U Breście dali dva hady chatniaj chimii za «abrazu pradstaŭnika ŭłady» ŭ miesiendžary
Sud Maskoŭskaha rajona horada Bresta ahučyŭ vyrak Alaksandru Hłazyrynu, jakoha abvinavacili ŭ ździajśnieńni złačynstva, praduhledžanaha art. 369 Kryminalnaha kodeksa.
Jaho pryznali vinavatym i pryznačyli dva hady abmiežavańnia voli biez nakiravańnia ŭ papraŭčuju ŭstanovu — «chatniaj chimii». Spravu razhledzieła sudździa Viera Fiłonik. Dziaržabvinavaŭca — prakuror Dajneka, paviedamlaje spring96.org.
Paciarpieły — supracoŭnik AUS administracyi Leninskaha rajona Bresta Pavieł Tasojeŭ.
Alaksandra Hłazyryna abvinavacili ŭ tym, što 18 kastryčnika 2020 hoda jon naŭmysna abraziŭ pradstaŭnika ŭłady ŭ suviazi z vykanańniem im słužbovych abaviazkaŭ, raźmiaściŭšy paviedamleńnie ŭ telehram-kanale «Briest 97%». Vina Hłazyryna, pa słovach prakurora, paćvierdžana śviedčańniami abvinavačanaha, paciarpiełaha i śviedak, pratakołam ahladu miesca złačynstva, ahladam dakumientaŭ, vysnovami ekśpiertaŭ.
Alaksandr Hłazyryn pryznaŭ vinu całkam. Skazaŭ, što ŭbačyŭ u čacie paviedamleńnie z prośbaj apaznać pa fotazdymkach dvuch asob, jakija zatrymlivali mirnych hramadzian. Na adnym ź ich jon paznaŭ siabra dziacinstva Paŭła.
«Ja byŭ zły praź situacyju ŭ krainie, — skazaŭ Hłazyryn. — Tamu prakamientavaŭ hety fotazdymak i nastupny, dzie Pavieł byŭ u formie. Spačatku ja nie byŭ upeŭnieny, što jon supracoŭnik milicyi. Chacia da dziasiataha žniŭnia ja adnosiŭsia da milicyi niejtralna. Maje dziejańni tyčylisia kankretnaj fatahrafii i nie mieli na mecie pryčynić škodu ŭładzie ŭ šyrokim sensie. Zaraz ja raskajvajusia: zrabiŭ heta praz emocyi, ździejśniŭ hłupstva».
Pavieł Tasojeŭ raspavioŭ, što 18 kastryčnika paśla słužby ŭbačyŭ u kanale svaje fotazdymki i fotazdymki byłoj žonki.
«Stała kryŭdna, bo ničoha drennaha ludziam nie zrabiŭ, — skazaŭ jon. — Navošta abražać publična? Ja paviedamiŭ kiraŭnictvu, napisaŭ zajavu. Liču, što kamientar pryčyniŭ škodu majmu aŭtarytetu».
Sud taksama zasłuchaŭ śviedku pa spravie, daśledavaŭ piśmovyja materyjały spravy, u tym liku ekśpiertyzu. Zhodna ź joj, u tekście paviedamleńniaŭ Hłazyryna ŭtrymlivajecca niehatyŭnaja acenka asoby, a taksama pieraličanyja ŭsie stylistyčnyja srodki, z dapamohaj jakich heta było dasiahnuta.
Advakat paprasiŭ uličyć, što złačynstva, kvalifikavanaje Hłazyrynu, nie ŭjaŭlaje hramadskaj niebiaśpieki, a taksama asobu abvinavačanaha i jaho stanoŭčuju charaktarystyku pa miescy pracy.
«Jaho biezdakornyja pavodziny ciaham niekalkich miesiacaŭ — pamknieńnie da zakonapasłuchmianaha ładu žyćcia. Pry takich abstavinach majucca padstavy dla prymianieńnia ŭ adnosinach da jaho artykuła 79 Kryminalnaha kodeksa i vyniasieńnia abvinavaŭčaha vyraku biez pakarańnia», — adznačyŭ abaronca.
Abvinavaŭca adznačyŭ, što Hłazyryn razumieŭ hramadskuju niebiaśpieku svaich dziejańniaŭ, i pryjšoŭ da vysnovy, što jon vinavaty ŭ ździajśnieńni złačynstva. Prakuror Dajneka zaprasiŭ dla abvinavačanaha dva hady abmiežavańnia voli biez nakiravańnia jaho ŭ papraŭčuju ŭstanovu — «chatniaj chimii». Mienavita taki vyrak i vynies sud.
Ciapier čytajuć
Łukašenka raskazaŭ pra zabojstva apazicyjaniera, jakoje nibyta adbyłosia try dni tamu9
Kamientary