Ukrainskaja prakuratura dała padrabiaznaści pra spravu, pa jakoj, vierahodna, prachodzić Mikita Šacilin
Hienieralnaja prakuratura Ukrainy paviedamiła, što na Bukavinie (Čarnavickaja vobłaść na miažy z Małdovaj i Rumynijaj) była raskrytaja maštabnaja schiema niezakonnaj pierapraŭki mužčyn praź dziaržaŭnuju miažu. Jak vyhladaje, heta taja samaja sprava, pa jakoj zatrymlivaŭsia syn kiraŭnicy Misii biełaruskich demakratyčnych sił va Ukrainie Śviatłany Šacilinaj Mikita Šacilin.
Pavodle źviestak ukrainskaj prakuratury, u schiemie ŭdzielničali dziesiać čałaviek, jakija arhanizavali ceły nielehalny biznes. Siarod tych, kaho jany vyvozili za miažu, byli nie tolki vajskovaabaviazanyja, ale i dziejnyja vajskoŭcy.
Schiema dziejničała sistemna: vykarystoŭvalisia zahadzia raspracavanyja maršruty, načnaja łahistyka, arandavanyja kvatery i hateli. Udzielniki karystalisia GPS-navihacyjaj, radyjostancyjami, ciepłavizarami i dronami. Roli ŭ hrupie byli dakładna raźmierkavanyja.
Štomiesiac udzielniki hrupy niezakonna pierapraŭlali jak minimum 10 čałaviek. Sa śniežnia minułaha hoda takim čynam za miažu vyjechali kala 60 mužčyn. Ahulny prybytak arhanizataraŭ skłaŭ bolš za 700 tysiač dalaraŭ.
Paviedamlajecca, što siarod udzielnikaŭ schiemy byli deputat Irpienskaj haradskoj rady (heta, vidać, i jość Mikita Šacilin) i supracoŭnik palicyi z Čarnavickaj vobłaści. Pavodle materyjałaŭ śledstva, deputat zajmaŭsia pieravozkaj ludziej i vykarystoŭvaŭ svoj status, kab źnizić ryzyku pravierak, a palicejski kaardynavaŭ prajezd praz błokpasty.
Paśla hetaha ludziej chavali, farmavali ŭ nievialikija hrupy i pierapraŭlali ŭ Rumyniju pa-za aficyjnymi punktami propusku.
Padčas rasśledavańnia praviali 27 vobšukaŭ u Čarnavickaj vobłaści i Kijevie. Byli kanfiskavanyja drony, GPS-trekiery, ciepłavizary, kamiery videanazirańnia, 58 mabilnych telefonaŭ, radyjostancyi, kampjutary, dakumienty, ekipiroŭka, zbroja i vialikija sumy najaŭnych hrošaj u roznych valutach.
Usich udzielnikaŭ zatrymali i paviedamili im pra padazreńni ŭ niezakonnym pierapraŭleńni ludziej praź miažu, a taksama ŭ pieraškodžańni dziejnaści ŭzbrojenych sił u asablivy pieryjad.
Sud užo vybraŭ usim padazravanym miery strymańnia. Pavodle zakanadaŭstva, im moža pahražać da 9 hadoŭ pazbaŭleńnia voli z kanfiskacyjaj majomaści.
Mikita Šacilin — vieteran vajny, jon braŭ udzieł u bajavych dziejańniach na baku Ukrainy jašče ŭ 2014 hodzie. Paśla pačatku poŭnamaštabnaj vajny ŭdzielničaŭ u abaronie Irpienia, Baradzianki i Makarava. Uznaharodžany ordenam «Za mužnaść» III stupieni.
Siońnia stała viadoma pra jahonaje zatrymańnie, ale bližej da viečara mužčynu vypuścili — jon zapisaŭ videa, na jakim idzie pa vulicy, paćviardžaje svajo zatrymańnie, jakoje adbyłosia 26 maja. I dadaje, što «davać kamientary pa spravie jamu zabaroniena ŭkrainskim zakanadaŭstvam».
Kamientary
"Vieteran vajny" - zdajecca, heta nie pryvilej na "tvaryć łajno pa žyćci". Nie, Mikita?