U minułuju niadzielu ŭ rasijskim «Što? Dzie? Kali?» hulała kamanda Barysa Biełaziorava, ale ŭ abnoŭlenym składzie. Siarod tych, chto nie ŭziaŭ udziełu ŭ hulni, akazaŭsia biełaruski znaŭca Anton Iokaŭ.
U čym ža pryčyna? «Inicyjatyva nie maja, tak vyrašyła kiraŭnictva «Što? Dzie? Kali?» u adnabakovym paradku». Pra pryčyny lepš spytać u tranślacyjach, pytańnie nie da mianie», — napisaŭ u instahramie Iokaŭ.
Viadoma, što na ciapierašni momant Iokaŭ vykonvaje rolu treniera kamandy Biełaziorava, jon spadziajecca viarnucca ŭ hulniu, ale ŭžo ŭ składzie inšaha kalektyvu. Viadučy «Što? Dzie? Kali?» Barys Kruk u efiry patłumačyŭ źmieny ŭ kamandzie słabym vystupleńniem u minułym siezonie, ale nichto nie pavieryŭ u hetuju viersiju.
Niekatorymi hledačami vykazvajecca zdahadka, što ban Iokava źviazany ź jahonaj hramadzianskaj pazicyjaj. Letam-vosieńniu 2020 hoda jon aktyŭna padtrymlivaŭ akcyi pratestu, jakija adbyvalisia ŭ Biełarusi, pra što šmat pisaŭ u sacyjalnych sietkach.
Kamanda Illi Barady, u jakoj hulaŭ Anton Iokaŭ, nie budzie brać udziełu ŭ novaj sieryi hulniaŭ biełaruskaha «Što? Dzie? Kali?». Praz pryncypovuju pazicyju mnohich znaŭcaŭ, jakija nie chacieli zdymacca ŭ hulniach na telekanale ANT, całkam byli admienienyja vosieńskaja i zimniaja sieryi ŭ Biełarusi. U viasieńniaj buduć vystupać užo zusim novyja kamandy, daśviedčanych hulcoŭ tam budzie vielmi mała.
Antonu Iokavu 26 hadoŭ, jon minčuk. Vypusknik fakulteta prykładnoj matematyki i infarmatyki BDU. Pracuje analitykam. U biełaruskim «Što? Dzie? Kali?» uładalnik małoj Kryštalnaj savy jak najlepšy hulec viasieńniaj sieryi 2015 hoda.
Kamientary