Fatohrafu «Našaj Nivy» Šury Pilipovič-Suščyc zavočna prysudzili 7 sutak. Jaje navat nie paklikali ŭ sud
Sudździa Pieršamajskaha suda Minska Anastasija Lajkoŭskaja prysudziła da 7 sutak fatohrafku «Našaj Nivy» Šuru Pilipovič-Suščyc. Sud prachodziŭ zavočna, žurnalistku navat nie paklikali na pasiadžeńnie.
20-hadovuju Šuru Pilipovič-Suščyc zatrymali apoŭdni 15 listapada na Puškinskaj. Na videa vidać, jak siłavik viadzie jaje mima zajezdu ŭ «Makdonalds». U jaje rukach sumka, fotaaparat, na pojasie vializny bejdž žurnalista.
Tym nie mienš fatohrafku advieźli ŭ Pieršamajskaje RUUS, dzie skłali pratakoł za ŭdzieł u «niesankcyjanavanaj akcyi». Da poźniaj nočy jana prasiadzieła ŭ milicyi, i ŭ 5:30 jaje adpuścili, zabraŭšy techniku. Na ruki addali paviestku na 19 listapada ŭ Pieršamajski sud.
Ale kali 18 listapada advakat pazvaniŭ u sud, akazałasia, što Šuru ŭžo paśpieli asudzić!
Zhodna z rapartam milicyjaniera A.P. Sialaŭki, fatohrafka išła razam z udzielnikami vuličnaha šeścia, jakija trymali ŭ rukach bieł-čyrvona-biełyja ściahi i vykrykvali łozunhi «Žyvie Biełaruś». Što kankretna rabiła fatohrafka? Ni Sialaŭka, ni śviedka A.I. Kaściučkoŭ tak i nie patłumačyli — prosta «rušyła». Tym nie mienš sudździa Anastasija Lajkoŭskaja pryznała Pilipovič-Suščyc vinavataj i prysudziła 7 sutak.
Pakolki sutki vyniesienyja zavočna, jaje nie aryštavali. Šura Pilipovič-Suščyc abskardžvaje niezakonny prysud — jana nie była naležnym čynam apavieščanaja ab dacie suda.
Pra Šuru Pilipovič-Suščyc čytačy «Našaj Nivy» mahli ŭpieršyniu daviedacca ŭ 2018 hodzie. Tady my pisali pra jaje jak vypusknicu Liceja BDU, jakaja atrymała 100 bałaŭ na centralizavanym testavańni pa biełaruskaj movie.
Ź ciaham času Šura pačała supracoŭničać z «Našaj Nivaj». Dziakujučy joj — i jaje vydatnamu vałodańniu biełaruskaj movaj — na staronkach sajta stała našmat mienš pamyłak. A sioleta Šura stała fatohrafkaj «Našaj Nivy». Vy mahli bačyć jaje zdymki z mnohich akcyj pratestu.
Čytajcie. 18-hadovaja Alaksandra nabrała 100 bałaŭ na CT pa biełaruskaj movie i dzielicca historyjaj svajho pośpiechu
Akaŭnt Kabančuka ŭzłamali — ale ci biełaruskija śpiecsłužby?7
Kamientary