78-hadovuju piensijanierku aštrafavali na 4350 rubloŭ za ciulpan na miescy hibieli Tarajkoŭskaha
16 maja Halinu Ivanovu zatrymali kala simvaličnaha miemaryjała na miescy hibieli Alaksandra Tarajkoŭskaha kala stancyi mietro «Puškinskaja».
— Jakija ŭ vas padstavy nie daviarać sudu?
— Nijakich, ale i davieru nijakaha.
Z hetaha dyjałohu 31 maja pačaŭsia razhlad spravy 78-hadovaj Haliny Ivanovaj u sudzie Frunzienskaha rajona. Sudovy praces viała sudździa Maryja Jarochina, paviedamlajuć pravaabaroncy.
16 maja piensijanierku Halinu Ivanovu zatrymali kala miemaryjała Tarajkoŭskaha. Žančynu abvinavacili «ŭ pikietavańni, šlacham uźniaćcia ruki ŭvierch i ŭskładańnia adnaho ciulpana».
U raparcie ŭčastkovaha Frunzienskaha RUUSa skazana, što piensijanierka «ŭzdymała dva palcy ŭvierch kala darohi, uskładała kvietki i machała prajazdžajučym mašynam, čym parušyła zakon ab masavych mierapryjemstvach». Za heta «pravaparušeńnie» na žančynu skłali pratakoł pa č. 3 art. 24.23 KaAP, bo heta ŭžo paŭtornaje zatrymańnie za hod. Minułym razam Halinu Hierasimaŭnu zatrymali na Maršy piensijanieraŭ i aštrafavali na 600 rubloŭ. Štraf śpisali ź jaje piensii.
Halina Hierasimaŭna prakamientavała abvinavačvańnie:
— Ja była adna. Na Prytyckaha kasili travu, i tam ja znajšła ciulpan puchnaty. Ja takich pryhožych raniej nikoli nie bačyła, tamu adrazu zachacieła jaho dadomu zabrać, ale jon užo da hetaha času trochi padsoch. U śmietnik jaho vykinuć ruka nie padniałasia, tamu ja pakłała jaho da astatnich kvietak kala darohi i pajšła dalej. Ale mianie amal adrazu zatrymali. A darečy, ci jość zakon, jaki zabaraniaje kłaści kvietki?
Sudździa Jarochina aburyłasia pytańniem i paraiła spytać u jurystaŭ. Milicyjant na sudzie paćvierdziŭ, što asabista bačyŭ, jak piensijanierka kala darohi sprabavała pryciahnuć da siabie ŭvahu kiroŭcaŭ. Halina Hierasimaŭna, słuchajučy pakazańni śviedki, śmiajałasia i nie razumieła, jak jon moža chłusić, hledziačy joj u vočy.
Zasłuchaŭšy pakazańni śviedki i prahladzieŭšy materyjały spravy, sudździa Maryja Jarochina pryniała rašeńnie aštrafavać Halinu Ivanovu na 4350 rubloŭ (150 bazavych).
Ciapier čytajuć
«Pračytajcie jaje historyju». Łukašenku daviałosia apraŭdvacca pierad Pucinym za hieorhijeŭskija stužki10
Kamientary