Stykier z «Pahoniaj» u telehramie sudździa z Dobruša rascaniła jak adzinočny pikiet i prysudziła amal 3000 štrafu
Sudździa Dobrušskaha rajonnaha suda Śviatłana Łukjanava pakarała takim vializarnym štrafam 49-hadovuju Vieraniku Drabyšeŭskuju. Žančyna naprykancy žniŭnia ŭ miascovym telehram-kanale źmiaściła stykiery z «Pahoniaj» i łozunham «Žyvie Biełaruś». Sudździa paličyła heta adzinočnym pikietam i pakarała žančynu pa art. 24.23 KaAP RB («Parušeńnie paradku arhanizacyi ci praviadzieńnia masavych mierapryjemstvaŭ»).
Pratakoł ab administratyŭnym pravaparušeńni za stykiery ŭ internecie skłaŭ učastkovy AUSa Dobrušskaha rajona na padstavie raparta namieśnika načalnika AUSa Mikałaja Mastavienki, jaki padčas manitorynhu telehram-čata «Dobruš dla žyćcia» znajšoŭ, na jaho dumku, niezakonnyja stykiery.
«Jon mnie ŭ milicyi skazaŭ, što spałučeńnie biełaha i čyrvonaha koleraŭ u nas u krainie zabaroniena, — zhadvaje Vieranika Drabyšeŭskaja, — jak i vyjava hierba «Pahoni». Ja spytała ŭ jaho, moža ŭ nas užo ŭsio zabaroniena i dumać taksama. Jon adkazaŭ, što možna dumać jak chočaš, ale nie treba heta vykazvać. Padčas razmovy jon byŭ zadavoleny i ščaślivy. Vidać, raskryŭ spravu stahodździa».
Vieranika Drabyšeŭskaja (ź jaje archiva)
Padčas suda Vieranika Drabyšeŭskaja viny svajoj nie pryznała i źviarnuła ŭvahu sudździ Łukjanavaj, što ŭ 2007 hodzie hierb «Pahonia» pryznany ŭradam Biełarusi niemateryjalnaj historyka-kulturnaj kaštoŭnaściu i za jaje paškodžańnie praduhledžana navat kryminalnaja adkaznaść. Ale sudździa pahadziłasia z tekstam pratakoła, što dabrušanka, jakaja raźmiaściła dva stykiery ŭ telehram-kanale, takim čynam «vykazvała svaje hramadska-palityčnyja intaresy i vystupała arhanizataram hetaha pikieta», i prysudziła 100 bazavych vieličyniaŭ štrafu (2900 rubloŭ).
Vieranika Drabyšeŭskaja niekalki tydniaŭ tamu zvolniłasia z pracy i ciapier u pošukach novaj pracy. U jaje niama anijakaj mahčymaści apłacić taki vialiki štraf.
Siłaviki ŭzialisia za karystalnikaŭ tvitara — dziasiatki akaŭntaŭ zvyčajnych biełarusaŭ stali «ekstremisckimi»10
Kamientary