Z fakulteta fiłasofii zvolniŭsia ŭžo druhi vykładčyk. Šmat aburanych pazicyjaj BDU
«Naša Niva» 30 vieraśnia pisała pra toje, što z fakulteta fiłasofii i sacyjalnych navuk BDU syšoŭ dacent Pavieł Barkoŭski. Jon z zasnavalnikaŭ stačkama fakulteta, a zvolniŭsia «pad ciskam ułasnaha sumleńnia».
Pres-słužba BDU praz «NN» raspaŭsiudziła adkaz, što Barkoŭski prosta straciŭ aŭtarytet i padtrymku ŭ kalektyvie, a jašče ŭ jaho byŭ nizki rejtynh siarod vykładčykaŭ. Adkaz administracyi ŭniviersiteta aburyŭ studentaŭ ciapierašnich i byłych, a taksama vykładčykaŭ univiersiteta. «Naša Niva» atrymała kala dziasiatka vodhukaŭ.
«Mnie było dziŭna i prykra čytać pra nibyta stratu aŭtarytetu i pieraacenieny ŭkład Paŭła Uładzimiraviča. Spytajecie luboha studenta fakulteta — Barkoŭski nikoha nie pakidaŭ abyjakavym. Asabista ja liču jaho najlepšym vykładčykam za ŭvieś čas majho navučańnia».
«Paviedamleńnie administracyi BDU — heta chłuśnia i ačarnieńnie čałavieka».
«Jon nikoli nie hnaŭsia za kolkaściu. Dla jaho ŭniviersitet nie byŭ «karjeraj», jakim jon źjaŭlajecca dla amataraŭ rejtynhaŭ. Naš fakultet byŭ dla Paŭła Uładzimiraviča pryzvańniem».
Prykładna takija słovy ŭ padtrymku Barkoŭskaha atrymlivali my.
U liście administracyi BDU adznačaŭsia taki momant: nibyta studenty čaćviortaha kursa, nie padtrymlivajučy zabastoŭku, paprasili pryznačyć inšaha vykładčyka ŭ suviazi ź niajaŭkaj Paŭła Barkoŭskaha na zaniatki. I heta adznačałasia jak adzin z punktaŭ padzieńnia aŭtarytetu vykładčyka.
Palina — starasta toj samaj hrupy patłumačyła, jak situacyja vyhladała nasamreč. «Pavieł Uładzimiravič prynios nam pietycyju, my jaje padpisali, ale my vypuskniki, tamu skazali, što ŭdzielničać u zabastoŭcy nie budziem. Jon skazaŭ, što heta całkam naša prava, jon nikoha nie prymušaje. Kaniečnie, my ŭhavorvali jaho zastacca, nichto lepš sučasnuju fiłasofiju nie patłumačyć nam. Ale jon byŭ kateharyčna suprać.
Ja źviarnułasia ŭ dekanat, tam nam prapanavali inšaha vykładčyka. Vydatna, my pahadzilisia. Ale pry hetym skazali napisać zajavu z prośbaj ab zamienie. Maŭlaŭ, heta farmalnaść. Ja navat nie razumieła, što heta moža być niejak vykarystana. Tolki potym užo sami vykładčyki stali kazać, navošta my heta napisali. Niekarektna kazać, što my admaŭlalisia ad Paŭła Uładzimiraviča», — kaža Palina.
Studentka kaža, što siarod jaje adnahrupnikaŭ usie pavažali Barkoŭskaha. «U nas šmat mocnych vykładčykaŭ, ale heta byŭ adzin z najlepšych. I vielmi prykra, što hetuju zajavu, jakaja była napisanaja pa niaviedańni, ciapier vykarystoŭvajuć suprać jaho».
Tym časam stała viadoma, što z FFSN taksama zvolniłasia dacent, kandydat psichałahičnych navuk Hanna Davidovič. Jana była taksama ŭ liku tych vykładčykaŭ FFSN, što padtrymali zabastoŭku.
«Ja nie mahu skazać, što niechta cisnuŭ i prymušaŭ zvolnicca, ale ŭmovy byli stvoranyja takija, što bolš zastavacca tam nie było jak», — kaža «NN» spadarynia Davidovič.
«My nie płanavali zvalniacca, dumali, što miesiac zabastoŭki dabudziem i vierniemsia ŭ aŭdytoryju. Tym bolš Pavieł pajšoŭ u adpačynak na vierasień, a maje pary pieranieśli na kastryčnik, jak by škody navučalnamu pracesu nie naniesiena. Ale viarnucca ŭžo niemahčyma.
