazać mnie pra kryminalnuju adkaznaść, razumiejecie? — uschvalavanaja dyrektar.

Maryna Zubarenka kaža, što adrazu zhadała vypadak ź Jaŭhienam Mikałuckim, jaki zdaryŭsia 22 hady tamu. I zaraz baicca nie stolki za svaje žyćcio i biaśpieku, kolki za svaich rodnych.

Staršynia Kamiteta dziaržaŭnaha kantrolu Mahiloŭskaj vobłaści, deputat Pałaty pradstaŭnikoŭ Nacyjanalnaha schodu Biełarusi Jaŭhien Mikałucki zahinuŭ 6 kastryčnika 1997 hoda ŭ vyniku zamachu. Vybuchovaje prystasavańnie spracavała, kali Mikałucki adkryvaŭ dźviery svajoj kvatery. Jaho žonka ź ciažkimi ranieńniami była dastaŭlena ŭ balnicu.

— Ja doma z taho dnia nie načuju — bajusia. Chadžu zaraz z achovaj. Navošta kamuści spatrebiłasia tak rabić? Čamu mienavita sa mnoj? Tamu što ŭ nas na ŭčastku hałasujuć kiraŭniki vobłaści i horada? Ja padazraju, chto moh heta zrabić, bo ŭlotki raskleili ŭ noč na 14 listapada — napiaredadni a 10-j viečara ich dakładna jašče nie było. Ale heta tolki maje padazreńni — chaj raźbirajecca milicyja, — kaža staršynia učastkovaj vybarčaj kamisii.

Pavodle Maryny Zubarenka, viadziecca pravierka i, chutčej za ŭsio, budzie raspačata kryminalnaja sprava za chulihanstva. Žančyna kaža, što kali sprava dojdzie da suda, to jana zapatrabuje kampiensacyi maralnaj škody:

— Mnie hetyja hrošy nie patrebnyja — chaj na rachunak škoły pieraličać: choć ramont darobim.

• 0
• 0
• 0
• 0
• 0
• 0
• 0
• 0