Ad karanavirusa pamior były prezident Francyi Žyskar d'Esten — zasnavalnik ES i kachanak Emanuel

Valery Žyskar d'Estenu było 94 hady. Jaho śmierć była vyklikanaja ŭskładnieńniami, źviazanymi z Covid-19. Palityk pamior u atačeńni siamji, piša VVS.

Pavialičyć

Žyskar d'Esten pražyŭ daŭžej za ŭsich z dvaccaci prezidentaŭ Francuzskaj Respubliki — 94 hady. Jon ža pravioŭ bolš za ŭsich času ŭ adstaŭcy — 39 hadoŭ.

Suajčyńniki nazyvali jaho prosta «Eks» i razumieli, pra kaho havorka.

Jon byŭ apošnim suśvietnym lidaram-udzielnikam Druhoj suśvietnaj vajny i apošnim z deputataŭ parłamientaŭ šaści jeŭrapiejskich krain, jakija ratyfikavali ŭ 1957 hodzie Rymski dahavor, jaki pakłaŭ pačatak stvareńniu ES.

Budučy architektar «vosi Paryž-Bon» źjaviŭsia na śviet 2 lutaha 1926 hoda ŭ hiermanskim Koblency. Baćka budučaha prezidenta zajmaŭ pasadu ŭ administracyi Rejnskaj vobłaści, časova akupavanaj Antantaj paśla Pieršaj suśvietnaj vajny.

Maci była dačkoj sienatara i davodziłasia dalokaj svajačnicaj Burbonam. Baćka paśla kamandziroŭki ŭ Hiermaniju pracavaŭ hienieralnym inśpiektaram Ministerstva finansaŭ.

Kali sajuźniki vysadzilisia ŭ Narmandyi, 18-hadovy junak nieadkładna ŭstupiŭ dobraachvotnikam u vojska de Hola, udzielničaŭ u vyzvaleńni Paryža, byŭ uznaharodžany francuzskimi i amierykanskimi miedalami.

U 36 hadoŭ jon staŭ samym maładym u historyi Francyi ministram finansaŭ i zajmaŭ hetuju pasadu pry prezidentach de Holi i Pampidu. Kažuć, de Hol na luboje ekanamičnaje pytańnie mieŭ zvyčaj adkazvać: «Spytajecie Žyskara, u jaho pamiać lepšaja».

Na ministerskim stale Žyskar d'Esten trymaŭ fatahrafiju Džona Kienedzi. Zrazumieła, jaho pastajanna pytalisia, ci nie źbirajecca jon taksama stać prezidentam, i jon vielmi surjozna kazaŭ: «Tak».

U 1974 hodzie jon damohsia hałoŭnaj mety svajho žyćcia, abyšoŭšy na vybarach sacyjalista Fransua Miterana mienš, čym na adzin pracent hałasoŭ.

Prezidenctva Žyskar d'Estena (1974-1981) adznačyłasia budaŭnictvam chutkasnych čyhunak i atamnych elektrastancyj, rostam uzroŭniu žyćcia i źnižeńniem vybarčaha ŭzrostu da 18 hadoŭ, ale bolš za ŭsio — pahłybleńniem jeŭraatłantyčnaj intehracyi.

U 1975 hodzie jon arhanizavaŭ u Rambujie pad Paryžam pieršuju sustreču lidaraŭ siami viadučych industryjalnych demakratyj (G7).

Adnačasova jon praciahvaŭ padtrymlivać asablivyja adnosiny z SSSR, jakija dastalisia jamu ad de Hola i Pampidu. Z usich lidaraŭ Zachadu ŭ jaho byŭ samy davierny kantakt ź Leanidam Brežnievym, jaki navat abmiarkoŭvaŭ ź im svajo zdaroŭje.

Jašče bolš ciesna jon zbliziŭsia z kamunistyčnym lidaram Polščy Edvardam Hierekam, jaki pravioŭ dziacinstva ŭ Francyi i Bielhii z baćkam-šachcioram i svabodna vałodaŭ francuzskaj.

U 1981 hodzie mała chto sumniavaŭsia, što Žyskar d'Esten, jakomu było ŭsiaho 55, pieraabiarecca na druhi siamihadovy termin, ale jon prajhraŭ svajmu viečnamu kankurentu Miteranu. 

Suprać Žyskar d'Estena pracavaŭ arystakratyzm, schavać jaki nie mahli źmiena kaściuma na švedar i ihra na akardeonie.

U pamierłaha zastalisia dva syny i dźvie dački. 61-hadovy Łui źjaŭlajecca meram małoj radzimy d'Estenaŭ — maleńkaha haradka Šamaljer u Avierni.

U 1970-ja francuzy abmiarkoŭvali ramantyčnyja adnosiny Žyskar d'Estena i vykanaŭcy hałoŭnaj roli ŭ znakamitym filmie «Emanuel» Silvii Krystel, ź jakich jany sakretu nie rabili.

Pry Pampidu karcina była zabaronienaja da pakazu na šyrokim ekranie jak zanadta seksualna adkrytaja. Žyskar d'Esten, pryjšoŭšy da ŭłady, reabilitavaŭ jaje, i jana ŭvajšła ŭ knihu Hinesa, pratrymaŭšysia ŭ repiertuary paryžskich kinateatraŭ 11 hadoŭ.

• 0
• 0
• 0
• 0
• 0
• 0
• 0
• 0