U «spravie Cichanoŭskaha» źmianiŭsia sudździa. Ci pačnuć spravu razhladać spačatku?
U budynku homielskaha SIZA ŭžo try miesiacy ŭ zakrytym režymie prachodzić sud nad šaściu palitviaźniami: Siarhiejem Cichanoŭskim, Iharam Łosikam, Mikałajem Statkievičam, Uładzimiram Cyhanovičam, Arciomam Sakavym i Dźmitryjem Papovym. Hetyja miesiacy spravu razhladaŭ sudździa Homielskaha abłasnoha suda Mikałaj Bakunoŭ, ale 7 vieraśnia Łukašenka padpisaŭ ukaz ab pryznačeńni Bakunova na pasadu staršyni suda Čyhunačnaha rajona Homiela. Pa infarmacyi pravaabaroncaŭ, ciapier spravu razhladaje inšy sudździa — Mikałaj Dola.
Viadoma, što svaju karjeru sudździ Dola pačaŭ u Rečycy. U 2011 hodzie jon aštrafavaŭ kiraŭnika Homielskaj abłasnoj arhanizacyi ruchu «Za svabodu» Piatra Kuźniacova (ciapier viadomy jak zasnavalnik «Silnych novostiej») na 20 bazavych vieličyń za «parušeńni zakanadaŭstva pra druk i inšyja srodki masavaj infarmacyi».
Supracoŭniki DAI spynili mašynu Kuźniacova pa darozie ŭ Rečycu i dahledzieli jaje. Tam ubačyli zvyš piaci tysiač ulotak «Znaju!» pra śniežańskija padziei ŭ Minsku. Sudździa Mikałaj Dola pastanaviŭ, što ŭlotki «Znaju!» źjaŭlajucca pieryjadyčnym vydańniem, jakija raspaŭsiudžvałasia padčas jazdy na aŭtamašynie. Za heta jon i pakaraŭ Piatra štrafam.
U 2014 hodzie Mikałaja Dolu pieraviali z pasady sudździ Rečyckaha rajona adrazu na pasadu sudździ Homielskaha abłasnoha suda, dzie jon pracuje i pa hety dzień. Piacihadovy termin apošni raz padaŭžaŭsia dva hady tamu — 3 kastryčnika 2019 hoda. Ciapier Dola ŭvachodzić u kalehiju Homielskaha abłasnoha suda pa kryminalnych spravach.
Ci budzie sprava razhladacca spačatku?
U adpaviednaści z zakanadaŭstvam, kali sudździa sychodzić z pasady da zakančeńnia razhladu spravy, to sudovy praces musić pačacca spačatku. Zhodna z artykułam 288 Kryminalna-pracesualnaha kodeksa, u vypadku niemahčymaści kaho-niebudź z sudździaŭ praciahvać udzielničać u sudovym razhladzie jon zamianiajecca inšym sudździoj, i raźbiralnictva kryminalnaj spravy pačynajecca spačatku, za vyklučeńniem vypadkaŭ, praduhledžanych artykułam 289 KPK.
Artykuł 289 KPK adsyłaje nas da situacyi, kali razhlad spravy prachodzić kalehijalna. Jak tłumačyć juryst «Viasny», fihurantam «spravy Cichanoŭskaha» staviać u vinu ciažkija składy złačynstva, adpaviedna, sprava razhladajecca sudździoj i dvuma narodnymi zasiadacielami.
Akramia hetaha, zhodna z zakanadaŭstvam, da kalehijalnaha razhladu kryminalnaj spravy, jaki patrabuje praciahłaha času dla sudovaha razhladu, mohuć pryciahvacca zapasny sudździa i narodny zasiadaciel. Jany prysutničajuć u zale sudovaha pasiadžeńnia z pačatku razboru hetaj spravy i ŭ vypadku vybyćcia adnaho z sudździaŭ abo narodnych zasiadacielaŭ zamianiajuć jaho. Pry hetym razhlad spravy praciahvajecca.
Tamu kali zapasny sudździa ŭvodziŭsia ŭ praces pieršapačatkova i prysutničaŭ pry kožnym pasiadžeńni, to sprava budzie razhladacca dalej. Kali ž zapasny sudździa adsutničaŭ choć by na adnym pasiadžeńni, to razhlad kryminalnaj spravy nieabchodna pačynać znoŭku.
Jak pieradała «Svabodzie» Maryna Adamovič słovy ź lista muža, adnaho ź fihurantaŭ spravy Mikałaja Statkieviča: «Nie chvalujsia, «dublor» byŭ ad pačatku, pryznačeńnie na novuju pasadu — jak uznaharoda».
Heta značyć, što razhlad kryminalnaj spravy suprać šaści palitviaźniaŭ praciahniecca. Ci chutka budzie vyniesieny prysud, pakul nieviadoma.
Pieršaja vice-mer Minska Nadzieja Łazarevič prajšła praz zatrymańnie, muž zastaŭsia ŭ SIZA11
Kamientary