Šakucin ryzykuje paŭtaryć los Čyža — jeŭrapiejskija sankcyi razvalvajuć biznes
Paśla ŭviadzieńnia sankcyj suprać Alaksandra Šakucina, adnaho z hałoŭnych akcyjanieraŭ «Amkadora», ad supracoŭnictva z kampanijaj pačynajuć admaŭlacca jeŭrapiejcy, heta ŭžo adčuvajecca ŭ Biełarusi. Razam ź niapeŭnym stanoviščam «pry dvary» budučynia jaho biznes-impieryi vyhladaje tumanna.
Choć pakul nie ŭvodzilisia sankcyi suprać jurydyčnych asob, padkantrolnych Šakucinu, zachodniki vielmi časta spyniajuć supracoŭnictva z kampanijami taksičnych ułaśnikaŭ. I pytańnie nie tolki ŭ reputacyjnych i palityčnych ryzykach.
Kali suprać kampanij padsankcyjnaha biznesmiena ŭsio ž uviaduć abmiežavańni, to niemahčymaść praz heta vykanać kantrakty pierad kontrahientami paciahnie vialikija štrafy. Tamu zachodniki strachujucca.
I chacia Šakucin u razmovie z presaj praciahvaje nastojvać na «nieadčuvalnaści sankcyj», užo viadomyja kankretnyja prykłady admovy ad supracoŭnictva.
Padobnaja infarmacyja, naprykład, prychodzić z zavoda «Amkadora» ŭ Maładziečnie.
«Jość prablemy z kamplektujučymi ź Jeŭropy. U Maładziečna ŭžo dakładna niama pastavak z zavoda finskaj kampanii Kesla, — kažuć rabotniki zavoda. — Ich detali patrebnyja dla kabin lesapramysłovaha kompleksu, jakija pastaŭlajucca ŭ Kareliju.
Peŭny zapas kamplektujučych jość, pakul zavod pracuje ź imi, ale jany chutka skončacca i budzie prablema: ci šukać alternatyŭnych pastaŭščykoŭ vialikich i składanych detalaŭ — a heta niaprosta, ci pieraaryjentoŭvacca na vyrab niečaha inšaha».
Taksama ŭ Redakcyju trapiŭ anhłamoŭny list ad «kalektyvu rabotnikaŭ chołdynha «Amkador» da jeŭrapiejskich partnioraŭ kampanii.
U im kanstatujecca:
— abmiežavańnie raboty chołdynha na terytoryi ES i niemahčymaść usich finansavych apieracyj;
— abmiežavańnie zakupak instrumientaŭ i kamplektujučych.
U razmovie z karespandentam «Našaj Nivy» pa pytańniach jeŭrapiejskich pastavak Alaksandr Šakucin adkazvaŭ uzajemavyklučeńniami.
«Ni z čym niama prablem, u Maładziečnie niama nijakich prablem, — skazaŭ jon, ale adrazu ž udakładniŭ: — Ź jeŭrapiejcami prablemy jość, ale heta tyja prablemy, jakija prymušajuć nas chutčej stvarać ułasnyja kamplektujučyja i nie źviartać uvahi na Zachad».
Razam z tym Šakucin nakinuŭsia na tych, chto ŭvodzić sankcyi.
«Tyja, chto ŭvodziać sankcyi, — złačyncy! Ludzi biez honaru i sumleńnia, viaduć złačynnuju dziejnaść u dačynieńni da biełaruskaha naroda: ludzi niedaatrymlivać hrošy, biudžet taksama, piensii niedafinansujucca. Jany amaralnyja [ludzi], i heta pachnie nie demakratyjaj, a ekstremizmam», — vyhavaryŭsia Šakucin.
My taksama spytalisia ŭ jaho pra los servisnych centraŭ Amkadora ŭ Jeŭrasajuzie, dzie absłuhoŭvajecca technika pradpryjemstva. Pa našaj infarmacyi, ich usiaho vosiem. Siervisnyja centry vysokarentabielnyja. Ale tolki pry ich isnavańni dla jeŭrapiejskich fiermieraŭ metazhodnaja masavaja zakupka biełaruskaj techniki. Kali centry zakryjucca, ramantavacca nie budzie jak, łohika ŭ nabyćci techniki «Amkadora» zhubicca.
