Svaimi dumkami pra skandalnaje zatrymańnie žurnalista Čudziancova padzialiŭsia na svajoj staroncy ŭ fejsbuku zasnavalnik homielskich «Mocnych navin» Piatro Kuźniacoŭ.
Čudziancovu-Zujevu, vidavočna, padkinuli narkotyki, i zaraz usia maja stužka fejsbuka dyskutuje, ci treba jaho salidarna abaraniać.
Čałaviek ź vielmi admoŭnaj reputacyjaj, tamu adzinaha mierkavańnia niama i być nie moža.
Što da mianie, to ja kateharyčna za toje, što hramadzianskaja supolnaść i žurnaliscki cech pavinny vyrazna i hučna vykazać pazicyju, i pazicyja hetaja pavinna być u tym liku i pra toje, što padobnyja mietady raspravy nie mohuć prymianiacca ŭ našym hramadstvie, niavažna, u adnosinach da ahidnaha Čudziancova albo da jakoha-niebudź zusim śviatoha žurnalista.
Ale pazicyja — pazicyjaj, a čałaviečy faktar nichto nie admianiaŭ, i hipatetyčnaja akcyja ŭ padtrymku hetaha čałavieka sutykniecca ź vielizarnymi ciažkaściami na čysta technałahičnym uzroŭni — što treba zrabić i jak?
Navat cechavuju salidarnaść vykazvajuć usio roŭna asobnyja ludzi, i ja padazraju, što niašmat znojdziecca žadajučych skazać hałoŭnuju frazu: Je suis Čudziancoŭ, ja — Čudziancoŭ.
Ja, pa mienšaj miery, siabie z takoj avatarkaj nie baču, jak, dumaju, dziasiatki i sotni inšych ludziej, jakija ŭ inšych abstavinach mahli b takim čynam salidarnaść vykazać.
Heta značyć, nasamreč, kali niejkaja salidarnaść i budzie vykazana, chutčej za ŭsio heta budzie niejkaja pazicyja ŭ farmacie ahulnaj zajavy, naturalna, abiaźličanaj: «My».
Padobnyja zajavy źjaŭlajucca ŭ Biełarusi rehularna, padstaŭ chapaje, daŭno stali štodzionnaściu, tamu nichto na ich nie adreahuje.
Tak my atrymajem vielmi drenny precedent: ułady ŭžyvajuć aburalnuju i prosta nie dapuščalnuju technałohiju raspravy, a hramadstva faktyčna situacyju prahłynaje.
Ci budzie ŭ hetym chtości vinavaty? Z žurnalistaŭ, jakija nie žadajuć asacyjavacca z Čudziancovym, — nichto.
Situacyja naohuł pa-za lubymi šabłonami. Naohuł usie pryzvyčailisia, što ŭłady pa ŭsim śviecie raspraŭlajucca z sumlennymi i, tamu, pavažanymi žurnalistami. I za ich, viadoma, usio sumlennyja ludzi zastupajucca. U Biełarusi ŭsio nastolki pa-svojmu, što navat tut atrymlivajecca šyvarat-navyvarat.
I jak pravilna siabie pavodzić u takoj situacyi — nijakich univiersalnych receptaŭ niama…
Kamientary