U Biełarusi zafiksavali novy štam kavidu. Voś što pra jaho viadoma
U śviecie raspaŭsiudžvajecca novy varyjant kavidu. Zachodnija krynicy nazyvajuć jaho «delta plus», ale biełaruskija miedyki dali jamu nazvu «delta łajt». Aficyjna ž hety štam viadomy pad šyfram AY.4.2.
Stroha kažučy, «delta łajt» — heta nie zusim novy štam kavidu, a mutacyja štama «delta», sumna viadomaha za košt svajoj nadta lohkaj pieradačy. Najbolš aktyŭna «delta łajt» raspaŭsiudžvajecca ŭ Brytanii. Upieršyniu jon byŭ identyfikavany ŭ lipieni 2021 hoda i z hetaha času pačaŭ pavolna raspaŭsiudžvacca, piša VVS.
Pakul što navukoŭcy jašče vyvučajuć toje, nakolki lohka pieradajecca «delta łajt». Chutčej za ŭsio, štam sapraŭdy bolš zarazny, čym pieršapačatkovaja «delta», ale roźnica ŭ zaraznaści składaje nie bolš za 10%. Što datyčycca struktury virusnaj čaścinki, to AY.4.2 adroźnivajecca ad «delty» najaŭnaściu novych mutacyj u šypavidnym białku — elemiencie, z dapamohaj jakoha virus traplaje ŭ kletki.
U Brytanii «delta plus» abvieščanaja štamam, što znachodzicca pad pavyšanym kantrolem, ale SAAZ pakul što nie pryznała AY.4.2 varyjantam, jaki vyklikaje aściarohu. Kali b štam atrymaŭ taki status ad SAAZ, heta značyła b, što arhanizacyja ličyć jaho zdolnym chutka raspaŭsiudžvacca, vyklikać bolš ciažkaje ciačeńnie chvaroby, čym inšyja štamy, abo nie reahavać na vakcyny. Pakul niama prykmiet, što «delta łajt» zdolnaja na heta.
Cimptomy
Ličycca, što bolšaść simptomaŭ AY.4.2 supadaje z prykmietami «delty». Hety štam, u svaju čarhu, maje inšyja simptomy, čym pieršapačatkovy štam kavidu «alfa». Naprykład, dla «delty» charakternyja hałaŭny bol, nasmark i bol u horle, u toj čas jak «alfa» čaściej prajaŭlajecca praz kašal, lichamanku i stratu pačućciaŭ smaku ci niuchu.
Adnak jość danyja i pra simptomy, što charakternyja mienavita dla «delty łajt». Takimi nazyvajuć bol u žyvacie, młosnaść i vanity, stratu apietytu, bol u sustavach i prablemy sa słycham.
Pakul što miedyki nie bačać pryčyn panikavać praz źjaŭleńnie novaha štama. Varta praciahvać vykonvać tyja ž miery pieraściarohi, što i raniej: nasić masku ŭ ludnych miescach, adkryvać vokny i dźviery, kali sustrakajeciesia ŭ pamiaškańni ź inšymi ludźmi, i sychodzić na samaizalacyju pry najaŭnaści simptomaŭ kavidu.
Kamientary