Hramadzian Kitaja papiaredzili pra nieviadomuju pnieŭmaniju ŭ Kazachstanie, «bolš niebiaśpiečnuju za karanavirusnuju infiekcyju»
Hramadzian Kitaja papiaredzili pra nieviadomuju pnieŭmaniju ŭ Kazachstanie, «bolš niebiaśpiečnuju za karanavirusnuju infiekcyju», pieradaje ahienctva KazTAH.
«Pavodle paviedamleńniaŭ kazachstanskich ŚMI, ź siaredziny červienia zachvorvańnie na pnieŭmaniju ŭ Atyrau, Aktabe i Šymkiencie značna ŭzrasło. Na hety momant infikavana kala 500 čałaviek i bolš za 30 čałaviek znachodziacca ŭ krytyčnym stanie. U pieršaj pałovie hetaha hoda ad pnieŭmanii pamierła 1772. Tolki ŭ červieni zahinuła 628 čałaviek, u tym liku hramadzianie Kitaja. Śmiarotnaść ad hetaj chvaroby našmat vyšejšaja za tuju, što ad novaj karanavirusnaj pnieŭmanii», — havorycca ŭ paviedamleńni na sajcie pasolstva Kitaja ŭ Kazachstanie ŭ čaćvier.
Kolkaść chvorych na pnieŭmaniju ŭ adnoj tolki Turkiestanskaj vobłaści Kazachstana dasiahnuła 5500, paviedamlaje aficyjnaje kazachskaje ahienctva Kazinfarm. U Paŭładarskaj vobłaści za apošnija sutki dyjahnastavali 385 pnieŭmanij.
Navukovych padstaŭ śćviardžać, što majem spravu z bolš niebiaśpiečnaj mutacyjaj karanavirusa ci infiekcyjaj novaha typu pakul niama. Mahčyma, havorka prosta pra niedastatkova dobra dyjahnastavanyja vypadki COVID-19.
13 lipienia ŭ Kazachstanie abvieščany dzień ahulnanacyjanalnaj žałoby pa achviarach karanavirusa.
U Biełarusi statystyka zachvorvańnia na pnieŭmaniii i śmierciaŭ ad ich sioleta stała tajamnicaj i nie publikavałasia. Ad miedykaŭ i čynoŭnikaŭ viadomyja ličby tolki pa asobnych haradach. Tak, u Breście na piku rehistravałasia da 280 pnieŭmanij za dzień, u Viciebsku — bolš za 100. Viadoma, što pnieŭmanii raźvivajucca prykładna ŭ 15% nośbitaŭ karanavirusa.
Kamientary