Jak pravodzić CT va ŭmovach pandemii? Piedahohi prapanujuć roznyja varyjanty

Minadukacyi pakul nie prymała rašeńnie ab pieranosie CT i ŭstupnaj kampanii, tamu, pa zapłanavanym raskładzie, na teściravańnie ŭ hetym hodzie vypuskniki majuć iści z 13 červienia pa 4 lipienia.

«Naša Niva» spytała ŭ piedahohaŭ dziaržaŭnaj i niedziaržaŭnaj adukacyi, jak, pa ich mierkavańni, musić skłaścisia kaniec navučalnaha hoda i pastupleńnie vypusknikoŭ u VNU.

Čytajcie: Piedahoh prapanuje abviaścić navučalny hod zavieršanym i zaličvać sioleta va ŭniviersitety biez CT

Nastaŭnica infarmatyki ŭ škole ŭ Minskaj vobłaści Ludmiła R. ličyć, što zdača CT musić pačynacca ŭ lipieni, kali abstanoŭka ź virusam budzie mienš napružanaja i bolš biaśpiečnaja.

«Było b dobra, kali b ustupnyja vyprabavańni možna było b arhanizavać dystancyjna: padrychtavać indyvidualnyja testy dla ekzamienaŭ i pravodzić ich anłajn, — prapanoŭvaje Ludmiła. — Zrazumieła, što heta ŭsio vielmi prablematyčna. Ale ŭ płanie navykaŭ dystancyjnych znosin heta było b karysna jak dla vykładčykaŭ, tak i dla dziaciej. Dystancyjna možna pravieści i školnyja ekzamieny, asabliva tyja, jakija zdajucca ŭ vusnaj formie — prosta arhanizavać zdaču pa videasuviazi».

Anton Rudenka, nastaŭnik historyi ŭ pryvatnaj škole «Steam», nie ŭpeŭnieny nakont dystancyjnaj zdačy ekzamienaŭ: technična heta słaba realizujecca.

«Tolki ŭjavicie: dziasiatki tysiač čałaviek buduć pa videasuviazi zapaŭniać hetyja błanki. Słaba razumieju, jak heta možna zrabić z domu. Tym bolš błanki indyvidualnyja, zapiačatanyja, ich adkryvajuć prosta ŭ aŭdytoryi. Navat kali dasłać ich abituryjentam u elektronnym farmacie — niemahčyma prasačyć za kožnym čałaviekam, kab jon ich atrymaŭ i ŭ jaho nie było ź imi nijakich prablem», — ličyć vykładčyk.

Na pohlad Antona, CT i ŭstupnuju kampaniju taksama lepš pieranieści na kaniec lipienia:

«Kali buduć pravodzić CT u červieni, jak i płanujecca, hetym tolki stvorać dadatkovy asiarodak epidemii, kali dzieci z usioj krainy pajeduć padavać dakumienty ŭ VNU.

Tym bolš ciapier mnohija VNU pracujuć dystancyjna. Dyk kali hetyja VNU ŭžo ciapier nie hatovyja kožny dzień prymać svaich studentaŭ, to niaŭžo jany hatovyja arhanizavać placoŭki dla zdačy CT školnikami z usioj krainy?

Pierasunuŭšy zdaču chacia b na miesiac, tym samym my jašče i zabiaśpiečym sabie akno mahčymaściaŭ, kab arhanizavać niejkija alternatyŭnyja varyjanty pastupleńnia abituryjentaŭ. Heta było b aptymalnym pramiežkavym rašeńniem».

U piedahoha i byłoha supracoŭnika Minadukacyi Siarhieja Alšeŭskaha jość kankretny płan dziejańniaŭ, pa jakim musić pracavać viedamstva.

Što prapanoŭvaje Alšeŭski:

• skončyć navučalny hod užo ciapier;
• admianić vypusknyja ekzamieny;
• skarektavać CT z ulikam taho, što školniki nie vyvučali, vyklučyŭšy heta z prahramy;
• pieranieści CT na lipień, a ŭstupnuju kampaniju — na žnivień;
• zapuścić sistemu adzinaha zaličeńnia ŭ VNU, kab minimizavać usie kantakty abituryjentaŭ.

«Admianiŭšy ekzamieny, my damo školnikam mahčymaść padrychtavacca da CT, — udakładniaje Siarhiej. — Heta budzie navat u plus dla tych, chto realna choča pastupić. Mahčymaściaŭ anłajn-padrychtoŭki zaraz dastatkova. Pakul školniki spakojna rychtavalisia b, ministerstva pavinna było b zapuścić narešcie sistemu adzinaha zaličeńnia ŭ VNU i ŭsio prajšło b na «ŭra».

Admianiać CT u hetym hodzie i zaličvać pa siarednim bale atestata nielha, ličyć piedahoh:

«Siaredni bał 7 u dobraj himnazii — heta 9—10 ŭ siaredniaj škole. Kali pastupać pa siarednim bale, my nie damo VNU atrymać najlepšych abituryjentaŭ, bo vyšejšaja adukacyja musić być kankurentnaj. Kali ŭjavić zusim utapičnuju situacyju: davajcie zaličvać usich i na ŭsie śpiecyjalnaści, chto kudy choča, a pa vyniku pieršaj siesii ŭsich adličvać. I što my atrymajem? Usie pojduć u BDUIR na prahramistaŭ i ŭ BDU na FMA, a astatnija ŭniviersitety studentaŭ niedaličacca. Tamu nie treba ŭskładniać. 

Ale dla taho, kab pryniać rašeńnie, jakoje ja prapanuju, patrebna śmiełaść. Ci pojdzie na heta naša ŭłada — dla mianie składanaje pytańnie, tamu što jaje dziejańni va ŭmovach pandemii ja nie razumieju».

• 0
• 0
• 0
• 0
• 0
• 0
• 0
• 0