Pierastrełka na Jakuboŭskaha, dzie zahinuli ajcišnik i kadebist: što viadoma na ranak
Takoha, kab supracoŭnik KDB byŭ zabity padčas śpiecapieracyi, u Biełarusi nie było apošnija hadoŭ 10 jak minimum. Pra ekstraardynarnuju padzieju paviedamili praŭładnyja telehram-kanały. Pryčym spačatku nieaficyjnyja. Potym užo stała viadoma pra 31-hadovaha ajcišnika Andreja Zielcera i jahonaha adnahodku, supracoŭnika KDB Dźmitryja z pazyŭnym «Nirvana». Što viadoma pra situacyju na ranak? Sabrali ŭsio ŭ adzin materyjał.
Jak raźvivalisia padziei?
19:37. U telehram-kanale źjaviłasia pieršaja publikacyja pra stralbu ŭ kvatery, padčas jakoj byŭ paranieny supracoŭnik KDB i zabity žychar kvatery. Papiarednie paviedamili imia i proźvišča zabitaha mužčyny — Andrej Zielcer, 32 hady, pracavaŭ u EPAM Systems.
20:00. Praŭładny TH-kanał paviedamlaje pra śmiarotnaje ranieńnie supracoŭnika KDB i raspačatuju kryminalnuju spravu pa art. 139 č. 2 «Zabojstva asoby ŭ suviazi sa ździajśnieńniem słužbovaj dziejnaści». Praŭładnyja kanały publikujuć zmantavanaje videa ź miesca padziej. Pryčym ź niekalkich rakursaŭ.
Taksama pavodle nieaficyjnaj infarmacyi, 28 vieraśnia na numar 102 prychodziła paviedamleńnie, što ŭ kvateru pa adrasie Jakuboŭskaha, 29 nieviadomyja łamajuć dźviery. A ŭ 13:40 pastupiła paviedamleńnie, što paranieny supracoŭnik KDB. To-bok zdareńnie adbyłosia ŭdzień, pra što paviedamili tolki amal praz 6 hadzin.
21:07—23:30. Jašče da aficyjnych kamientaroŭ Cledčaha kamiteta pra zdareńnie stali vykazvacca deputaty, praŭładnyja ekśpierty. Ahulnaja rytoryka: «nievierahodnyja pierajšli čyrvonyja linii», «reakcyja pavinna być žorstkaj», «treba ŭzmacnić kantrol miežaŭ», «režym mabilizacyi» i hetak dalej. Taksama dziaržaŭnyja orhany pačali publikavać spačuvańni siamji zahinułaha supracoŭnika KDB. Pa infarmacyi Biełta, da prystupak KDB u Minsku stali nieści kvietki.
23:31. Śledčy kamitet apublikavaŭ aficyjnuju zajavu. Ź jaje stała viadoma, što, pavodle papiaredniaj infarmacyi 28 vieraśnia, supracoŭniki KDB pravodzili «śpiecyjalnyja mierapryjemstvy pa adpracoŭcy adrasoŭ, pa jakich mahli znachodzicca asoby, što mahli mieć dačynieńnie da terarystyčnaj dziejnaści».
Pa infarmacyi SK, 31-hadovy žychar Minska paśla patrabavańniaŭ adčynić dźviery hetaha nie zrabiŭ i zabłakavaŭsia ŭ kvatery.
U Minsku mužčyna z palaŭničaj zbroi zastreliŭ supracoŭnika KDB, jaho zabili ŭ adkaz. Pierastrełka trapiła na VIDEA
«Z metaj dalejšaha tak zvanaha «chajpu» vioŭ videazdymku», — havorycca ŭ paviedamleńni. SK tłumačyć: mužčyna staŭ stralać i paraniŭ adnaho z supracoŭnikaŭ, u adkaz siłaviki strelili ŭ minčanina i zabili jaho. Supracoŭnika KDB advieźli ŭ balnicu, dzie jon pamior.
SK zajaviŭ taksama, što žonku minčanina, jakaja taksama zdymała ŭsio na videa, zatrymali. Jaje padazrajuć u saŭdziele ŭ zabojstvie.
Chto taki Andrej Zielcer?
Andreju Zielceru 31 hod, jon skončyŭ Instytut biznesu i prava ŭ Minsku. Apošnija 6 hadoŭ pracavaŭ u JERAM, da hetaha byŭ administrataram amierykanskaha VPN strongvpn.com.
Sam mužčyna byŭ prapisany ŭ Pieršamajskim rajonie, ale žyŭ u kvatery žonki na Jakuboŭskaha, 29. Heta stary panelny dom u mikrarajonie «Zachad».
