Top-30 samych seksualnych biełaruskich mužčyn ad «Našaj Nivy»
«Naša Niva» nie zmahła abyści ŭvahaj Dzień usich zakachanych i skłała rejtynh samych seksualnych biełaruskich mužčyn. Muzyki, spartoŭcy, biznesmieny… Kahości ŭklučyli za charyzmu, kahości — za šykoŭnuju fihuru, kahości — za intelekt. Ukłaścisia ŭ tryccatku było niaprosta: akazałasia, u nas šmat hodnych mužčyn.
Paradkavy numar u rejtynhu nie maje značeńnia, uviedzieny prosta dla padliku.
1. Pavieł Charłančuk
Kupałaviec, madel, šmatdzietny baćka. Jon jak Bred Pit — z hadami stanovicca tolki lepš. Praŭda, biłbordy z Charłančukom u horadzie nie pabačyš: letašniuju rekłamu «Elemy», u jakoj jon źniaŭsia, praz čas prybrali z vulic.
2. Uładzimir Kazłoŭ
Salist fołk-rok hurta Relikt. Kaliści jon pracavaŭ elektrykam u mietro, a paśla z hałavoj syšoŭ u muzyku.
3. Pavieł Sankovič
Płyviec i 60-razovy rekardsmien Biełarusi. Udzielničaŭ u Alimpijskich hulniach u Piekinie, Łondanie i Rya. Apošnija dzieviać hod žyvie i trenirujecca ŭ ZŠA. Jaho žonka Śviatłana Chachłova taksama płyŭčycha.
4. Eduard Babaryka
My nie mahli nie ŭklučyć u hety śpis palitviaźniaŭ, bo siarod ich šmat hodnych chłopcaŭ. Eduard zapuskaŭ paśpiachovyja kraŭdfandynhavyja placoŭki MolaMola i «Vulej», nivodnaja ź jakich ciapier nie dastupna. U turmie chłopiec z červienia 2020 hoda, suda dahetul nie było.
5. Mikita Mikada
Zasnavalnik PandaDoc žyvie ŭ ZŠA, u soniečnym San-Francyska. Vypusknik BDUIRa, jon stvaryŭ kampaniju, jakaja letaś stała «adzinaroham» — jaje acanili ŭ adzin miljard dalaraŭ. Mikita taksama arhanizavaŭ prajekt dapamohi siłavikam, jakija syšli z orhanaŭ, ale paśla aryštaŭ supracoŭnikaŭ kampanii prypyniŭ jaho.
6. Andrej Tkačoŭ
Fitnies-trenier i vałancior fondu, jaki dapamahaŭ miedykam padčas kavidu. Raniej časta zdymaŭsia ŭ rekłamie i klipach.
7. Dzianis Dudzinski
Šoŭmien, śpiavak. Paśla vybaraŭ byŭ vymušany źmianić Minsk na Kijeŭ i pracu ŭ «Dobraj ranicy, Biełaruś», što vychodziła na BT, na ŭkrainskuju ranišniuju pieradaču.
8. Alaksiej Sadavoj
Minski restaratar. Suzasnavalnik niekalkich baraŭ i restaranaŭ — «Piena dzion», ID, Darling, «Biassońnica», «Chinkalnia».
9. Anton Bialenski
Vypusknik Liceja BDU i ŭładalnik čornaha pojasa pa karate. Byŭ paśpiachovym biznesoŭcam. Na vybarach staŭ vałancioram štaba Babaryki, za što jaho i zatrymali. Anton pravioŭ siem miesiacaŭ u SIZA, paśla čaho atrymaŭ paŭtara hoda «chimii».
10. Valer Kavaleŭski
Pradstaŭnik pa mižnarodnych spravach ofisa Śviatłany Cichanoŭskaj. Były biełaruski dypłamat (svaju karjeru pry MZS jon skončyŭ u 2006-m) pracavaŭ časovym pavieranym Biełarusi ŭ ZŠA. Da taho jak dałučycca da štaba, byŭ kansultantam u Suśvietnym banku.
