Taksama hałoŭny trenier zbornaj Biełarusi vykazaŭ abureńnie małoj kolkaści hledačoŭ, što pryjšła na matč u Barysavie.
«Važnym testam» nazvaŭ tavaryski matč z Małdovaj hałoŭny trenier zbornaj Biełarusi pa futbole Biernd Štanhie. Hulnia prajšła 10 červienia ŭ Barysavie i zaviaršyłasia ŭničyju 2:2 (Radzivonaŭ, 4, Bliźniuk, 27 — Kalinkaŭ, 77, Andronik, 83).
«Siońnia zbornaja pakazała dva abliččy. U pieršym tajmie jana prademanstravała kłas, a ŭ druhim zhulała adkryta drenna», — zajaviŭ trenier na pres‑kanfierencyi paśla matču.
Pavodle jaho słoŭ, u pierapynku byli zamienienyja Alaksandr Kulčy i Cimafiej Kałačoŭ, jakija ŭ subotu zhulajuć u matčy čempijanatu Rasii. «Paśla hetaha my stracili inicyjatyvu. Futbalisty, jakija hulali ŭ druhim tajmie, zmahli ŭbačyć, jak daloka jany ad mižnarodnaha ŭzroŭniu», — zajaviŭ B.Štanhie.
Niamiecki śpiecyjalist «krychu rasčaravany», što jaho kamanda nie pieramahła.
«Navat kali heta trenirovačny matč, treba vučycca vyjhravać, nie spyniacca, a zabivać, treci, čaćviorty miač», — padkreśliŭ B.Štanhie.
Matč z Małdovaj staŭ apošniaj pravierkaj pierad pajadynkam adboračnaha turniru čempijanatu śvietu‑2010 suprać Charvatyi 12 žniŭnia ŭ Minsku.
«Kali da hetaha času ŭ nas buduć usie zdarovyja, a hledačy buduć zacikaŭlenyja ŭ matčy, možna budzie nastrojvacca na aptymistyčny ład», — skazaŭ trenier.
B.Štanhie paviedamiŭ, što adpraŭlajecca ŭ Šviecyju na finalny turnir maładziožnaha čempijanatu Jeŭropy, što projdzie z 15 pa 29 červienia. «Tam hulajuć šeść futbalistaŭ nacyjanalnaj zbornaj, i dla mianie važna pahladzieć na ich», — adznačyŭ B.Štanhie.
Hałoŭny trenier zbornaj Małdovy Ihar Dabravolski nazvaŭ hulniu svaich padapiečnych «aburalnaj», pieršym čynam u abaronie. «Kali b biełarusy zabili jašče miačy try, ja b nie ździviŭsia. Nam pašancavała, što pieršy tajm skončyŭsia z takim likam. My dapuścili šmat pamyłak, ale dla hetaha i isnujuć tavaryskija matčy», — zajaviŭ trenier.
***
Hałoŭny trenier zbornaj Biełarusi pa futbole Biernd Štanhie taksama vykazaŭ ździŭleńnie nievialikaj kolkaściu hledačoŭ na tavaryskim matčy.
Stadyjon u Barysavie, raźličany na 5,5 tys. hledačoŭ, byŭ zapoŭnieny tolki na tracinu.
«Jak čužaziemiec ja naohuł hetaha nie razumieju, — zajaviŭ Štanhie na pres‑kanfierencyi paśla matču. — Mahčyma, mnie chto‑niebudź rastłumačyć, čamu paśla dvuch adboračnych matčaŭ čempijanatu śvietu, dzie my zabili 10 miačoŭ, nichto nie pryjšoŭ pahladzieć na hulniu našych zorak, jakija atrymlivajuć miljony, u tym liku Alaksandra Hleba. Ja takoha nie mahu ŭjavić».
Pavodle słoŭ Štanhie, heta pytańnie jon maje namier padniać u Biełaruskaj fiederacyi futboła. Pry hetym trenier nie zmoh adkazać, ci źjaŭlajecca pryčynaj nizkaj cikavaści da matču vysoki košt biletaŭ (10—20 tys. rubloŭ).
Ciapier čytajuć
Łukašenka: Abmiarkoŭvajem z ZŠA vyzvaleńnie palitviaźniaŭ11
Kamientary