Histaryčny most u Raterdamie raźbiaruć, bo pad im nie prapłyvie jachta ŭładalnika Amazon
Uładam Raterdama pryjdziecca nie niekatory čas razabrać adzin z histaryčnych mastoŭ u horadzie. Sprava ŭ tym, što pad im nie moža prajści raskošnaja jachta ŭładalnika kampanii Amazon Džefa Biezasa, paviedamlaje Bi-bi-si.
Pavodle infarmacyi vydańnia, jachtu buduje niderłandskaja kampanija Oceanco. Jana vialikaja pamierami: kala 40 mietraŭ u vyšyniu i 127 u daŭžyniu. Inšaha sposabu davieści jachtu da adkrytaj vady niama, jak niama i mahčymaści skončyć jaje budaŭnictva dzie-niebudź jašče. Amal historyja ź vializnaj łodkaj, jakuju zrabiŭ daloka ad bieraha Rabinzon Kruza, ale paśla nie zmoh spuścić jaje na vadu, bo papiarednie ŭsio nie raźličyŭ.
Tut, adnak, usio skončycca bolš ščaśliva: most spačatku raźbiaruć, a paśla źbiaruć nazad. Raboty pa razborcy i dalejšamu adnaŭleńniu mosta apłacić kampanija Oceanco.
U meryi Raterdama rastłumačyli, što hety prajekt maje važnaje značeńnie dla ekanomiki horada, i što Raterdam šanuje svaju reputacyju «marskoj stalicy Jeŭropy». Raboty na moście pavinny prajści letam 2022 hoda i zaniać niekalki tydniaŭ.
Były čyhunačny most Kaninhschiejvien (jon taksama viadomy jak De Hef), pra jaki idzie havorka, byŭ uźviedzieny ŭ XIX stahodździ i paciarpieŭ padčas bambavańniaŭ Raterdama nacystami padčas Druhoj suśvietnaj vajny. Jon maje status nacyjanalnaha pomnika. Z 2014 da 2017 hoda most prachodziŭ restaŭracyju, paśla čaho ŭłady abiacali, što bolš jaho raźbirać nie buduć. Ale abstaviny skłalisia inačaj.
Ciapier čytajuć
Jak skłaŭsia los pałkoŭnika Łosieva, jaki pakryvaŭ bandu marozaŭcaŭ i atrymaŭ 18 hadoŭ kałonii2
Kamientary