U dvuch vučniaŭ minskaj tancškoły COVID-19, u tym liku ŭ miedyka z adździaleńnia pulmanałohii
Adna sa staličnych tancavalnych škoł sychodzić na karancin. Pryčyna — paćvierdziŭsia karanavirus u dvuch vučniaŭ. Spačatku zabrali ŭ balnicu vučanicu, jakaja pracuje ŭ adnoj ź minskich balnic, u pulmanałahičnym adździaleńni, piša Tut.by.
Pra toje, što ŭ adnoj z vučanic tancavalnaj škoły paćvierdziŭsia dyjahnaz COVID-19, trenier Valeryj Juruć papiaredziŭ inšych vučniaŭ jašče 29 sakavika na svajoj staroncy «Ukantakcie». U tancškoły dva filijały — spačatku infiekcyja prajaviłasia ŭ dziaŭčyny, jakaja zajmajecca na vulicy Kalvaryjskaj.
Vučanica pracuje ŭ adnoj sa staličnych balnic u adździaleńni pulmanałohii, dzie zajmajucca dyjahnostykaj i lačeńniem zachvorvańniaŭ lohkich i dychalnych šlachoŭ. Pakul niama infarmacyi, na jakoj pasadzie.
«Da 27 sakavika (piatnica) u ich nie było chvorych na karanavirus. Tamu jana nie bačyła pryčyn nie chadzić na zaniatki», — adznačaje vykładčyk tancaŭ.
Jon dadaje, što ŭ apošnija razy na hrupavych zaniatkach minčanka była ŭ sieradu 25 sakavika i ŭ čaćvier 26 sakavika. Akramia taho, u dziaŭčyny jość chraničnaje zachvorvańnie, jakoje supravadžajecca kašlem, tak što jana nie rasceńvała hety simptom jak prykmietu chvaroby.
29 sakavika vykładčyk adznačaŭ, što sansłužba biare na kantrol ŭsich, chto kantaktavaŭ ź dziaŭčynaj, a častka škoły tancaŭ z zaściarohi sydzie na dvuchtydniovy karancin. Zrešty, da aŭtorka, 31 sakavika, situacyja ŭskładniłasia — COVID-19 paćvierdziŭsia i ŭ chłopca, jaki zajmaŭsia ź dziaŭčynaj u adnoj hrupie.
— U nas užo dva infikavanych i 28 kantaktaŭ pieršaha ŭzroŭniu, jakija pad nahladam sanstancyi — niechta ŭ balnicy, chtości na samaizalacyi. Płanujem sychodzić na karancin — z admienaj hrupavych zaniatkaŭ pa parnych tancach na miesiac, damaŭlalisia z arendadaŭcami, — rastłumačyŭ TUT.BY Valeryj Juruć.
Surazmoŭca dadaje, što ich škoła nie adzinaja ŭ Minsku, jakaja ciapier sychodzić na karancin.
— Škoły, jakija płaciać pahadzinnuju arendu za pamiaškańni, začynilisia, choć tam i niama chvorych — mała ludziej chodzić, i im niavyhadna zdymać zały. Niekatoryja vyrašyli pierastrachavacca i admianili zaniatki. Pry pahadzinnaj arendzie jany chacia b nie ŭvachodziać u stratu. U nas poŭnaja arenda, tamu da apošniaha davodziłasia pracavać. Dy i pramych pahrozaŭ nie było: u studyi prymalisia miery sanapracoŭki i dezinfiekcyi, Ministerstva achovy zdaroŭja zajaŭlaje, što kantraluje situacyju.
Adznačym, što raniej pra vypadki zaražeńnia miedykaŭ nie paviedamlałasia. Na dniach daktary ŭ Biełarusi abmiarkoŭvali pamiž saboj novaje praviła — pra toje, što z 25 sakavika miedycynskich rabotnikaŭ, jakija kantaktavali z zaražanymi karanavirusam pacyjentami, nie špitalizujuć. Jany pavinny zastavacca na pracy, pry hetym u ich voźmuć mazki na karanavirus i buduć mierać tempieraturu. TUT.BY vysyłaŭ zapyt u Ministerstva achovy zdaroŭja z prośbaj prakamientavać situacyju, adnak adkazu da hetaha času nie atrymaŭ.
Kamientary