Pamior Andžej Strumiła. Viadomy mastak, jaki ličyŭ Biełaruś svajoj Baćkaŭščynaj
Siońnia ranicaj u Suvałkach, u paŭnočna-ŭschodniaj Polščy, pamior prafiesar Andžej Strumiła, 93-hadovy polski mastak ź biełaruskimi karaniami.
Učora jon adčuŭ siabie kiepska. Jaho špitalizavali, ale lekaram nie ŭdałosia jaho vyratavać, paviedamlaje «Radyjo Svaboda».
Strumiła naradziŭsia 23 kastryčnika 1928 hoda ŭ Vilni. Dziacinstva pravioŭ u Śviancianach, u Vilni i Lidzie, junacki pieryjad — na navahradskaj ziamli. Skončyŭ mastackuju vučelniu ŭ Łodzi i Akademiju vyjaŭlenčych mastactvaŭ u Krakavie.
U tvorčaj bijahrafii mastaka bolš za sto indyvidualnych vystavaŭ u Tokia i Bierlinie, Maskvie i Piekinie, Ńju-Jorku i Bremienie. Nieadnarazova jaho vystavy prachodzili i ŭ Biełarusi. Padčas sustrečy sa studentami Biełaruskaj dziaržaŭnaj akademii mastactvaŭ u 2017 hodzie jon padkreśliŭ, što źjaŭlajecca «hramadzianinam VKŁ» i ličyć Biełaruś svajoj Baćkaŭščynaj.
— Biełaruś, minskaja ziamla — heta maja Baćkaŭščyna. Moj dzied i moj baćka naradzilisia ŭ Minsku. Ja ŭ Minsku sam byvaŭ, jość u mianie siabry, aŭtary, dziejačy kultury. Biełaruskaja mova vielmi blizkaja majmu sercu.
Andžej Strumiła nieadnarazova naviedvaŭ biełaruskija imprezy ŭ Polščy, siabravaŭ ź dziejačami kultury ź Biełarusi.
Razam z Česłavam Miłašam i Tomasam Vencłavam Strumiła źjaŭlajecca adnym ź inicyjataraŭ vydańnia i aŭtaram kancepcyi «Knihi Vialikaha Kniastva Litoŭskaha» — toma ese (dvaccaci aŭtaraŭ z Polščy, Litvy i Biełarusi), pierakładzienych na litoŭskuju, biełaruskuju i anhielskuju movy.
Film «Suma» («Summa») biełaruskaha režysiora Andreja Kuciły pra Andžeja Strumiłu pryznany najlepšaj siaredniemietražnaj stužkaj na adnym z najprestyžniejšych u Jeŭropie fiestyvalaŭ dakumentalnaha kino IDFA ŭ Amsterdamie.
«Admyvaŭ haŭno z unitazaŭ, my tam jak samyja končanyja». Błohier Vadzim Vadimati Jermašuk — pra toje, jak žyŭ u kałonii ŭ «nizkim statusie»36
Kamientary