Silicki: Ciapier Łukašenku lahčej tarhavacca

30 sakavika Pałata pradstaŭnikoŭ Nacyjanalnaha schodu Biełarusi sfarmiravała papiaredni prajekt paradku dnia viesnavoj siesii.

Pytańniu ab pryznańni niezaležnaści Abchazii i Paŭdniovaj Asiecii ŭ dakumiencie miesca nie znajšłosia, chacia raniej z vusnaŭ pradstaŭnikoŭ Minska hučali zajavy: razhledzim viasnoj! Zaciahvańnie pytańnia zrazumiełaje.

Heta dazvalaje łaviravać pamiž dvuma bakami, dapamoha jakich va ŭmovach ekanamičnaha kryzisu vielmi nieabchodnaja, — Rasijaj i Jeŭrasajuzam.

Jašče ŭ śniežni Alaksandr Łukašenka paviedamiŭ žurnalistam, što parłamient razhledzić pytańnie ab pryznańni niezaležnaści Abchazii i Paŭdniovaj Asiecii paśla Novaha hoda. U studzieni ab razhladzie pytańnia na viesnavoj siesii zajaviŭ namieśnik staršyni nižniaj pałaty Valeryj Ivanoŭ. Paśla hetaha kankretyka hučać pierastała: dakumient navat nie vynosiŭsia na razhlad profilnaj kamisii Pałaty pradstaŭnikoŭ.

Zatoje bolš kankretnyja zajavy stali hučać ź inšych bakoŭ. 23 lutaha na pres‑kanfierencyi ŭ Brusieli ministr zamiežnych spraŭ Čechii, jakaja staršynstvuje ŭ ES, Kareł Švarcenbierh zajaviŭ: u vypadku pryznańnia niezaležnaści Abchazii i Paŭdniovaj Asiecii Biełaruś «sutykniecca ź vielmi surjoznymi prablemami» adnosna ŭdziełu ŭ prahramie «Uschodniaje partniorstva».

A 16 sakavika vykazaŭsia i hienieralny sakratar Savieta ES Chaŭjer Sałana, jaki dahetul naviedaŭ Minsk. Pavodle jaho słoŭ, važna, kab Biełaruś zachavała svaju pazicyju niepryznańnia Paŭdniovaj Asiecii i Abchazii. «Jak vy viedajecie, Jeŭrasajuz nie pryznaŭ niezaležnaść hetych krain i nie maje namieru mianiać svoj punkt hledžańnia. My spadziajemsia, što ŭsie, chto z nami supracoŭničaje, buduć prytrymlivacca toj ža pazicyi», — skazaŭ Ch.Sałana.

Sa svajoj reakcyjaj vystupiła i Rasija. 21 sakavika na Brusielskim forumie kiraŭnik MZS RF Siarhiej Łaŭroŭ abvinavaciŭ ES u sprobie nacisnuć na Biełaruś. «Kali ministr zamiežnych spraŭ Čechii kaža pradstaŭnikam biełaruskaha boku: vy nie budziecie ŭ jeŭrapiejskim partniorstvie, kali pryznajecie niezaležnaść hetych respublik, — jak heta možna ŭsprymać? Jak šantaž ci demakratyju?» — rytaryčna zapytaŭsia S.Łaŭroŭ.

U takoj situacyi Minsku śpiašacca z pryznańniem niezaležnaści dźviuch kaŭkazskich respublik jaŭna nie z ruki. Nie dapamahła navat sustreča prezidenta Abchazii Siarhieja Bahapša z Alaksandram Łukašenkam. Randevu adbyłosia (na dumku šerahu naziralnikaŭ, z padačy Maskvy) 23 sakavika ŭ Sočy.

Adsutnaść u paradku dnia viesnavoj siesii biełaruskaha parłamienta pytańnia ab pryznańni niezaležnaści Abchazii i Paŭdniovaj Asiecii, na dumku palitołaha Vitala Silickaha, «uvohule čakałasia».

«Biełaruś i Rasija nie damovilisia ab canie pryznańnia Biełaruśsiu dźviuch respublik. Kožnaje pryznańnie maje svaju canu.

Na dumku V.Silickaha, ciapier biełaruskamu kiraŭnictvu tarhavacca lahčej. «Raniej Minsk tarhavaŭsia tolki z Maskvoj. U takoj situacyi adstojvać svaje pazicyi ciažka. Ciapier da torhu padklučyŭsia i ES. Łukašenka atrymaŭ bolšuju svabodu dziejańniaŭ. Jon moža zaniać najbolš vyhadnuju dla siabie pazicyju i łaviravać pamiž dvuma bakami. Pryčym takim čynam vadzić za nos abodva baki možna vielmi doŭha», — zaznačaje palitołah.

Pavodle słoŭ V.Silickaha, Rasija i ES razdźmuli značeńnie pytańnia ab pryznańni Abchazii i Paŭdniovaj Asiecii. «Jany sami dali Łukašenku kazyrnuju kartu, chacia spačatku płanavali vykarystać pytańnie ŭ jakaści ryčaha cisku na Minsk. A ŭ vyniku atrymali pradmiet dla torhu», — padkreśliŭ ekśpiert.

Palitołah, były deputat Pałaty pradstaŭnikoŭ Volha Abramava ličyć, što pytańnie pryznańnia niezaležnaści Abchazii i Paŭdniovaj Asiecii «absalutna nie pryncypovaje ŭ dvuchbakovych adnosinach Biełarusi ź Jeŭrasajuzam i bolš značnaje ŭ adnosinach z Rasijaj». «Rasii pryznańnie niezaležnaści Abchazii i Paŭdniovaj Asiecii nieabchodna z punktu hledžańnia ŭpłyvu na ŭsioj postsavieckaj prastory. Dla ES hetaje pytańnie cikavaje z punktu hledžańnia, pa‑pieršaje, acenki ŭzajemaadnosinaŭ Biełarusi z Rasijaj, pa‑druhoje, z punktu hledžańnia pavolnaha drejfu Biełarusi ŭ bok Jeŭrasajuza», — zaznačyła surazmoŭnica.

V.Abramava padkreśliła, što pytańnie ab pryznańni Abchazii i Paŭdniovaj Asiecii moža być uniesiena ŭ paradak dnia viesnavoj siesii parłamienta «ŭ luby momant».

V.Abramava nie biarecca pradkazać, ci budzie vierahodnaje pryznańnie niezaležnaści Abchazii i Paŭdniovaj Asiecii surjoznaj pieraškodaj dla ŭdziełu Biełarusi va «Uschodnim partniorstvie». «Usio zaležyć ad taho, jakaja hrupa jeŭrapiejskich palitykaŭ voźmie vierch. Nie sakret, što mnohija ź ich rabili sabie karjeru na biełaruskim pytańni», — zaznačyła jana.

V.Silicki ličyć, što pryznańnie niezaležnaści Abchazii i Paŭdniovaj Asiecii moža pieraškodzić udziełu Biełarusi ŭ novaj prahramie ES.

Nakont samoj vierahodnaści pryznańnia ŭ ekśpiertnym asiarodździ hučać roznyja prahnozy. Minsk, viadoma ž, raźličvaje na ekanamičnyja prefierencyi z boku Rasii, ale i razdražniać ES nie śpiašajecca, ličać palitołahi.

Siarhiej Karalevič, BiełaPAN

• 0
• 0
• 0
• 0
• 0
• 0
• 0
• 0