Z 6 červienia zabaronieny ŭvoz u Rasiju kala 500 vidaŭ biełaruskaj małočnaj pradukcyi.
Rasspažyŭnahlad zabaraniŭ uvoz u Rasiju amal 500 vidaŭ biełaruskaj małočnaj pradukcyi. Zabarona dziejničaje z 6 červienia, paviedamlaje RIA Novosti.
Jak zajaviŭ žurnalistam hałoŭny dziaržaŭny sanitarny doktar RF Hienadź Aniščanka, heta źviazana z tym, što biełaruskija vytvorcy nie pieraaformili dazvolnuju dakumientacyju ŭ adpaviednaści z patrabavańniami techničnaha rehłamientu, jakija nabyli moc jašče ŭ śniežni 2008 hoda.
«Sa škadavańniem treba zaznačyć, što, niahledziačy na vykazanuju tryvohu adnosna taho, što biełaruskija vytvorcy małaka nie śpiašajucca vykonvać rasijskaje zakanadaŭstva i nie afarmlajuć dazvolnuju dakumientacyju ŭ adpaviednaści z techrehłamientam, naležnaj reakcyi nie było», — cytuje Aniščanka RIA Novosti.
Pavodle jaho słoŭ, na hety čas amal 500 vidaŭ małočnaj pradukcyi ź Biełarusi, jakaja pastaŭlajecca ŭ Rasiju, nie majuć aformlenych pa novych praviłach dakumientaŭ.«Hetaja akaličnaść zmušaje nas adekvatnym čynam adreahavać. Siońnia ja padpisaŭ adpaviedny list na adras Fiederalnaj mytnaj słužby, što aznačaje, što dostup hetaj pradukcyi na ŭsiu terytoryju Rasii spynieny», — zajaviŭ Aniščanka.
Varta nahadać, što mienavita Raśsielhasnahlad byŭ u svoj čas instrumientam uviadzieńnia faktyčna palityčnych sankcyj suprać Hruzii. Małdovy i Ŭkrainy.
Tema pastavak małočnaj pradukcyi abmiarkoŭvałasia 5 červienia ŭ Biełharodskaj vobłaści na sustrečy premjer-ministra Uładzimira Pucina z hubiernatarami centralnych abłaściej Rasii i pradstaŭnikami sielhaspradpryjemstvaŭ.
Pucin zajaviŭ pra nieabchodnaść farmiravańnia adzinych umoŭ davańnia datacyj sielhasvytvorcam Rasii i Biełarusi. U pryvatnaści, zaznačyŭ jon, datacyi, jakija Biełaruś daje svaim vytvorcam celnaha małaka, dasiahajuć 24%, u toj čas jak u Rasii hetyja datacyi składajuć tolki 3%.
U svaju čarhu, hubiernatar Biełharodskaj vobłaści Jaŭhien Saŭčanka paviedamiŭ, što impart celnaha małaka ź Biełarusi ŭ Rasiju składaje 2 młn. ton za hod. «Biełaruś siońnia źniščaje našu małočnuju halinu. Moža być, heta robicca metanakiravana», — vykazaŭ mierkavańnie hubiernatar.
Pucin pahadziŭsia z hetym častkova: «Heta, viadoma, robicca nie metanakiravana». «Ja pra heta [datacyi] Alaksandru Ryhoraviču skazaŭ. Jon čałaviek aryhinalny, adkaz u jaho byŭ taki: «Niachaj vašy nie piščać, niachaj źnižajuć vydatki», — skazaŭ premjer-ministr.
Rasiju razdražniaje, što Biełaruś padtrymlivaje ŭłasnych sielhasvytvorcaŭ na atrymanyja ŭ Rasii ž datacyi. Miž tym finansavy stan samoj Rasii padkasiła padzieńnie cenaŭ na naftu. Adnak za ŭviedzienymi «małočnymi sankcyjami» prahladajucca i palityčnyja matyvy.Pry Łukašenku ažyćciaviłasia tatalnaja rusifikacyja Biełarusi, ciapier Maskva žadaje pahłynuć krainu jašče i ekanamična, adnak u hetym sutyknułasia z procidziejańniem haspadarnikaŭ i administracyjnaha aparatu Biełarusi.
5 červienia ŭ Pieciarburzie vice-premjer Rasii Alaksiej Kudryn abvieściŭ, što Maskva ličyć «niemetazhodnymi» pieramovy pra nadańnie Biełarusi pazyki na 100 miljardaŭ rasijskich rubloŭ. Adnačasova jon paviedamiŭ, što nie adrakajecca pieramovaŭ ab vydzialeńni raniej paabiacanaha kredytu na 500 młn dalaraŭ.
Hałoŭnaja sanitarnaja doktarka Biełarusi Valancina Kačan abvieściła, što ŭ aŭtorak, razam z pradstaŭnikami Minsielhascharču Biełarusi, vypravicca ŭ Maskvu dla pieramovaŭ z Hienadziem Aniščankam. Miž tym niaŭzbrojenym vokam vidać, što na hety raz sprava ŭ palitycy, a nie ŭ bakteryjach.
Pratasievič jeździŭ da Babaryki ŭ kałoniju niekalki razoŭ3
Kamientary