11. Andrej Mačałaŭ
Advakat, pazbaŭleny licenzii. Nie bajaŭsia bracca za palityčnyja administracyjnyja i kryminalnyja spravy. Ź dziacinstva zajmajecca płavańniem, lubić tryjatłon i spłavy na bajdarkach.
12. Juryj Stylski
Salist hurta «Daj Darohu!». U instahramie śpiavak lubić radavać padpisčyc macavanym torsam. Maje pazašlubnaha syna. «Mnie patelefanavała dziaŭčyna i paviedamiła, što majmu synu 16 hadoŭ. Voś heta prykoł. Jany žyvuć u Italii, na bierazie mora, u ich usio ŭ paradku, i ad mianie ničoha nie treba», — raskazvaŭ jon «NN» u 2015-m.
13. Jaŭhien Juškievič
Były śledčy, jaki paśla pracy ŭ orhanach syšoŭ u IT. Haspadar dvuch sabak — chaski Jakuta i dratchaara Chanta. Ciapier Jaŭhien — palitviazień, jaho abvinavačvajuć pa troch artykułach Kryminalnaha kodeksa. «Ničoha b nie źmianiŭ — šalony i cikavy hod. Nie źjechaŭ by», — pieradavaŭ jon u intervju z-za krataŭ.
14. Andruś Biezdar
Architektar i suzasnavalnik biuro Zrobim architects. Pracuje taksama jak dyzajnier adzieńnia ŭ brendzie UND wear, rysa jakoha — etna-minimalizm.
15. Mikita Miełkazioraŭ
Topavy jutub-błohier i aŭtar kanała «Žyćcio-malina». Lubić kroksy, vučyć matčynu movu, nie pje ałkahol. Dla znajomstva ź dziaŭčatami abiraje instahram. «Moj śpis žančyn moh patrapić u RUUS niekalki razoŭ. Bo telefon, u jakim jon byŭ, ja addaŭ siabram, kali jany chadzili na akcyi. Ale jany źnieśli ŭsie naładki, i śpisa majho nie zastałosia. Tamu ciapier ja ničoha nie dakažu», — žartavaŭ Mikita.
16. Maks Starcaŭ
Ź jaho imiem źviazany takija kultavyja miescy ŭ stalicy, jak Re:public i chipstarski bar «Chulihan» (u 2020-m jon zakryŭsia). Maks supracoŭničaŭ taksama z łejbłam śpievaka Ivana Dorna Masterskaya.
17. Arciom Kureń
Charyzmatyčny akcior Respublikanskaha teatra biełaruskaj dramaturhii. Jaho taksama možna pabačyć u kino — u hałoŭnych rolach filmaŭ «Haraš», «Ślady na vadzie», niekatorych rasijskich stužak.
18. Alaksandr Vasilevič
Suzasnavalnik halerei «Ŭ», rekłamnych ahienctvaŭ Vondel/Hepta, vydaviec kyky.org i The Village. Jon pravioŭ u SIZA 17 miesiacaŭ. Za kratami Saša napisaŭ kazki dla svajoj maleńkaj dački.
19. Dźmitryj Navoša
Były suŭładalnik Sports.ru i kiraŭnik biełaruskaha spartovaha sajta «Trybuna». Doŭhi čas Navoša pracavaŭ u Rasii, ale ciapier nie ryzykuje tudy jeździć.
20. Siarhiej Bašłykievič
Rok-muzyka hurta Leibonik. Siarhiej i jaho humar rodam z Ašmianaŭ. Raniej na kancertach jaho možna było pabačyć u cišotkach ź imionami biełaruskich piśmieńnikaŭ. Ci bieź cišotki.
