Biełaruś praciahvaje pieramovy z Suśvietnym bankam ab vydzialeńni kredytu na 1 młrd dalaraŭ.
Biełaruś praciahvaje pieramovy z Suśvietnym bankam ab vydzialeńni kredytu ŭ pamiery 1 młrd dalaraŭ.
Pra heta zajaviŭ 15 krasavika žurnalistam ministr finansaŭ Andrej Charkaviec.
«Ciapier idzie pieršy raund pieramoŭ, i pakul rana havaryć ab niejkich vysnovach i farmulavać, jakija krynicy pryciahnieńnia kredytu buduć z boku Suśvietnaha banka», — skazaŭ jon.
Pavodle słoŭ ministra, baki pakul «źvieryli intaresy i pazicyi adzin adnaho». «Pakul abmiarkoŭvajucca prystrełačnyja pytańni. Usia praca jašče napieradzie», — skazaŭ Charkaviec. Pry hetym jon padkreśliŭ, što biełaruski bok vykazvaje cikavaść u atrymańni ad Suśvietnaha banka hetaha kredytu.
***
«Skaračeńnie biudžetnych raschodaŭ sioleta budzie vielmi značnym. Za mnohija hady heta radykalnaja situacyja ŭ biudžetnym pracesie»,
— zajaviŭ 15 krasavika ministr finansaŭ Biełarusi Andrej Charkaviec, adkazvajučy na pytańni deputataŭ Pałaty pradstaŭnikoŭ.
Pavodle jaho słoŭ, Ministerstva finansaŭ udakładniła biudžet na 2009 hod, u adpaviednaści ź jakim płanujecca značnaje skaračeńnie raschodnaj častki.
«Tym nie mienš, pieršy kvartał hetaha hoda my zaviaršyli, zbałansavaŭšy raschody biudžetu z najaŭnymi resursami, — padkreśliŭ A.Charkaviec. — Biudžetnaja śfiera choć i adčuła skaračeńnie raschodaŭ, razam z tym byli zabiaśpiečany poŭnaściu ŭsie mierapryjemstvy, jakija płanavalisia dla realizacyi biudžetnymi arhanizacyjami».
Ministr finansaŭ paviedamiŭ, što va ŭdakładnienym biudžecie
«zakładzieny asihnavańni na pavieličeńnie zarpłaty na 5% taryfnaj staŭki pieršaha razradu».
«Ale kali raniej my płanavali hetaje pavyšeńnie ŭ mai, to siońnia ekanamičnaja situacyja pakazała, što biudžet nie zmoža zabiaśpiečyć hetaje pavyšeńnie mienavita ŭ hetym miesiacy. Tamu budziem adsočvać napaŭnialnaść biudžetu i prymać rašeńnie ab pavieličeńni zarabotnaj płaty adekvatna najaŭnym resursam», — skazaŭ Charkaviec.
Kamientary