Čarhovaja doza

Premjer‑ministr Rasijskaj Fiederacyi Uładzimir Pucin padpisaŭ pastanovu ab vydzialeńni Biełarusi kredytu ŭ 500 młn. dalaraŭ. Pra heta było zajaŭlena 5 sakavika na pasiadžeńni prezidyuma ŭrada Rasii.

«Pavodle prośby biełaruskaha boku my pryniali rašeńnie, i siońnia ja padpisaŭ adpaviednuju pastanovu ŭrada. My vydzialajem Biełarusi jašče adzin kredyt — paŭmiljarda dalaraŭ. Prašu Ministerstva finansaŭ apieratyŭna vykanać hetaje rašeńnie», — cytuje U.Pucina RIA Novosti.

Kiraŭnik rasijskaha ŭrada nahadaŭ, što ŭ kancy 2007 hoda Rasija vydzieliła lhotny kredyt Biełarusi ŭ 1,5 młrd. dalaraŭ, a ŭ 2008 hodzie — kala 1 młrd. dalaraŭ. Aprača taho, «za hety ž čas «Hazprom» prapłaciŭ za 50% «Biełtranshaza» bolš jak 1 miljard 200 miljonaŭ dalaraŭ».

U.Pucin adznačyŭ kanstruktyŭnaje supracoŭnictva Biełarusi i Rasii, zaŭvažyŭšy, što abiedźvie krainy ŭpeŭniena ruchajucca «ŭ napramku da stvareńnia sajuznaj dziaržavy».

Jak paviedamlałasia raniej, 3 sakavika vice‑premjer — ministr finansaŭ Rasii Alaksiej Kudryn paviedamiŭ, što mižuradavaje pahadnieńnie ab vydzialeńni Biełarusi kredytu ŭ 500 młn. dalaraŭ budzie padpisana najbližejšymi dniami. Paźniej, paśla ŭniasieńnia papravak u biudžet na 2009 hod, budzie padpisana jašče adno pahadnieńnie ab vydzialeńni 500 młn. dalaraŭ.

Pieršaja častka rasijskaha kredytu ŭ pamiery 1 młrd. dalaraŭ pastupiła na rachunak Minfina Biełarusi 18 listapada 2008 hoda. Dziaržaŭny kredyt vydzieleny Biełarusi na 15 hadoŭ pa staŭcy Libor plus 3% hadavych z adterminoŭkaj pahašeńnia asnoŭnaha doŭhu na piać hadoŭ.

Płanavałasia, što druhi tranš u pamiery 1 młrd. dalaraŭ budzie pieraličany Biełarusi da kanca lutaha 2009 hoda paśla padpisańnia prahramy sumiesnych dziejańniaŭ pa raźvićci ekanamičnaha supracoŭnictva. U kancy studzienia Uładzimir Pucin abiacaŭ paskoryć vydaču druhoj častki kredytu.

Premjer‑ministr Biełarusi Siarhiej Sidorski padčas vizitu ŭ Sankt‑Pieciarburh 27 lutaha zajaviŭ, što Minfin Rasii źviarnuŭsia da biełaruskich partnioraŭ z prośbaj padzialić srodki druhoj častki kredytu jašče na dva tranšy — pa 500 młn. dalaraŭ u lutym i sakaviku.

Viadoma taksama, što aprača stabilizacyjnaha kredytu biełaruskija ŭłady zapytali ŭ Rasii kredyt u 100 młrd. rasijskich rubloŭ u abmien na pierachod na raźliki ŭ rublach va ŭzajemnym handli. Rašeńnie pa hetym zapycie pakul nie pryniata.

Pavodle źviestak Minfina Biełarusi, źniešni dziaržaŭny doŭh u 2008 hodzie ŭzros na 1 młrd. 382,2 młn. dalaraŭ (na 59,2%) i na 1 studzienia 2009 hoda skłaŭ 3 młrd. 718,9 młn. dalaraŭ ZŠA.

BiełaPAN

• 0
• 0
• 0
• 0
• 0
• 0
• 0
• 0