«Nu tam ža zachodnija rabočyja pracujuć. Kali zakryjuć centry, to jany pojduć na vulicu. A tyja, chto kupiŭ techniku, buduć ź joj prastojvać», — adkazaŭ Šakucin, nie kankretyzavaŭšy, jakaja dakładna ciapier situacyja z servisnymi centrami, ci pracujuć jany zaraz.
Taksama Šakucin śćviardžaje, što ŭpaŭ košt akcyj tych partnioraŭ, jakija pierastali ź im pracavać.
«My mała zaležym ad Zachadu, ich dola kamplektujučych ad 5% da 7% pracentaŭ. Treba — pačniom rabić sami, ja prablem nie baču», — zapeŭnivaje Šakucin.
Ab tym, što «prablem u jaho niama», biznesoviec skazaŭ ź dziasiatak razoŭ ciaham piaci chvilin. Praŭda, jašče ŭ dakryzisnym 2019-m, pavodle danych aŭdytu chołdynha, patrabavalisia maštabnyja finansavyja ŭlivańni, kab niejak ažyć.
Ale navat kali admiežavacca ad historyi z «Amkadoram», składana znajści prykład pośpiechu.
U 2018-m Šakucin straciŭ adzin sa svaich uzornych aktyvaŭ — pakiet «Amkadora» ŭ škłoŭskim sielskahaspadarčym chołdynhu TAA «Kupałaŭskaje» apynuŭsia ŭ dziaržaŭnaj ułasnaści, choć inviestycyi ŭ tyja kompleksy z boku Šakucina byli šmatmiljonnyja.
Jak platkarać u biznes-kołach, hetaja dziŭnaja źmiena ŭłasnaści maje suviaź sa «spravaj miedykaŭ», u jakuju zaciahnuła brata Šakucina, dyrektara farmaceŭtyčnaj kampanii «Iskamied» Siarhieja Šakucina (farmacyja pierajšła jamu ŭ «spadčynu» ad Alaksandra — jon zajmaŭsia joj da sychodu ŭ vytvorčaść).
Niezrazumieły taksama los hihanckaha kompleksa «Šanter-Chił» na praśpiekcie Pieramožcaŭ, jaki Šakucin pačynaŭ budavać jašče ŭ 2016-m hodzie.
U 2021-m, va ŭmovach krachu ekanomiki, niezrazumieła, što rabić z 142 tysiačami kvadratnych mietraŭ. Jak viadoma «Našaj Nivie», pieraprafilavać kompleks pad žyllo — adzinaje, što realna ciapier pradać, — u Šakucina nie atrymałasia.
Sa słoŭ Šakucina «Narodnaj Voli» taksama viadoma, što jon niasie adkaznaść pa daŭhach pravalnaha chołdynha «Salea», dzie byŭ harantam. U vyniku na pryvatnuju majomaść Šakucina ŭ Biełarusi nakładzieny aryšt, vyjezd za miažu zabaronieny.
Čytajcie taksama. Šakucin: U mianie zabrali pravy, aryštavanaja majomaść, ja nie mahu vyjechać za miažu
Kali nie zdarycca niečaha ekstraardynarnaha, Šakucin ryzykuje paŭtaryć los Juryja Čyža. U pieršaj pałovie 2010-ch jany zajmali pieršaje i druhoje miesca ŭ rejtynhu samych paśpiachovych biznesmienaŭ krainy. Za nastupnyja hady Čyž pazbaviŭsia kampanij, zachras u daŭhach, pierastaŭ być upłyvovaj biznes-fihuraj.
Šakucin ža ŭžo apuściŭsia na 20-je miesca.
Čytajcie taksama. Fienomien Šakucina: jak viaskovy chłopiec staŭ adnym z najbahaciejšych biznesmienaŭ
Bajpoł nazvaŭ imiony mahčymych zabojcaŭ Andreja Zielcera. I zajaviŭ, što siłavika «Nirvanu» zastreliŭ svoj ža6
Kamientary