Pra vizit u Miensk rasijskaha premjera piša ahladalnik BiełaPAN Andrej Fiodaraŭ.
Adrazu ž paśla pražskaha samitu, na jakim była zaćvierdžanaja prahrama «Uschodniaje partniorstva», biełaruskija vysokapastaŭlenyja asoby stali padkreślivać prahmatyčnuju skiravanaść supracoŭnictva. Heta moža vyklikać niehatyŭnuju reakcyju Brusiela.
Adnačasova hučyć dosyć rezkaja krytyka na adras Rasii. U suviazi z hetym uźnikaje pytańnie, na što raźličvaje aficyjny Minsk, kali ŭstupaje ŭ kanfrantacyju adrazu z abodvuma bakami, jak minimum adzin ź jakich žyćciova nieabchodny jamu ŭ jakaści stratehičnaha partniora.
Badaj što najbolš vyrazna abodva hetyja padychody vyjavilisia ŭ adkazach Alaksandra Łukašenki na pytańni žurnalistaŭ padčas jaho rabočaj pajezdki ŭ Mahiloŭskuju vobłaść 22 maja.Tak, nakont «Uschodniaha partniorstva» było adkryta skazana, što ŭ hetaj inicyjatyvie biełaruskija ŭłady pryciahvaje najpierš pierśpiektyva peŭnych ekanamičnych vyhod: «My žadajem atrymać u hetym prajekcie toje, na što raźličvajem. Heta značyć supracoŭnictva pa takich pytańniach, jak darohi, trubapravody, infrastrukturnyja prajekty i hetak dalej».
U toj ža čas zakliki abjadnanaj Jeŭropy pačać praviadzieńnie reformaŭ u halinie demakratyi i pravoŭ čałavieka byli nazvanyja «bałbatnioj». Bolš za toje, joj prapanavana pahladzieć i paspračacca, «u kaho demakratyi bolš». Tym samym Zachadu zrobleny sihnał, što nie varta čakać jakich‑niebudź istotnych zruchaŭ va ŭnutranaj palitycy biełaruskich uładaŭ.
Miarkujučy pa ŭsim, u Minsku raźličvajuć, što ES nie budzie praźmierna piedalavać pravaabarončuju tematyku. Zusim vierahodna, što takija raźliki majuć pad saboj padstavy. Najaŭnaść demakratyčnych dziaržaŭ na miežach Jeŭrapiejskaha sajuza, biezumoŭna, uvachodzić u lik jaho pryjarytetaŭ, adnak naŭrad ci źjaŭlajecca daminujučym faktaram u adnosinach ź imi. Tym bolš ciapier, kali ŭ Jeŭrasajuza aznačyłasia prykmietnaje astudžeńnie ŭ adnosinach ź jaho «zaklatym siabram» — Rasijaj, što nahladna prademanstravaŭ ich apošni samit u Chabaraŭsku.
U takoj situacyi Brusiel, razumiejučy, što zanadta mocny nacisk moža pryvieści da niepažadanaha dla jaho zbližeńnia Biełarusi ź jaje ŭschodniaj susiedkaj, moža pakinuć biez uvahi niekatoryja dziejańni biełaruskaha kiraŭnictva, drenna ŭzhodnienyja z ahulnapryniatymi standartami demakratyi. Što, ułasna kažučy, užo mieła miesca padčas padrychtoŭki da samitu «Uschodniaha partniorstva».
Zrazumieła, ciarpieńnie Jeŭropy nie biaźmiežnaje, i ŭ vypadku jakich‑niebudź aburalnych parušeńniaŭ niejkija sankcyi, treba ličyć, źjaviacca ŭśled.Dumajecca, zrešty, što ŭ biełaruskich viarchach heta taksama dosyć dobra ŭśviedamlajuć, a tamu pasprabujuć paźbiahać uźniknieńnia takoha rodu situacyj.
Tak što, chutčej za ŭsio, stan spraŭ, kali Jeŭropa budzie pravodzić svaju siońniašniuju palityku, kali asnoŭny ŭpor robicca na pastupovuju transfarmacyju režymu, budzie zachoŭvacca jašče doŭha. Zrazumieła, što heta nie vielmi zadavalniaje častku biełaruskaj apazicyi, adnak jakoj‑niebudź pryncypova inšaj stratehii, akramia izalacyi, jakaja nie pryniesła na praciahu mnohich hadoŭ surjoznaha pośpiechu, pa sutnaści, nichto nie prapanoŭvaje. Praŭdu kažučy, niama ŭpeŭnienaści, što ŭ sučasnych biełaruskich umovach niejkaja mocnaja alternatyŭnaja stratehija naohuł isnuje.
Što ž da adnosin z Rasijaj, to Alaksandr Łukašenka ŭ minułuju piatnicu zaznačyŭ, što jaje pavodziny, hałoŭnym čynam, «nievykanańnie damoŭlenaściaŭ, dasiahnutych na samym vysokim uzroŭni», stavić pad pytańnie samu sajuznuju intehracyju. Maskva adkazvaje paprokami ŭ parušeńni abiacańniaŭ, u tym liku pa pytańni pryznańnia niezaležnaści Abchazii i Paŭdniovaj Asiecii.
Zrazumieła, što mahčymaściaŭ upłyvać na sajuźnika ŭ Kramla značna bolš, čym naadvarot.
U hetym płanie vielmi važnym moža stacca vynik čakanaha pryjezdu ŭ Minsk 28 maja Uładzimira Pucina, jaki paabiacaŭ pravieści «hruntoŭnuju razmovu ab sajuźnickich adnosinach».Pryčym u adpaviednaści ź jaho papiarednimi zajavami składvajecca ŭražańnie, što jon pryjedzie ŭ bolšaj stupieni z «bizunom», čym z «piernikam».
Sumniŭna, kab našy ŭłady źbiralisia vieści krainu ŭ śvietłuju budučyniu z vykarystańniem lubimaha dziecišča Kim Ir Siena — nieśmiarotnaj idei čučchie, abo apory vyklučna na ŭłasnyja siły. Navat zvyštalerantnaje biełaruskaje nasielnictva na heta, mabyć, nie pahodzicca. Tamu bolš vierahodnym vyhladaje mierkavańnie, pavodle jakoha idzie čakańnie, chto z patencyjalnych partnioraŭ zrobić bolš vyhadnuju prapanovu.
Kamientary