Žonka palitviaźnia Kułakoŭskaha zajaviła, što jon prahłynuŭ łyžku, kab damahčysia dapamohi. Milicyja supakojvaje jaje, što jon ničoha nie hłytaŭ
Eks-milicyjanta Dźmitryja Kułakoŭskaha znoŭ adpravili na sutki. Žonka zmahła ŭbačyć jaho, kaža, što muž maje surjoznyja prablemy sa zdaroŭjem i navat prahłynuŭ łyžku, kab damahčysia dapamohi.
Voś što raspaviali blizkija da siamji Kułakoŭskich krynicy.
Dźmitryj Kułakoŭski ŭžo prysudžany da 2 hadoŭ chimii i čakaje, pakul jaho adpraviać adbyvać pakarańnie.
Tym nie mienš dniami jaho zatrymali i asudzili na 15 sutak za «niepadparadkavańnie». Uviečary 21 maja jaho žoncy pazvaniŭ dziažurny IČU Akreścina i paprasiŭ pryvieźci leki dla muža. U Kułakoŭskaha prablemy ź ciskam i dyjabiet, jamu treba kałoć insulin.
U subotu žonka Julija pryviezła leki, joj niečakana dali karotkaje spatkańnie z mužam, litaralna na 10-15 chvilin. Padčas jaho Kułakoŭski raspavioŭ, što znachodzicca ŭ karcary. Za što jon tam — nieviadoma. Pa słovach Dźmitryja, u karcar jaho kinuli adrazu, jak tolki pryvieźli na Akreścina. U karcary jon nie adzin — čaćviora ci piaciora čałaviek. Niemahčyma spać, bo niama miescaŭ, a padłoha — chałodny bieton. Žonka ŭbačyła, što muž u žudasnym stanie — praz dyjabiet ŭ Dźmitryja apuchłyja nohi, na ich jazvy.
Akramia taho, Kułakoŭski raspavioŭ žoncy, što prahłynuŭ mietaličnuju łyžku, kab jamu narešcie pačali akazvać miedycynskuju dapamohu. Jon kazaŭ, što łyžka ŭnutry jaho, ad hetaha taksama ŭžo pačynajucca boli.
Paśla hetaj sustrečy Julija Kułakoŭskaja pačała zvanić u 102 i 103. U vyniku joj pierazvanili z Maskoŭskaha RUUSa i paviedamili: chvalavacca nie treba, maŭlaŭ, vaš muž ničoha nie hłytaŭ, i ŭvohule na Akreścina jość miedyki. A kali jany nie spraviacca, to vykličuć chutkuju.
U paniadziełak, 24 maja, da Kułakoŭskaha ŭ IČU pajechaŭ advakat, ale jaho nie puścili.
Dzie siońnia jaje muž — u balnicy? U karcary Akreścina? — i ŭ jakim jon stanie, Julija nie viedaje. Ci sapraŭdy jon hłytaŭ tuju łyžku?
Na ŭmovy ŭtrymańnia Kułakoŭskaha i na niadopusk da jaho advakata siamja padała skarhu u HUUS, ciapier čakajuć adkaz.
Zatrymańnie i raptoŭny prysud stali niečakanaściu dla siamji Dźmitryja Kułakoŭskaha. U chutkim časie jon musiŭ jechać adbyvać dvuchhadovy termin na chimiju. Blizkija da jaho siamji kažuć, što mužčyna ničoha nie parušaŭ, ale miarkujuć, što zatrymańnie mahło być źviazana z udziełam u šou «Ščyra kažučy» na «Biełsacie». Akramia Kułakoŭskaha, tam vystupaŭ jašče adzin eks-milicyjant, Jahor Jemialjanaŭ. Ich abodvuch zatrymali na nastupny dzień paśla vychadu pieradačy.
Nahadajem, što Dźmitryj Kułakoŭski pracavaŭ načalnikam vyšuku Zavodskaha RUUS, paśla 9 žniŭnia jon zvolniŭsia. Na jaho zaviali kryminalnuju spravu nibyta za abrazu milicyjanta, zatrymlivali i zakryvali na sutki. U kastryčniku jon amal miesiac pravioŭ na Akreścina ŭ karcary. Umovy tam byli takimi, što jon hłytaŭ mietaličnyja pradmiety ŭ znak pratestu. Paśla Kułakoŭski sprabavaŭ źjechać ź Biełarusi, ale byŭ zatrymany na miažy, paśla jamu prysudzili dva hady chimii.
Kamientary