Stała viadoma, chto stralaŭ u kadebešnika: 31-hadovy ajcišnik Andrej Zielcer
Viadoma, što Zielcer zaŭmaŭsia tryjatłonam i lubiŭ fiechtavańnie. Jon mieŭ dva akaŭnty ŭ instahramie. U adnym ź ich pradstaŭlaŭsia fatohrafam.
Mužčyna vykładvaŭ fotazdymki strelby ŭ sacyjalnych sietkach. Nie vyklučana, što jon stralaŭ mienavita ź jaje.
Taksama 17 žniŭnia minułaha hoda Zielcer raźmiaściŭ u instahramie dopis z nacyjanalnym bieła-čyrvona-biełym ściaham i podpisam, što «treba iści da kanca».
Pry hetym, pavodle infarmacyi «Jeŭraradyjo», ni z abjadnańniem byłych siłavikoŭ, ni z chakierami, što publikavali razmovy siłavikoŭ, mužčyna nie byŭ źviazany.
Što viadoma pra žonku i rodnych Zielcera?
Žoncy Zielcera 40 hadoŭ. Jana pracuje pradavačkaj. Mienavita jana była pobač z mužam, kali toj stralaŭ. I zdymała ŭsio, što adbyvajecca, na videa. Ciapier jana na Akreścina.
U pary jość syn. Jamu 8 hod. Padčas trahiedyi chłopčyk znachodziŭsia ŭ škole, jaho zabrała babula.
Maci Andreja pracuje vychavacielkaj u dziciačym sadku, baćka maje invalidnaść, raniej pracavaŭ jurystam u tavarystvie invalidaŭ «BiełTI».
Jak charaktaryzujuć Zielcera rodnyja i siabry?
«Andrej vielmi dobry čałaviek, vydatny ziać, — kaža Natalla, ciešča Andreja Zielcera. — Samy lubimy čałaviek. Spakojny, uvažlivy, razvažlivy, dobry. Zaŭsiody dapamahaje. Lubaja ciešča maryła b pra takoha ziacia».
Skul u jaho ružžo, jana nie viedaje.
«Samy lubimy čałaviek, nie vieru, što jon teraryst». Što kažuć rodzičy zabitaha Andreja Zielcera?
«Andrej byŭ vielmi spakojny, zaŭsiody adhukaŭsia na prośby ludziej. Ščyra, ja b skazała, što jon nikoli ŭ žyćci tak nie zrabiŭ by, prosta jaho zmusili abstaviny. Jon abaraniaŭ u pieršuju čarhu siabie, u druhuju čarhu — svaju žonku. Jon zaŭsiody byŭ spakojnym, zaŭsiody ŭśmichaŭsia. My nikoli nie zaŭvažali, što jon za štości pieražyvaje ci ŭ jaho niešta zdaryłasia», — raskazała «Radyjo «Svaboda» siabroŭka minčuka.
Jana adznačyła, što nie viedała, što ŭ jaho była zbroja, tamu była šakiravanaja, kali ŭbačyła videa.
Maci Andreja nie zmahła ničoha skazać, jana ŭ šoku: «Ničoha nie mahu skazać pra siońniašnija padziei. My nie razumiejem, što adbyłosia i adbyvajecca. Pakul nas nie čapajcie».
Što viadoma pra zabitaha supracoŭnika KDB?
Doŭhi čas pra jaho nie było viadoma ničoha. Tolki a 12-j hadzinie viečara ŭ praŭładnych telehram-kanałach paviedamili, što jaho zvali Dźmitryj, pazyŭny — Nirvana. 1990 hoda naradžeńnia. U jaho zastałasia žonka i 4-hadovaja dačka.
Ni proźvišča, ni pasada mužčyny nieviadomyja.
Jakija pytańni vyklikaje videa?
Apublikavanaje ŭ praŭładnych telehram-kanałach videa pakidaje šmat pytańniaŭ — jak techničnych, tak i maralnych.
Naprykład, ci realnaje heta videa? Chto stralaŭ pieršym?
Čamu prahramist i jaho žonka zdymali videa taho, što adbyvajecca? Čamu siłaviki «adpracoŭvali adrasy datyčnych da terarystyčnaj dziejnaści» biez broniekamizelek?
Čamu prahramist zdymaŭ videa, a siłaviki pryjšli biez broniekamizelek? Važnyja pytańni paśla stralaniny na Jakuboŭskaha
Siarod zatrymanych pa spravie pažaru ŭ viciebskim handlovym centry, vierahodna, jahony ŭładalnik2
Kamientary