21. Jaŭhien Niaŭhień
Paśpiachova ajcišnik i suzasnavalnik MSQRD (startap, jaki vykupiŭ Facebook). Prahramavać Jaŭhien pačaŭ jašče ŭ škole. Letaś jon z naparnikam i supiermadellu Natallaj Vadzianavaj zapuścili novy prajekt — dabračynny aŭkcyjon sustreč Locals.org. Na heta Jaŭhiena natchniŭ biełaruski prajekt «Maje sens».
22. Saša Ivulin
Žurnalist, aŭtar jutub-kanała «ČiestnOK». Letaś Saša zapuściŭ futbolnaje realici — padpisaŭ kantrakt z kamandaj «Krumkačy» i staŭ treniravacca razam sa spartoŭcami, kab samomu trapić u asnoŭny skład. Zaviaršyć jaho jon nie zmoh: u minułym červieni chłopca zatrymali. Sašy prysudzili dva hady kałonii.
23. Arciom Łukjanienka
Salist hurta NaviBand. Z hod tamu ŭ znak padtrymki palitviaźniaŭ muzyka pahaliŭ hałavu. Treba skazać, novy imidž jamu vielmi pasuje.
24. Viktar Marcinovič
Biez hetaha piśmieńnika śpis byŭ by nie poŭny. Elehantny, ramantyčny intelektuał. Praŭda, na spatkańnie ź Viktaram patrapić možna tolki ŭ farmacie aŭtohraf-siesii: piśmieńnik žanaty. Tamu pilnujcie novyja ramany.
25. Dźmitryj Kachno
Viadučy i šoŭmien. Ź niadaŭniaha času Dźmitryj ź siamjoj pierajechaŭ u Maskvu, dzie, zdajecca, arhanična ŭpisaŭsia ŭ śvieckaje žyćcio. Zachaplajecca vindsiorfinham i plažnym valejbołam.
26. Vadzim Prakopjeŭ
Były minski restaratar. Ciapier Prakopjeŭ viadzie kanał «Radyjo Haaha» — z ułaścivym jamu pačućciom hustu, vostrym słovam i nalotam zahadkavaści.
27. Maksim Truchanaviec
Bodzibiłdar. Niadaŭna pabiŭ rekord Hiniesa pa kolkaści vychadaŭ na himnastyčnych kolcach — zrabiŭ 305 razoŭ za hadzinu. Varkaŭtam Maksim zajmajecca z vośmaha kłasa, trenirujecca pa šeść dzion na tydzień. A pracuje chłopiec prahramistam.
28. Źmicier Vajciuškievič
Navat nie vierycca, što jamu 50. Vajciuškievič ščaślivy ŭ trecim šlubie. Jaho žonka — rehient choru Halina Kazimiroŭskaja. Adzin ź letašnich klipaŭ Vajciuškieviča — «Nievierahodnaść» — byŭ pryśviečany advažnym biełaruskim žančynam.
29. Andrej Bond
Šoŭmien, tusoŭščyk. U adnym ź intervju raskazvaŭ, što ŭ jaho było bolš za 500 dziaŭčat, ale pryznajecca, što vobraz pop-zorki — heta zusim nie pra jaho. Andrej lubić ekśpierymientavać sa źniešnaściu — naprykład, nadzieć kiłt ci pafarbavać paznohci ŭ čorny.
30. Vital Hurkoŭ
Šmatrazovy čempijon śvietu i Jeŭropy pa kikboksinhu i tajskim boksie, udzielnik muzyčnaha hurta Brutto. Ciapier Hurkoŭ prymiaraje rolu treniera. Na apošni čempijanat śvietu pa muaj-taj jon rychtavaŭ spartoŭku sa zbornaj Ukrainy.
Čytajcie jašče:
«Nie treba chavacca i chavać». Dźmitryj Kachno adkazaŭ tym, chto chejciŭ haračaje fota
«Hruzić siabie i inšych»: były pamočnik Łukašenki Ihar Bryło biare na siabie vinu ŭ pramysłovych abjomach5
Kamientary