U čas zabastoŭki ja čytała lekcyi dla studentaŭ u volnaj formie pra rasstrojstva asoby, infantylizm. Źviartajusia ŭ dekanat z prośbaj pravieści lekcyju, mnie kažuć, što daduć pamiaškańnie, kali źviarnusia za dva dni — źviartajusia. Kažuć, volnych aŭdytoryj niama. I heta pry tym, što navučańnie zaraz na dystancyjcy. Prychodzim u pieršuju volnuju aŭdytoryju, praz chvilin dziesiać zachodzić tudy vykładčyk, jaki kaža, što jaho adpravili terminova siudy pravieści kansultacyju ź inšaj aŭdytoryi.
My pisali tłumačalnyja, što biarom klučy na vachcie, što psujom ścienki, kali nie znachodzili aŭdytoryi i byli ŭ faje», — kaža Hanna Alaksandraŭna.
Spadarynia Davidovič havoryć, što dekan FFSN Vadzim Hihin zaniaŭ pazicyju, što nikoha zvalniać nie budzie.
«Jon kazaŭ, maŭlaŭ, ja razumieju, vy chočacie, kab ja vas zvolniŭ, ale nijakich bonusaŭ i dyvidendaŭ ad mianie vy nie atrymajecie.
Mahčyma, Pavieł jamu i zaminaŭ u niečym. Ale što tyčycca mianie, to ja zaŭsiody była biezadmoŭnym čałaviekam, kali treba zrabić niešta dla ŭniviersiteta. Adkinuŭšy ścipłaść, skažu, što takich śpiecyjalistaŭ pa psichałohii dziaciej z asablivaściami ŭ nas nie tak šmat, tamu zamienu budzie znajści niaprosta, ale nichto nie staŭ sprabavać mianie pakinuć. Hihin tolki adkazaŭ: «Vaša prava», zajavu ab zvalnieńni padpisvaŭ nie jon».
Vykładčyca kaža, što ŭ pryvatnaj razmovie Hihin uspomniŭ joj i pajezdki na zavody ŭ padtrymku bastujučych rabočych, i zatrymańnie muža 27 žniŭnia na płoščy Niezaležnaści, i intervju «Jeŭraradyjo». «Jon demanstravaŭ vialikuju daśviedčanaść va ŭsich spravach. Kazaŭ, što mnie lohka bastavać, kali muž pracuje na litoŭskuju kampaniju».
Isnuje mierkavańnie, što źmiena ŭ pazicyi dekanata FFSN pačałasia paśla mierkavanaj sustrečy staršyni Savieta Respubliki Natalli Kačanavaj z administracyjaj BDU. «Da peŭnaha času na nas hladzieli tak: nu śpiavajecie pieśni — śpiavajcie sabie. A potym pačalisia i tłumačalnyja ab źniknieńni klučoŭ i inšaje».
Prapanoŭ pa pracaŭładkavańni spadarynia Davidovič maje niamała, zaprašaje BDPU imia Tanka, ale jana baicca, što tam situacyja nie budzie asabliva inšaj. «Ja budu sumavać pa vykładańni — heta było majo».
Dacent kafiedry ahulnaj i miedycynskaj psichałohii Taćciana Sinica jašče adna z udzielnic zabastoŭki z boku vykładčykaŭ. Jana padzialiłasia svaim bačańnie situacyi.
«Ja taksama aktyŭna padtrymlivała ideju strajku na fakultecie. Mahu paćvierdzić toj fakt, što Pavieł Barkoŭski karystajecca vysokim aŭtarytetam siarod kaleh i studentaŭ, choć i nie mnohija adkryta padtrymali strajk. Asabista ja aktyŭna padtrymlivała i padtrymlivaju Paŭła Uładzimiraviča ŭ pytańni vyražeńnia hramadzianskaj pazicyi mienavita šlacham praviadzieńnia akcyj i strajku, ale pakul nie zvolniłasia pa pryčynie maralna-etyčnaj pazicyi tolki ŭ suviazi z pryviazkaj da arendnaha žylla ad BDU. Chaciełasia b daviedacca, chto vykazaŭ pazicyju BDU, kab ačarnić zvolnienaha vykładčyka? Heta ŭsio niavarta i niepryhoža», — ličyć spadarynia Sinica.
Dekan FFSN BDU Vadzim Hihin paličyŭ za lepšaje admovicca ad kamientaroŭ na dadzienuju temu.
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść37
Kamientary