Pravaabaronca, žurnalist Valer Ščukin špitalizavany, jon u ciažkim stanie
Pravaabaronca Valer Ščukin ciaham dvuch tydniaŭ znachodzicca na lačeńni ŭ vajskovym špitali ŭ Miensku. U špital jaho dastaviła chutkaja dapamoha paśla rezkaha paharšeńnia zdaroŭja. Dahetul, pavodle Valera Ščukina, stan jahonaha zdaroŭja ciažki, piša Radyjo Svaboda.
«Što ŭ mianie? Chvoryja nyrki, piačonka, šmat inšych prablem. Adčuvaju słabaść — čujecie ž, jak razmaŭlaju. Stary ŭžo, vidać, prychodzić čas. Ale spadziajusia, jašče praciahnu», — skazaŭ Valer Ščukin u telefonnaj razmovie z karespandentam Svabody. Pavodle Valera Ščukina, daktary špitala robiać usio mahčymaje, kab jon papraviŭsia, ale pra aperacyju havorki pakul nie idzie.
«Ničoha nia kažuć pra aperacyju, chočuć ci nia chočuć, nia viedaju. Lažu pad kropielnicaj, prymaju leki. Ale nibyta robiać usio, što mohuć, skardzicca niama na što», — skazaŭ Valer Ščukin pra lačeńnie ŭ vajskovym špitali.
Valer Ščukin — deputat Viarchoŭnaha Savietu 13-ha sklikańnia, dzie ŭvachodziŭ u apazycyjnuju hrupu. Valer Ščukin padpisaŭsia za impičment prezydenta Alaksandra Łukašenki i paśla razhonu parlamentu ŭ 1996 hodzie zastavaŭsia aktyŭnym udzielnikam apazycyjnaj baraćby. Spadara Ščukina šmat razoŭ zatrymlivali na apazycyjnych akcyjach, karali aryštami i štrafavali.
Valer Ščukin skazaŭ, što i sa špitala praciahvaje sačyć za sytuacyjaj u krainie, i hetak prakamentavaŭ padziei paśla prezydenckich vybaraŭ 9 žniŭnia:
«Dumaju, my pieramožam: pratesty nie ścichajuć, ich sacyjalnaja baza pašyrajecca, voś tolki kab stralaniny nie było. Łukašenka vuń z aŭtamatam užo biehaje. Jak kadravy aficer ja viedaju, što heta aznačaje: pahrozu ludziam, sprobu ich prystrašyć. Tak, ź jaho ŭžo śmiajucca, ludzi ŭsio mienš jaho bajacca, ale ŭsio ž, pavodle zakonu žanru, na treci raz zbroja moža strelić. Hetaha nielha vyklučać, treba ścierahčysia», — skazaŭ Valer Ščukin u adras demanstrantaŭ.
Valeru Ščukinu 78 hadoŭ. Jon były kapitan 2-ha ranhu, słužyŭ na Cichaakijanskim flocie SSSR va Ŭładzivastoku. Byŭšy deputatam Viarchoŭnaha Savietu byŭ siabram Kamunistyčnaj partyi Biełarusi, paźniej ź jaje vyjšaŭ i dałučyŭsia da demakratyčnaj apazycyi. U apošnija hady Valer Ščukin zaniaŭsia aktyŭnaj pravaabarončaj dziejnaściu, ale praciahvaŭ udzielničać i ŭ apazycyjnych akcyjach. Apošni raz Valera Ščukina zatrymlivali padčas demanstracyi na Dzień Voli ŭ 2017 hodzie.
Kamientary