Pandemija kavidu pavysiła vierahodnaść novaha suśvietnaha kryzisu — MVF
Terminovaja finansavaja padtrymka ekanomiki z boku dziaržaŭnych centrabankaŭ i ministerstvaŭ finansaŭ pavysiła vierahodnaść novaha finansavaha kryzisu. Pra heta papiaredžvaje Mižnarodny valutny fond.
U svajoj spravazdačy pa finansavaj stabilnaści ŭ śviecie, jakuju MVF vypuskaje kožnyja šeść miesiacaŭ, arhanizacyja patłumačyła miechanizmy, što vyklikajuć niebiaśpieku novaha kryzisu.
Zhodna z ekśpiertami, palityčnyja lidary byli vymušanyja pajści na kampramis pamiž nieabchodnaściu padtrymać ekanamičnuju aktyŭnaść i pry hetym praduchilić niepažadanyja nastupstvy i siarednieterminovyja ryzyki dla finansavaj stabilnaści, piša Guardian.
Padčas pandemii chutka vyraśli košty na damy ŭ roznych krainach śvietu. Adpaviednyja pracesy mieli miesca i z koštami akcyj — jak ličać ekśpierty, jany ŭvohule byli pieraacenienyja.
U takich umovach inviestary ŭsio bolš źviartajuć uvahu na ekanamičnyja pierśpiektyvy krain, dzie jany pracujuć. Usio heta adbyvajecca na fonie ŭzdymu kolkaści chvorych i niaŭpeŭnienaści ŭ tym, što adbudova ekanomiki mahčymaja.
Ekśpierty MVF padkreślivajuć, što varta źviarnuć uvahu na papieradžalnyja prykmiety ŭ ekanomicy — naprykład, na rost ryzyk u finansavaj śfiery i ŭraźlivaściaŭ u siektary niabankaŭskich finansavych ustanoŭ.
Takija źjavy ŭkazvajuć na paharšeńnie situacyi ź finansavaj stabilnaściu. Kali ničoha nie budzie zroblena, kab vypravić situacyju, hetyja momanty mohuć pieraraści ŭ bolš maštabnyja kryzisnyja źjavy, jakija pastaviać pad pahrozu ekanamičny rost i buduć vypraboŭvać suśvietnuju finansavuju sistemu na ŭstojlivaść.
Kamientary